| ← Hosea (4/14) → |
| 1. | Zwanini ilizwi le Nkosi, lina bantwana bakoIsrayeli, ngoba i Nkosi imangalela abakhileyo elizweni. Kakukho uthembeko lomusa lokumazi uNkulunkulu elizweni. |
| 2. | Kukhona ukwephulwa kwezifungo, lokuqamba amanga, lokubulala, lokweba, lokufeba; baqhubeka ngokwenza okubi, lamacala egazi ayalandelana. |
| 3. | Ngakho-ke ilizwe liyalila, labo bonke abahlala kilo baphela amandla, kanye lenyamazana zeganga lenyoni zamazulu, lenhlanzi zolwandle ziyaphela. |
| 4. | Kakungabi khona umuntu owethwesa omunye icala, lomangelela omunye, ngoba mina ngizakwethwesa icala, wena mpristi. |
| 5. | Uzakhubeka emini lebusuku, umprofethi uzakhubeka kanye lawe; uyasibulala isizwe sakini. |
| 6. | Abantu bami bayabhubha ngokuswela ukwazi; ngoba ukwalile ukwazi, lami ngizakwala, ungangisebenzeli njengompristi. Lokhu usuwukhohliwe umlayo kaNkulunkulu wakho, lami ngizakhohlwa abantwana bakho. |
| 7. | Ngokwanda kwabapristi kuyanda lokona kwabo kimi. Udumo lwabo ngizaluphendula lube lihlazo. |
| 8. | Badla izono zabantu bami, bayizihwaba zobubi babo. |
| 9. | Abapristi labantu bazaphathwa ngokufananayo, ngizabatshaya ngenxa yendlela zabo, ngibaphindisele ngenxa yezenzo zabo. |
| 10. | Bazakudla, kodwa bangasuthi; bazawula, kodwa bangandi; ngoba bawulile ngokudela i Nkosi. |
| 11. | Iwayini elidala lelitsha liyaqeda ukuqedisisa kwabantu bami. |
| 12. | Bayacela izeluleko esigodweni, lentonga yabo iyabeluleka. Ngoba umoya wokuwula ubaduhisile, bawulile ngokutshiya uNkulunkulu wabo. |
| 13. | Benza imihlatshelo engqongeni zentaba, banikela iminikelo phezu kwamaqaqa, ngaphansi kwesihlahla se-okhi*, langaphansi kwemikhaya emhlophe, langaphansi kwezihlahla ezinkulu lezilamahlamvu ngoba zilemithunzi emihle. Ngakho-ke amadodakazi enu ayawula, labomakoti benu bayafeba. |
| 14. | Kangiyikuwatshaya amadodakazi enu nxa ewula, labomakoti benu nxa befeba; ngoba lamadoda lawo ahamba lamawule, enze imihlatshelo yawo kanye lezifebe zethempelini; abantu abangelakuqedisisa bazabhubha. |
| 15. | Loba wena Israyeli uwula, uJuda kangabi lacala. Lingangeni eGiligali, lingayi eBetiAveni, lingafungi lithi: Kuphila kukaJehova. |
| 16. | UIsrayeli ulenkani njengethokazi elihlanyayo; i Nkosi izabelusela edlelweni elibanzi njengamawundlu yini? |
| 17. | UEfrayimi uzihlanganisile lezithombe |
| 18. | lexuku lezidakwa, bazinikela ekuwuleni, bethanda ihlazo okwedlula udumo lwabo. |
| 19. | Umoya uzabakhukhula, ubagoqele ngempiko zawo, amalathi abo azabalethela ihlazo kuphela. |
| ← Hosea (4/14) → |