| ← Jeremiah (24/52) → |
| 1. | Emva kokuthi uNebukadinezari inkosi yeBhabhiloni esethumbile eJerusalema uJekoniya indodana kaJehoyakhimi, inkosi yakoJuda, kanye leziphathamandla zakoJuda, lezingcitshi zemisebenzi, labakhandi, wabasa eBhabhiloni, i Nkosi yangitshengisa lumbono: Khangela, izitsha ezimbili zilomkhiwa zibekwe phambi kwethempeli le Nkosi. |
| 2. | Esinye isitsha sasilomkhiwa omuhle kakhulu ovuthwe kuqala; kodwa esinye sasilomkhiwa omubi kakhulu ongadlekiyo ngenxa yobubi bawo. |
| 3. | I Nkosi yathi kimi: Jeremiya, ubonani? Ngathi: Umkhiwa, omuhle muhle kakhulu, lomubi mubi kakhulu, kawudleki ngenxa yobubi bawo. |
| 4. | Laselifika kimi ilizwi le Nkosi lisithi: |
| 5. | I Nkosi, uNkulunkulu kaIsrayeli, ithi: Njengalumkhiwa omuhle bazakuba njalo kimi abathunjiweyo bakoJuda, engibase elizweni lamaKhaladiya elikhatshana lalindawo. |
| 6. | Ngizabaphatha kuhle, ngibabuyise kulelilizwe. Ngizabakha, ngingabadilizi, ngibagxumeke, ngingabasiphuni, |
| 7. | ngibanike inhliziyo yokwazi ukuthi mina ngiyi Nkosi; bazakuba ngabantu bami, ngibe nguNkulunkulu wabo, ngoba bazabuyela kimi ngenhliziyo yabo yonke. |
| 8. | Kodwa i Nkosi ithi: Njengalumkhiwa omubi ongadlekiyo ngenxa yobubi bawo, ngizaphatha ngokunjalo uZedekhiya, inkosi yakoJuda, leziphathamandla zakhe, lensali yeJerusalema eseleyo kulelilizwe, lalabo abakhileyo elizweni leGibhithe. |
| 9. | Ngizabenza babe yinto eyesabekayo kuyo yonke imibuso yomhlaba, babe lihlazo, lesiga, lenhlekisa, lesiqalekiso kuzo zonke indawo engibaxotshele kuzo. |
| 10. | Ngizabehlisela inkemba lendlala lomatshayabhuqe wesifo, baze babhubhe baphele elizweni engibanika lona laboyise. |
| ← Jeremiah (24/52) → |