| ← Ezekiel (38/48) → |
| 1. | Ilizwi le Nkosi lafika kimi lathi: |
| 2. | Ndodana yomuntu, khangela kuGogi, isiphathamandla seRoshi leMesheki leTubali, elizweni leMagogi, uprofethe ngaye, |
| 3. | uthi: INkosi uJehova ithi: Khangela, ngimelene lawe, Gogi, sikhulu seRoshi leMesheki leTubali. |
| 4. | Ngizakuphendula, ngifake ingwegwe emihlathini yakho, ngikukhuphe wena lebutho lakho lonke, amabhiza labagadi bamabhiza, bonke begqoke izigqoko zensimbi. bephelele, belixuku elikhulu, bonke bephethe ihawu lesihlangu esikhulu, begweba ngezinkemba. |
| 5. | AbePerisiya labeKushi labePuti balabo, belezihlangu lezingowane bonke, |
| 6. | iGomeri lamaxuku alo wonke, iBeti-Togarima lamaxuku alo elivela endaweni ezikhatshana zenyakatho, abantu abanengi abakanye lawe. |
| 7. | Lunga, uhlale ulungile, wena kanye lawo wonke amaxuku abuthene kuwe, ube ngumkhokheli wawo. |
| 8. | Emva kwensuku ezinengi uzahanjelwa; eminyakeni ezayo uzahlasela ilizwe elathathwa enkembeni, elilabantu ababuthwa ezizweni ezinengi, babekwa entabeni zakoIsrayeli ebeziyinkangala isikhathi eside. Bona abakhutshwa ezizweni bazahlala khona bangethuki, bonke ngoluthi lwabo. |
| 9. | Uzaqhubeka, uze njengesiphepho, ube njengeyezi elisibekele umhlaba, wena lawo wonke amaxuku akho, abantu abanengi belawe. |
| 10. | INkosi uJehova ithi: Ngalolosuku kuzafika imicabango engqondweni yakho, wenze amacebo amabi, |
| 11. | uthi: Ngizahlasela ilizwe elilemizi engabiyelwanga, ngibulale abantu abahlala ngokuthula bengethuki lutho, bonke behlala emizini engelamiduli, lengelamasango lemigoqo, |
| 12. | ngithathe impango ngiyithumbe, ngihlasele indawo ebezichithekile esezilabantu, ngihlasele abantu ababuthwe ezizweni abazuze izifuyo lempahla, abahlala enkabeni yomhlaba. |
| 13. | IShebha leDedani, labathengisi beTarshishi lawo wonke amabhongo ezilwane layo bazakuthi kuwe: Uzile yini ukuthatha impango yini? Ubuthanisile ixuku lakho ukuthumba impango, uthathe isiliva legolide, uthathe izifuyo lempahla, uthumbe impango enengi yini? |
| 14. | Ngalokho-ke, ndodana yomuntu, profetha kuGogi uthi: INkosi uJehova ithi: Ngalolosuku nxa isizwe sami uIsrayeli sesihlala singethuki, uzavuka, |
| 15. | uphume endaweni yakini, endaweni ezikhatshana zenyakatho, wena labantu abanengi kanye lawe, bonke begade amabhiza, belixuku elikhulu lebutho elilamandla. |
| 16. | Uzahlasela abantu bami uIsrayeli njengeyezi lisibekela umhlaba. Ensukwini zokucina ngizakuqhubeza lelizwe lami ukuze izizwe zingazi, nxa ngibonakalisa ngawe ubungcwele bami phambi kwazo, wena Gogi. |
| 17. | INkosi uJehova ithi: Ekukhulumeni kwami ngenceku zami abaprofethi ensukwini zasendulo, abaprofetha futhifuthi ngalezonsuku, kwakungawe engasonga ukumletha ukuhlasela koIsrayeli. |
| 18. | Kodwa ngalolosuku azafika ngalo uGogi elizweni lakoIsrayeli, ulaka lwami luzavutha, kutsho iNkosi uJehova. |
| 19. | Ngoba ngomona wami langolaka lwami oluvuthayo ngithi: Ngalolosuku kuzakuba khona ukunyikinyeka okukhulu elizweni lakoIsrayeli. |
| 20. | Inhlanzi zolwandle, lenyoni zamazulu, lenyamazana zeganga, lazo zonke izinto ezihahabayo phansi, labo bonke abantu abakhona emhlabeni, kuzathuthumela phambi kwami; intaba zizadilizelwa phansi, kudilike amawa, lemiduli yonke iwele phansi. |
| 21. | Ngizambizela konke okwesabekayo uGogi, kutsho iNkosi uJehova. Abantu bakhe bonke bazabulalana. |
| 22. | Ngizamjezisa ngomatshayabhuqe wesifo langokuchitheka kwegazi, ngehlisele phezu kwakhe lamaxuku akhe labo bonke abantu abalaye izulu lesiqhotho lomlilo lesolufa*. |
| 23. | Ngalokho ngizaveza ubukhulu bami lobungcwele bami, ngizibonakalise ezizweni ezinengi; khona-ke bazakwazi ukuthi ngiyi Nkosi. |
| ← Ezekiel (38/48) → |