| ← Hosea (11/14) → |
| 1. | UIsrayeli esengumntwana ngamthanda, ngayibiza indodana yami ukuthi iphume eGibhithe. |
| 2. | Kwathi ngibabiza, kwaba khona besuka kimi; baqhubeka ukuhlabela oBhali lokutshisela izithombe ezibaziweyo impepha. |
| 3. | Kanti kwakuyimi engacathulisa uEfrayimi, ngabaphatha abantu bami ezingalweni zami, kodwa kabazanga ukuthi ngibelaphile. |
| 4. | Ngabadonsa ngamagoda omusa langentambo zothando, ngenza kibo njengomuntu ophakamisela umntwana emlonyeni ukumanga, ngakhothama kibo, ngabanika ukudla. |
| 5. | Bazabuyela elizweni leGibhithe, leAsiriya lizakuba yinkosi yabo, ngoba balile ukubuya kimi. |
| 6. | Inkemba izatheleka emizini yabo, yephule lemigoqo yamasango ayo, ibadle ezinqabeni zabo. |
| 7. | Abantu bami baqonde ukuhlehla kimi, lanxa bekhuleka kuNkulunkulu wabo ophakemeyo, kodwa kayikubasiza. |
| 8. | Ngizakulahla njani, Efrayimi? Ngizakunikela njani, Israyeli? Ngizakwenza njani ube njengeAdima? Ngizakuphatha njani njengeZeboyimi? Inhliziyo iyala phakathi kwami, lesihawu sami siyaqubuka. |
| 9. | Kangiyikwenza njengokuthukuthela kwami okukhulu. Kangiyikuphinda ngimchithe uEfrayimi; ngoba mina nginguNkulunkulu, kangisuye umuntu, ngingoNgcwele ophakathi kwenu, kangiyikuza ukuchitha, |
| 10. | Bazayilandela i Nkosi ezabhonga njengesilwane; yebo, izabhonga, lamadodana ayo azavela entshonalanga ngokuphangisa. |
| 11. | Azavela eGibhithe ngokuphangisa njengenyoni, lanjengamajuba evela elizweni leAsiriya; ngizababuyisela emizini yabo, kutsho i Nkosi. |
| 12. | UEfrayimi ungizingelezele ngamanga, loIsrayeli ungiphahlile ngenkohliso; loJuda uyangihlamuka, mina othembekileyo longcwele. |
| ← Hosea (11/14) → |