| ← Jeremiah (26/52) → |
| 1. | Ekuqaleni kokubusa kukaJehoyakhimi indodana kaJosiya, inkosi yakoJuda, kwafika lelilizwi le Nkosi lathi: |
| 2. | I Nkosi ithi: Mana egumeni lethempeli, ukhulume kuyo yonke imizi yakoJuda efikayo ukuzakhonza ethempelini, utsho wonke amazwi engakulaya wona, ungatshiyi lelilodwa. |
| 3. | Mhlawumbe bazalalela, bonke batshiye indlela zabo ezimbi, ukuze ngiyekele okubi ebengisithi ngizakwenza kubo ngenxa yezenzo zabo ezimbi. |
| 4. | Uzakuthi kibo: I Nkosi ithi: Uba lingayikungilalela, lihambe ngomlayo wami engiwubeka phambi kwenu, |
| 5. | lingawalaleli amazwi enceku zami abaprofethi engibathume kini, ngivuka ngovivi ngibathuma, kodwa lingabalaleli, |
| 6. | ngizakwenza lindlu ibe njengeShilo, ngenze lumuzi ube yisiqalekiso kuzo zonke izizwe zomhlaba. |
| 7. | Abapristi labaprofethi labo bonke abantu bamuzwa uJeremiya ekhuluma lamazwi ethempelini. |
| 8. | Lapho eseqedile ukukhuluma konke i Nkosi eyayimlayile ukukukhuluma ebantwini, abapristi labaprofethi labo bonke abantu bamdumela bathi: Sizakubulala! |
| 9. | Kungani uprofetha ngebizo le Nkosi usithi: Lindlu izakuba njengeShilo, lomuzi lo uzakuba yinkangala, kungabi lamuntu? Bonke abantu bambuthanela uJeremiya ethempelini. |
| 10. | Kwathi iziphathamandla zakoJuda sezizwile lezizinto zafika ethempelini, zivela esigodlweni se Nkosi, zahlala eSangweni elitsha. |
| 11. | Abapristi labaprofethi basebesithi kuzo iziphathamandla lakubo bonke abantu: Umuntu lo ufanele ukubulawa, ngoba uprofethe ngalumuzi njengoba lizizwele lani. |
| 12. | Wasekhuluma uJeremiya kuzo zonke iziphathamandla lakubo bonke abantu esithi: I Nkosi yangithuma ukuprofetha ngalindlu langalumuzi wonke amazwi eliwezwileyo. |
| 13. | Ngakho lungisani indlela zenu lezenzo zenu, lilalele ilizwi le Nkosi uNkulunkulu wenu, izayekela ukwenza okubi konke ekukhulume ngani. |
| 14. | Kodwa mina, khangelani, ngisezandleni zenu. Yenzani kimi njengokuthanda kwenu lanjengokufaneleyo emehlweni enu. |
| 15. | Kodwa lazi isibili ukuthi uba lingibulala, lizakwehlisela igazi elingelacala phezu kwenu laphezu kwalumuzi labakhileyo kiwo, ngoba isibili i Nkosi yangithuma ukukhuluma lamazwi kini. |
| 16. | Iziphathamandla labo bonke abantu basebesithi kubapristi labaprofethi: Lumuntu kafanelanga ukubulawa, ngoba ukhulumile kithi ebizweni le Nkosi, uNkulunkulu wethu. |
| 17. | Kwasekusukuma abanye abadala belizwe, bakhuluma kulo lonke ibandla labantu besithi: |
| 18. | UMika weMoreshethi waprofetha ensukwini zikaHezekhiya, inkosi yakoJuda, wathi kibo bonke abantu bakoJuda: I Nkosi yamabandla ithi: IZiyoni izalinywa njengensimu; iJerusalema ibe lunxiwa oludilikileyo, lentaba okwakhiwe kuyo ithempeli ibe lisandle. |
| 19. | Kambe inkosi yakoJuda uHezekhiya labo bonke abakoJuda bambulala yena yini? Angithi bayesaba i Nkosi, bayincenga, kayiyekelanga yini i Nkosi ukukwenza okubi eyayikukhulume ngabo? Sizakwehlisela phezu kwethu ububi obukhulu yini? |
| 20. | Kwakukhona lomunye umuntu owaprofetha ebizweni le Nkosi, uUriya indodana kaShemaya oweKiriyathi-Jeyarimi. Laye waprofetha ngalumuzi langalelilizwe ngamazwi afanana lamazwi kaJeremiya. |
| 21. | Kwathi lapho inkosi uJehoyakhimi, lawo wonke amaqhawe akhe, leziphathamandla zakhe, besizwa amazwi akhe, inkosi yadinga ukumbulala; kodwa kwathi uUriya esekuzwile lokhu, wesaba, wabalekela eGibhithe. |
| 22. | Inkosi uJehoyakhimi yasithuma eGibhithe amadoda athile, uElinathani indodana kaAkhibhori, kanye labanye, |
| 23. | bamthatha uUriya eGibhithe, bamletha enkosini uJehoyakhimi, owamtshaya ngenkemba, lesidumbu sakhe wasiphosela endaweni yokungcwabela abantukazana. |
| 24. | Kodwa uAhikhamu indodana kaShafani wamvikela uJeremiya ukuze anganikelwa ebantwini ukubulawa. |
| ← Jeremiah (26/52) → |