| ← 2Samuel (3/24) → |
| 1. | Kwakukhona-ke impi isikhathi eside phakathi kwendlu kaSawuli lendlu kaDavida; kodwa uDavida waya eqina, kodwa indlu kaSawuli yaya isiba buthakathaka. |
| 2. | Kwasekuzalelwa uDavida amadodana eHebroni; lezibulo lakhe lalinguAmnoni kaAhinowama umJizereyelikazi; |
| 3. | leyesibili yakhe yayinguKileyabi kaAbigayili umkaNabali umKharmeli; eyesithathu yayinguAbisalomu indodana kaMahaka indodakazi kaTalimayi, inkosi yeGeshuri; |
| 4. | leyesine yayinguAdonija indodana kaHagithi; leyesihlanu yayinguShefathiya indodana kaAbithali; |
| 5. | leyesithupha yayinguIthereyamu kaEgila, umkaDavida. Laba bazalelwa uDavida eHebroni. |
| 6. | Kwasekusithi kuselempi phakathi kwendlu kaSawuli lendlu kaDavida, uAbineri waziqinisa endlini kaSawuli. |
| 7. | Njalo uSawuli wayelomfazi omncane, obizo lakhe lalinguRizipha indodakazi kaAya; uIshiboshethi wasesithi kuAbineri: Ungeneleni emfazini omncane kababa? |
| 8. | UAbineri wasethukuthela kakhulu ngenxa yamazwi kaIshiboshethi, wathi: Ngilikhanda lenja yini, omelana loJuda, lamuhla esenzela indlu kaSawuli uyihlo umusa, kubafowabo, lakubangane bakhe, kangikunikelanga esandleni sikaDavida, ukuthi ungibeka icala ngowesifazana lamuhla? |
| 9. | UNkulunkulu enze njalo kuAbineri, engezelele ngokunjalo kuye, ngeqiniso, njengoba i Nkosi ifungile kuDavida, qotho, ngizakwenza njalo kuye, |
| 10. | ukudlulisa umbuso usuka endlini kaSawuli, lokumisa isihlalo sobukhosi sikaDavida phezu kukaIsrayeli laphezu kukaJuda, kusukela koDani kuze kufike eBherishebha. |
| 11. | Njalo wayengelakumphendula uAbineri ngalizwi futhi, ngoba wayemesaba. |
| 12. | UAbineri wasethuma izithunywa kuDavida esikhundleni sakhe, esithi: Ngelikabani ilizwe? Esithi: Yenza isivumelwano sakho lami; khangela-ke, isandla sami sizakuba lawe ukuphendulela uIsrayeli wonke kuwe. |
| 13. | Wasesithi: Kulungile; mina ngizakwenza isivumelwano lawe, kodwa yinye into engiyifuna kuwe, ngeyokuthi kawuyikubona ubuso bami, ngaphandle kokuthi ulethe kuqala uMikhali indodakazi kaSawuli, lapho usizabona ubuso bami. |
| 14. | UDavida wasethuma izithunywa kuIshiboshethi indodana kaSawuli, esithi: Ngi nika umkami uMikhali engamgana ngamajwabu alikhulu amaFilisti. |
| 15. | UIshiboshethi wasethumela, wamthatha endodeni yakhe, kuPalitiyeli indodana kaLayishi. |
| 16. | Kodwa indoda yakhe yahamba laye, ihamba ikhala inyembezi ngemva kwakhe kwaze kwaba seBahurimi. UAbineri wasesithi kuyo: Hamba, buyela. Yasibuyela. |
| 17. | UAbineri wasesiba lenkulumo labadala bakoIsrayeli esithi: Ngezikhathi ezidlulileyo lalifuna uDavida ukuthi abe yinkosi phezu kwenu. |
| 18. | Khathesi-ke, kw enzeni, ngoba i Nkosi ikhulumile kuDavida ukuthi: Ngesandla senceku yami uDavida ngizakhulula abantu bami uIsrayeli esandleni samaFilisti lesandleni sazo zonke izitha zabo. |
| 19. | UAbineri wasekhuluma futhi endlebeni zakoBhenjamini; uAbineri njalo wasesiyakhuluma endlebeni zikaDavida eHebroni konke okwakukuhle emehlweni akoIsrayeli lemehlweni endlu yonke yakoBhenjamini. |
| 20. | Ngakho uAbineri wafika kuDavida eHebroni elamadoda angamatshumi amabili; uDavida wasesenzela uAbineri lamadoda ayelaye idili. |
