| ← Jeremiah (22/52) → |
| 1. | I Nkosi ithi: Hamba uye endlini yenkosi yakoJuda, ukhulume khona lelilizwi, |
| 2. | uthi: Zwana ilizwi le Nkosi, wena nkosi yakoJuda, ohlezi esihlalweni sobukhosi sikaDavida, lenceku zakho labantu bakho abangena ngalamasango. |
| 3. | I Nkosi ithi: Yenzani okuqotho lokulungileyo, likhulule esandleni somcindezeli lowo ophangiweyo, lingenzi okubi kowezizwe, lakuzo izintandane, lakumfelokazi, lingachithi igazi elingelacala kulindawo. |
| 4. | Ngoba uba lililalela lelilizwi isibili, kuzangena ngamasango alindlu amakhosi ahlezi esihlalweni sobukhosi sikaDavida, ekhwele izinqola, egade amabhiza, wona lenceku zawo kanye labantu bawo. |
| 5. | Kodwa uba lingawalaleli lamazwi, ngiyafunga ngami uqobo, kutsho i Nkosi, ukuthi lindlu izakuba lunxiwa. |
| 6. | Ngoba i Nkosi ithi mayelana lendlu yenkosi yakoJuda: Wena ufanana leGileyadi kimi lengqonga yeLebhanoni, kodwa isibili ngizakwenza ube njengenkangala, ube njengomuzi ongahlalwa muntu. |
| 7. | Ngizakulethela abachithi, bonke bephethe amahloka; bazagamula izihlahla zenu zomsedari ezinhle, baziphosele emlilweni. |
| 8. | Abezizwe abanengi bazadlula kulumuzi, babuzane bathi: I Nkosi yenzeleni okunje kulumuzi omkhulu? |
| 9. | Impendulo izakuthi: Kungoba basidela isivumelwano se Nkosi, uNkulunkulu wabo, bakhonza abanye onkulunkulu, babasebenzela. |
| 10. | Lingamkhaleli ofileyo, lingamlileli, kodwa khalelani kakhulu ohambileyo, ngoba kasayikubuya alibone futhi ilizwe lakibo. |
| 11. | Ngoba i Nkosi ithi mayelana loShaluma indodana kaJosiya, inkosi yakoJuda, owabusa esikhundleni sikaJosiya uyise, wasuka kulindawo: Yena kasayikuphinda abuye lapha futhi, |
| 12. | kodwa kuleyondawo athunjelwe kuyo uzafela khona, kasayikuphinda alibone lelilizwe futhi. |
| 13. | Maye kulowo owakha indlu yakhe ngokungalungi, lezitezi zakhe ngokungafanelanga, owenza umakhelwane wakhe amsebenzele ngeze, angamholisi, |
| 14. | othi: Ngizazakhela indlu enkulu elezitezi ezibanzi; ayenzele amawindi, ayelekanise ngamapulanka omsedari, ayicombe ngokubomvu. |
| 15. | Ukwakha ngemisedari yikho okukwenza ube yinkosi yini? Angithi uyihlo wadla wanatha njengawe, kodwa wenza okulungileyo lokuqotho? Ngakho kwamlungela. |
| 16. | Wayethonisa udaba lwabayanga labaswelayo; kwamlungela. Angithi yikho lokhu ukungazi mina? kutsho i Nkosi. |
| 17. | Kodwa wena, amehlo akho lenhliziyo yakho kusekuphangeni kuphela, lekuchitheni igazi elingelacala, lakucindezelo lekwenzeni okubi. |
| 18. | Ngakho-ke i Nkosi ithi mayelana loJehoyakhimi indodana kaJosiya, inkosi yakoJuda: Kabayikumkhalela ngokuthi: Hawu mfowethu! Kabayikumkhalela bathi: Hawu nkosi! loba: Hawu mhlekazi! |
| 19. | Uzangcwatshwa njengobabhemi; uzahudulwa, alahlwe ngaphandle kwamasango eJerusalema. |
| 20. | Khwela eLebhanoni, umemeze, wena Jerusalema, uphakamise ilizwi lakho eBashani, umemeze useAbarimi, ngoba zonke izithandwa zakho zibhujisiwe. |
| 21. | Ngakhuluma lawe uselenhlanhla, kodwa wena wathi: Kangiyikulalela. Lokho kuyindlela yakho kusukela ebutsheni bakho, ukuthi ungalilaleli ilizwi lami. |
| 22. | Umoya uzaphephula bonke abelusi bakho, lezithandwa zakho zizathunjwa: khona-ke uzakuba lenhloni, udane, ngenxa yobubi bakho bonke. |
| 23. | Wena ohlala eLebhanoni, owakhe isidleke sakho phakathi kwemisedari, yeka ukukhala kwakho mhla uzakwehlelwa yibuhlungu, ubuhlungu obunjengobowesifazana obelethayo. |
| 24. | Ngiyafunga ngami, kutsho i Nkosi, loba uKoniya indodana kaJehoyakhimi, inkosi yakoJuda, ebeyindandatho elophawu esandleni sami sokunene, bengizakuhluthula, ngikukhuphe, |
| 25. | ngikunikele ezandleni zalabo abakuzingelayo, labo obesabayo, ngitsho esandleni sikaNebukadinezari inkosi yeBhabhiloni lakumaKhaladiya, |
| 26. | ngikuphosele kanye lonyoko kwelinye ilizwe ongazalelwanga kilo, ufele khona. |
| 27. | Kodwa elizweni abafisa ukubuyela kilo kabayikubuyela. |
| 28. | Lumuntu uKoniya uyimbiza efileyo lesitsha esingananzwa muntu yini? Uphoselelwani yena labantwana bakhe kwelinye ilizwe abangalaziyo? |
| 29. | Wena lizwe, lizwe, zwana ilizwi le Nkosi. |
| 30. | I Nkosi ithi: Lobani ukuthi lumuntu kalabantwana, umuntu ongayikuphumelela ensukwini zakhe; ngoba kakho loyedwa enzalweni yakhe ozahlala esihlalweni sobukhosi sikaDavida, abuse futhi koJuda. |
| ← Jeremiah (22/52) → |