| Ezekiel (1/48) → |
| 1. | Kwathi ngomnyaka wamatshumi amathathu, ngosuku lwesihlanu lwenyanga yesine, lapho ngangiphakathi kwabathunjiweyo emfuleni iKebari, avuleka amazulu, ngabona imibono kaNkulunkulu. |
| 2. | Ngosuku lwesihlanu enyangeni, ngomnyaka wesihlanu wokuthunjwa kwenkosi uJehoyakhini, |
| 3. | ilizwi le Nkosi lafika kimi uHezekeli umpristi, indodana kaBuzi, elizweni lamaKhaladiya emfuleni iKebari. Isandla se Nkosi saba phezu kwami lapho. |
| 4. | Kwathi lapho ngibona, khangela-ke, umoya wesivunguzane ovela enyakatho, leyezi elikhulu elicwazimulayo, lomlilo ovuthayo njalonjalo, phakathi komlilo kwakukhona okungathi lithusi elikhazimulayo. |
| 5. | Phakathi kwalo kwavela umfanekiso wezidalwa ezine eziphilayo. Izimo zazo zazinje, zazifanana labantu, |
| 6. | kodwa yileso laleso silobuso obune lempiko ezine. |
| 7. | Imilenze yazo yayiqondile, lengaphansi yenyawo zazo yayifanana lengaphansi yonyawo lwenkonyana, ecwazimula njengethusi elilolongiweyo. |
| 8. | Zazilezandla zomuntu ngaphansi kwempiko zazo enhlangothini zazo ezine. Izidalwa zozine zazilobuso lempiko. |
| 9. | Impiko zazo zazithintana, zazingatshibiliki ekuhambeni kwazo. Kwaba yileso laleso sahamba saqonda phambili. |
| 10. | Izimo zobuso bazo zazinje; zozine zazilobuso bomuntu ngaphambili, zilobuso besilwane ngakwesokunene. zilobuso benkabi ngakwesokhohlo. zilobuso belinqe ngemuva. |
| 11. | Babunjaloke ubuso bazo. Impiko zazo zazivulekile ngaphezulu. Kuyileso laleso isidalwa silempiko ezine, ezimbili zazithintana lezezinye izidalwa, lezimbili zigubuzele umzimba wazo. |
| 12. | Zaqonda zonke phambili, zaya lapho umoya ozisa khona, zingatshibiliki ekuhambeni kwazo. |
| 13. | Phakathi kwezidalwa eziphilayo kwakukhona okunjengamalahle omlilo ovuthayo, kunjengezihlanti* ezihambahamba phakathi kwazo. Umlilo wawukhazimula, lemlilweni kwakuphuma umbane. |
| 14. | Izidalwa eziphilayo zazigijima zisiya le lale, njengokuphazima kombane. |
| 15. | Ngisabone izidalwa eziphilayo, khangela, amavili ngaphansi, ivili elilodwa liseceleni kwaleso laleso isidalwa. |
| 16. | Amavili ayecwazimula njengelitshe elihle elithiwa yitopazi*, wonke ayefanana; izimo zawo lokusebenza kwawo kwakufanana levili eliphakathi kwevili. |
| 17. | Ekuhambeni kwawo aqonda loba kuluphi lwezinhlangothi zawo zozine, engatshibiliki. |
| 18. | Amavili womane ayephakeme kangangokuthi ayesesabeka, imiphetho yawo yayigcwele amehlo. |
| 19. | Lapho izidalwa eziphilayo zihamba, lamavili ahamba eceleni kwazo; lalapho izidalwa eziphilayo zisuka emhlabathini, lamavili aphakama. |
| 20. | Lapho umoya owawuthanda ukuya khona, zaya khona lazo, lamavili aphakama, ngoba umoya wezidalwa eziphilayo wawusemavilini. |
| 21. | Ekuhambeni kwazo lawo ahamba; ekumeni kwazo lawo ema; ekuphakameni kwazo emhlabeni aphakama lamavili kanye lazo; ngoba umoya wezidalwa eziphilayo wawusemavilini. |
| 22. | Ngaphezu kwamakhanda ezidalwa eziphilayo kwakukhona okunjengomkhathi kucwazimula njengelitshe elihle elithiwa yikristali*, kwendlaliwe ngaphezu kwamakhanda azo. |
| 23. | Ngaphansi komkhathi impiko zazo zazinatshululiwe zithintana, yileso laleso isidalwa silempiko ezimbili ezembese umzimba waso. |
| 24. | Lapho ziphapha, ngezwa umsindo wempiko zazo unjengomdumo wamanzi amanengi, unjengomdumo kaSomandla, unjengokuxokozela kwexuku. Lapho zisima zehlisa impiko zazo, |
| 25. | kodwa kwakuzwakala ilizwi livela emkhathini ongaphezu kwamakhanda azo lalapho sezimi zehlise impiko zazo. |
| 26. | Ngaphezu komkhathi owawuphezu kwamakhanda azo kwakukhona okunjengelitshe elithiwa yisafire*, kunjengesihlalo sobukhosi; ngaphezu kwakho konke kukhona okuhlezi esihlalweni sobukhosi okufanana lomuntu. |
| 27. | Ngabona okunjengethusi okukhanya njengomlilo eziko; kusukela okhaIweni lwakhe kusiya phezulu, kusukela ekhalweni lwakhe kusiya phansi ngabona okunjengomlilo okuvutha indawo zonke. |
| 28. | Ukukhanya lokho okuvuthayo kwakunjengedandili emayezini lapho izulu lisina; kunjengokubonakala kobukhosi be Nkosi. Lapho ngibona lokho, ngathi mbo ngobuso phansi, ngezwa ilizwi likhuluma lami. |
| Ezekiel (1/48) → |