| 21. | UAbineri wasesithi kuDavida: Ngizasukuma ngihambe, ngibuthanise uIsrayeli wonke enkosini yami, inkosi, ukuze benze isivumelwano lawe, lokuthi ubuse kukho konke umphefumulo wakho okufisayo. UDavida waseyekela uAbineri ukuthi ahambe, wasehamba ngokuthula. |
| 22. | Khangela-ke, izinceku zikaDavida loJowabi bafika bevela ekuhlaseleni beza belempango enkulu. Kodwa uAbineri wayengekho kuDavida eHebroni, ngoba wayemyekele ukuthi ahambe, wahamba ngokuthula. |
| 23. | Esefikile uJowabi lebutho lonke elalilaye, bamtshela uJowabi besithi: UAbineri indodana kaNeri ubefikile enkosini, imyekele wahamba, wahamba ngokuthula. |
| 24. | UJowabi wasesiya enkosini, wathi: Wenzeni? Khangela, uAbineri ubefikile kuwe; pho, umyekeleleni ukuthi ahambe, wahamba lokuhamba? |
| 25. | Uyamazi uAbineri indodana kaNeri ukuthi ulande ukukukhohlisa, lokwazi ukuphuma kwakho lokungena kwakho, lokwazi konke okwenzayo. |
| 26. | Esephumile uJowabi kuDavida wathuma izithunywa ukulandela uAbineri, ezambuyisa emthonjeni weSira; kodwa uDavida wayenga kw azi lokho. |
| 27. | UAbineri esebuyile eHebroni, uJowabi wamphambulela eceleni phakathi kwesango ukuze akhulume laye ngasese; wasemtshaya lapho kubambo lwesihlanu waze wafa, ngenxa yegazi likaAsaheli umfowabo. |
| 28. | Kwathi uDavida esekuzwile emva kwalokho wathi: Mina lombuso wami kasilacala phambi kwe Nkosi kuze kube nininini ngegazi likaAbineri indodana kaNeri. |
| 29. | Kalihlale phezu kwekhanda likaJowabi lendlini yonke kayise. Kakungaqunywa endlini kaJowabi ogobhozayo, kumbe umlephero, kumbe odondolozelayo, kumbe owa ngenkemba, kumbe oswela ukudla. |
| 30. | Ngokunjalo uJowabi loAbishayi umfowabo bambulala uAbineri, ngoba wayebulele umfowabo uAsaheli eGibeyoni empini. |
| 31. | UDavida wasesithi kuJowabi lakubo bonke abantu ababelaye: Dabulani izigqoko zenu, libhince amalembu amasaka, lilile phambi kukaAbineri. Inkosi uDavida yasilandela ithala. |
| 32. | UAbineri basebemngcwabela eHebroni; inkosi yasiphakamisa ilizwi layo yakhala inyembezi engcwabeni likaAbineri, labantu bonke bakhala inyembezi. |
| 33. | Inkosi yamenzela uAbineri isililo yathi: Afe uAbineri njengokufa kwesithutha yini? |
| 34. | Izandla zakho bezingabotshwanga, lenyawo zakho bezingafakwanga emaketaneni; njengowela phambi kwabantu ababi uwile. Bonke abantu basebephinda bemkhalela inyembezi. |
| 35. | Bonke abantu basebesiza ukumenza uDavida ukuthi adle ukudla kusesemini; kodwa uDavida wafunga esithi: Kenze njalo uNkulunkulu kimi engezelele ngokunjalo, uba nginambitha ukudla loba okunye nje lingakatshoni ilanga. |
| 36. | Kwathi bonke abantu bekunanzelela, kwaba kuhle emehlweni abo; njengakho konke eyakwenzayo inkosi, kwaba kuhle emehlweni abo bonke abantu. |
| 37. | Ngoba bonke abantu loIsrayeli wonke bazi ngalolosuku ukuthi kwakungeyisikho okwenkosi ukubulala uAbineri indodana kaNeri. |
| 38. | Inkosi yasisithi encekwini zayo: Kalazi yini ukuthi kuwe induna lomkhulu koIsrayeli lamuhla? |
| 39. | Lami lamuhla ngibuthakathaka, njalo ngigcotshwe ngaba yinkosi; lalamadoda, amadodana kaZeruya, alukhuni kulami. I Nkosi izavuza umenzi wobubi njengobubi bakhe. |
| ← 2Samuel (3/24) → |