| ← Esther (3/10) → |
| 1. | Emva kwalezizindaba inkosi uAhasuwerusi yamkhulisa uHamani indodana kaHamedatha umAgagi, yamphakamisa, yabeka isihlalo sakhe phezu kwazo zonke iziphathamandla ezazilaye. |
| 2. | Ngakho zonke inceku zenkosi ezazisesangweni lenkosi zakhothama zamkhonza uHamani, ngoba inkosi yayilaye ngokunjalo ngaye. Kodwa uMordekhayi kakhothamanga kakhonzanga. |
| 3. | Izinceku zenkosi ezazisesangweni lenkosi zasezisithi kuMordekhayi: Kungani useqa umlayo wenkosi? |
| 4. | Kwasekusithi zikhuluma laye insuku ngensuku, kodwa engazizwanga, zamtshela uHamani ukuze zibone ukuthi amazwi kaMordekhayi azakuma yini; ngoba wayezitshelile ukuthi ungumJuda. |
| 5. | UHamani esebonile ukuthi uMordekhayi kakhothamanga njalo kakhonzanga kuye, uHamani wagcwala intukuthelo. |
| 6. | Wesedelela emehlweni akhe ukumthela isandla uMordekhayi yedwa, ngoba babemtshelile abantu bakibo kaMordekhayi, ngakho uHamani wadinga ukuchitha wonke amaJuda, ayesembusweni wonke kaAhasuwerusi, abantu bakibo kaMordekhayi. |
| 7. | Ngenyanga yokuqala, eyinyanga uNisani, ngomnyaka wetshumi lambili wenkosi uAhasuwerusi, baphosa iPuri, eliyinkatho, phambi kukaHamani, kusukela esukwini kusiya esukwini, njalo kusukela enyangeni kusiya enyangeni yetshumi lambili, eyinyanga uAdari. |
| 8. | UHamani wasesithi enkosini uAhasuwerusi: Kukhona abantu abathile abahlakazeke basabalala phakathi kwabantu ezigabeni zonke zombuso wakho; lemilayo yabo yehlukile kweyabo bonke abantu, lemilayo yenkosi kabayenzi; ngakho kakufanelanga enkosini ukuthi ibayekele bahlale. |
| 9. | Uba kulungile enkosini, kakubhalwe ukuthi bachithwe, njalo ngizalinganisa amathalenta* esiliva azinkulungwane ezilitshumi ezandleni zabenzi bomsebenzi, ukuze afakwe kokuligugu kwenkosi. |
| 10. | Inkosi yasikhupha indandatho yophawu lwayo esandleni sayo, yayinika uHamani indodana kaHamedatha umAgagi, isitha samaJuda. |
| 11. | Inkosi yasisithi kuHamani: Isiliva usinikiwe, labantu, ukwenza ngabo njengokuhle emehlweni akho. |
| 12. | Kwasekubizwa ababhali benkosi ngenyanga yokuqala ngosuku lwetshumi lantathu lwayo; kwasekubhalwa njengakho konke uHamani ayekulayile, ezikhulwini zenkosi lakubabusi ababephezu kwesigaba lesigaba, lakuziphathamandla zesizwe lesizwe sesigaba lesigaba, njengokombhalo waso, labantu ngabantu ngokolimi lwabo; kwabhalwa ebizweni lenkosi uAhasuwerusi, kwananyathiselwa ngendandatho yophawu lwenkosi. |
| 13. | Incwadi zathunyelwa ngesandla sezigijimi kuzo zonke izigaba zenkosi ukuchitha, ukubulala, lokubhubhisa wonke amaJuda, kusukela komutsha kusiya komdala, abantwanyana labesifazana, ngasuku lunye, ngolwetshumi lantathu lwenyanga yetshumi lambili, eyinyanga uAdari, lokuthi kuphangwe impahla yawo. |
| 14. | Ikhophi yombhalo yokuthi umlayo unikwe kuso sonke isigaba ngesigaba yayisobala kubo bonke abantu ukuze balungele lolosuku. |
| 15. | Izigijimi zaphuma ziphangisiswa yilizwi lenkosi, lomthetho wanikwa eShushani isigodlo. Inkosi loHamani basebehlalela ukunatha, kodwa umuzi iShushani wawusanganisekile. |
| ← Esther (3/10) → |