| ← Ezekiel (13/48) → |
| 1. | Ilizwi le Nkosi lafika kimi lathi: |
| 2. | Ndodana yomuntu, profetha ngabaprofethi bakoIsrayeli, uthi kulabo abaprofethayo okwengqondo zabo: Zwanini ilizwi le Nkosi. |
| 3. | INkosi uJehova ithi: Maye kubaprofethi abayizithutha abalandela owabo umoya, bengabonanga mibono! |
| 4. | Wena Israyeli, abaprofethi bakho banjengamakhanka asemanxiweni. |
| 5. | Kabayanga ezikhaleni ukulungisela uIsrayeli umduli odilikileyo ukuze aqine empini esukwini lwe Nkosi. |
| 6. | Bakhohlisile, bavumisa amanga, besithi: Nanka amazwi e Nkosi; yona i Nkosi ingabathumanga, baqaphele ukuthi izagcwalisa ilizwi labo. |
| 7. | Kakusiwo umbono wenkohliso eliwubonileyo yini, lina baprofethi? Ukuvumisa kwenu kakusiwo amanga yini? Lithi kuyilizwi le Nkosi uqobo, kodwa kungeyisimi engikhulumileyo. |
| 8. | Ngakho-ke iNkosi uJehova ithi: Ngoba likhulume inkohliso, labona amanga, ngakho, khangelani, ngizamelana lani, kutsho iNkosi uJehova. |
| 9. | Isandla sami sizamelana labaprofethi ababona imibono yenkohliso, bavumise amanga. Kabayikuba semhlanganweni wabantu bami, loba babhalwe eluhlwini lwakoIsrayeli, kabayikungena elizweni lakoIsrayeli; lizakwazi ukuthi ngiyiNkosi uJehova. |
| 10. | Yebo, ngoba beduhisa abantu bami besithi: Kulungile! Khona kungalunganga; kunjengabantu abakha umduli, khangela, lababaprofethi bawucombe ngekalaga engavuthwanga. |
| 11. | Tshela labo abawucombayo ngekalaga ukuthi uzakuwa. Kuzakuba khona impophoma zezulu, kukhithike isiqhotho esikhulu, kuvuke isiphepho somoya; |
| 12. | khangela, nxa umduli lowo ususiwa, kakuyikutshiwo kuwe ukuthi: Kungaphi lokho ababewucomba ngakho? |
| 13. | Ngakho-ke, iNkosi uJehova ithi: Ekuthukutheleni kwami ngizavusa isiphepho somoya, langolaka lwami nginise impophoma zezulu lesiqhotho esikhulu ukuze ngiwudilize. |
| 14. | Ngizadiliza umduli eliwucombe ngekalaga, ngiwuwisele phansi ukuze kwembuleke izisekelo zawo; lekuweni kwawo uzalibulala; lizakwazi ukuthi ngiyi Nkosi. |
| 15. | Ngokunjalo-ke ngizakwehlisela emdulini ulaka lwami laphezu kwalabo abawucomba ngekalaga, besengisithi kuwe: Umduli kawusekho, kanye lalabo abawucombileyo, |
| 16. | abangabaprofethi bakoIsrayeli abaprofetha ngeJerusalema, ababona imibono besithi kulungile, khona kungalunganga, kutsho iNkosi uJehova. |
| 17. | Wena ndodana yomuntu, phendukela kwabesifazana bakini abaprofetha okwengqondo zabo, uprofethe ngabo, |
| 18. | uthi: INkosi uJehova ithi: Maye kwabesifazana abathungela intebe ezihlakaleni zabo bonke abantu, babenzele lezimbombozo zokufaka emakhanda ukuze babathiye. Lizathiya abantu bami, ukuze lisizakale lina yini? |
| 19. | Lingingcolisile phakathi kwabantu bami ngenxa yengcosana nje yebhali, langezihletshana zezinkwa, labulala abantu abangafanelanga ukufa, layekela abantu abangafanelanga ukuphila ngamanga enu ebantwini bami abalalela amanga. |
| 20. | Ngakho iNkosi uJehova ithi: Khangelani, ngimelene lentebe zenu elithiya ngazo abantu; ngizazidabula engalweni zenu, ngiyekele abantu elibathiyileyo njengezinyoni bakhululeke. |
| 21. | Lezimbombozo zenu lazo ngizazidabula, ngikhulule abantu bami ezandleni zenu, lingabe lisaba lamandla okubathiya futhi; lizakwazi ukuthi ngiyi Nkosi. |
| 22. | Ngoba lidabukisile abalungileyo ngamanga, lapho ngingabadabukisanga mina, lakhuthaza ababi ukuze bangaphenduki endleleni zabo ezimbi, basile. |
| 23. | Ngakho kalisayikubona imibono yenkohliso, lenze ukuvumisa; ngizakhulula abantu bami ezandleni zenu. Lizakwazi ukuthi ngiyi Nkosi. |
| ← Ezekiel (13/48) → |