| ← Jeremiah (16/52) → |
| 1. | Ilizwi le Nkosi lafika kimi lisithi: |
| 2. | Ungathathi umfazi, ungabi lamadodana lamadodakazi kulindawo. |
| 3. | Ngoba i Nkosi ithi mayelana lamadodana lamadodakazi azalelwe kulindawo, langabonina laboyise ababazalele kulelilizwe: |
| 4. | Bazabulawa yikufa okwesabekayo; kabayikulilelwa, futhi kabayikungcwatshwa; bazakuba njengamalongwe emhlabathini. Bazabhujiswa ngenkemba langendlala, lezidumbu zabo zibe yikudla kwenyoni zamazulu lenyamazana zeganga. |
| 5. | I Nkosi ithi: Ungangeni endlini yesililo, ungayi esililweni ukubakhalela; ngoba ngikususile ukuthula kwami kulababantu, lothando lwami kanye lesihawu, kutsho i Nkosi. |
| 6. | Bazakufa bonke abakhulu labancinyane kulindawo; kabayikungcwatshwa, futhi kakulamuntu ozabalilela kumbe azisike, loba agele ikhanda lakhe ngenxa yabo. |
| 7. | Kakho ozabanika abalilayo isinkwa ukubaduduza ngenxa yabafileyo; futhi kakho ozamnathisa inkezo yokududuza ngoyise langonina. |
| 8. | Kawuyikungena endlini yedili ukuze uhlale labo, udle unathe. |
| 9. | Ngoba i Nkosi yamabandla, uNkulunkulu kaIsrayeli, ithi: Khangelani, ensukwini zenu, phambi kwenu, ngizakwenza ukuthi umsindo wentokozo uphele kulindawo, lowenjabulo, lelizwi lomyeni lelomakoti. |
| 10. | Kuzakuthi lapho ubatshela lababantu wonke lamazwi, bathi kuwe: I Nkosi ikhulumelani konke lokhu okubi okukhulu ngathi? Ububi bethu buyini? Yisiphi isono esisenze e Nkosi ni uNkulunkulu wethu yini? |
| 11. | Wena uthi kibo: Kungoba oyihlo bangitshiyile, kutsho i Nkosi; baye kwabanye onkulunkulu, babasebenzela, babakhonza, bangitshiya mina, kabawugcinanga umlayo wami; |
| 12. | langoba lina lenze okubi okwedlula oyihlo; ngoba khangelani, lonke lilandela inkani yenhliziyo zenu ezimbi, liyala ukungilalela. |
| 13. | Ngalokho-ke ngizaliphosela ngaphandle kwalelilizwe, liye elizweni elingalazanga lina loyihlo; kulapho lizasebenzela abanye onkulunkulu emini lebusuku, ngoba mina kangiyikulihawukela. |
| 14. | Ngakho khangela, insuku zizafika, kutsho i Nkosi, lapho kungasayikuthiwa: Kuphila kukaJehova owabakhupha abantwana bakoIsrayeli elizweni leGibhithe; |
| 15. | kodwa kuzakuthiwa: Kuphila kukaJehova owabakhupha abakoIsrayeli elizweni lenyakatho lemazweni ababexotshelwe kiwo. Ngoba ngizababuyisa elizweni lakibo engalinika oyise. |
| 16. | Khangelani, ngiyathuma abagoli benhlanzi abanengi, bababambe, kutsho i Nkosi; emva kwalokho ngizathuma abazingeli abanengi, babazingele entabeni zonke, lemaqaqeni wonke, babakhuphe ezimbalwini zamatshe zonke. |
| 17. | Ngoba ngiyazibona zonke indlela zabo, kazifihlakalanga kimi, lobubi babo kabucatshanga emehlweni ami. |
| 18. | Ngizaphindisela ngokuphindiweyo ububi babo lezono zabo, ngoba balingcolisile ilizwe lami ngezidumbu zezithombe zabo ezinengekayo, bagcwalisa ilizwe lami ngamanyala abo. |
| 19. | Nkosi, wena ongamandla ami lenqaba yami, isiphephelo sami ngosuku lokuhlupheka, izizwe zizafika kuwe zivela emikhawulweni yomhlaba, zithi: Obaba badlile ilifa lamanga kuphela, izinto ezingelamsebenzi ezingasizi lutho. |
| 20. | Kambe umuntu angazenzela onkulunkulu yini? Labo kabayisibo onkulunkulu. |
| 21. | Ngakho khangela, ngizabatshengisa lokhu, ngalesisikhathi ngizabazisa amandla ami lobukhulu bami, bazakwazi ukuthi ngiyi Nkosi. |
| ← Jeremiah (16/52) → |