| Haggai (1/2) → |
| 1. | Ngomnyaka wesibili kaDariyusi inkosi, ngosuku lokuqala lwenyanga yesithupha, ilizwi le Nkosi lafika ngoHagayi umprofethi kuZerubhabheli indodana kaSalatiyeli umbusi wakoJuda, lakuJoshuwa indodana kaJehozadaki umpristi omkhulu; |
| 2. | lathi: I Nkosi yamabandla ithi: Lababantu bathi kakukabi yisikhathi sokwakha kithi ithempeli le Nkosi. |
| 3. | Laselifika ilizwi le Nkosi ngoHagayi umprofethi |
| 4. | lisithi: Kuyisikhathi yini sokuthi lina lihlale ezindlini zenu ezinhle, kanti lindlu ilunxiwa? |
| 5. | Ngakho-ke i Nkosi yamabandla ithi: Ake libone ukuthi izinto zilimele njani. |
| 6. | Lihlanyele okunengi, lavuna okuyingcosana; liyadla, kodwa kalisuthi; liyanatha, kodwa kalikholwa; ligqoke lingakhudumali, lohola imali uholela ukuyifaka esikhwameni esivuzayo. |
| 7. | I Nkosi yamabandla ithi: Ake libone ukuthi izinto zilimele njani. |
| 8. | Khwelani ezintabeni ligamule izigodo, lakhe indlu engithokozisayo, lapho engingabonakalisa khona udumo lwami, kutsho i Nkosi. |
| 9. | Beliqaphele okunengi, kodwa khangelani, kube yingcosana elikuzuzileyo; lapho likuletha ekhaya, ngikuphephule konke. Kungani? kutsho i Nkosi yamabandla. Kungenxa yendlu yami elunxiwa, lina lilibele ngendlu zenu. |
| 10. | Ngenxa yalokhu-ke amazulu avalekile ukuze kungabi lamazolo, lomhlabathi uvalekile ukuze lingazuzi izithelo zawo. |
| 11. | Ngilethile ukoma elizweni lezintabeni laphezu kwamabele laphezu kwewayini elitsha lamafutha laphezu kwakho konke okuvela emhlabathini, ebantwini lezifuyweni lakho konke abakwenzayo. |
| 12. | Ngakho uZerubhabheli indodana kaSalatiyeli loJoshuwa indodana kaJehozadaki umpristi omkhulu, labo bonke abantu ababesele, balilalela ilizwi le Nkosi uNkulunkulu wabo, lamazwi kaHagayi umprofethi owayethunywe yi Nkosi uNkulunkulu wabo; abantu bayesaba i Nkosi. |
| 13. | UHagayi isithunywa se Nkosi wasekhuluma ebantwini ilizwi le Nkosi, wathi: Ngilani, kutsho i Nkosi. |
| 14. | I Nkosi yavusa umoya kaZerubhabheli indodana kaSalatiyeli umbusi wakoJuda, lomoya kaJoshuwa indodana kaJehozadaki umpristi omkhulu, lomoya wabo bonke abantu ababesele; beza ukuze basebenze endlini ye Nkosi yamabandla uNkulunkulu wabo, |
| 15. | ngosuku lwamatshumi amabili lane lwenyanga yesithupha. |
| Haggai (1/2) → |