←  Ruth (3/4)  →
1. Tin, a pi Naomi chuan a hnenah, "Ka fanu, i tana tha tur khawsakna ka zawnsak dawn lawm che ni?
2. Kan laichinpa Boaza, a chhiahhlawh nulate nena hna i va thawhna kha a awm a ni lo'm ni? Ngai teh, zaninah hian barli hruiah a zap fai dawn a.
3. Chutichuan, inbual la, inthih la, i incheina puan sin la, hruiah chuan zuk kal rawh; amaherawhchu chawte a eia a in zawh hma loh chuan a hnenah inhriattir hauh suh ang che.
4. Tin, heti hi a ni ang a, a mut hunah chuan a mutna chu chhinchiah la, tin, lut la, a ke hlim la, mu rawh; tin, ani chuan i tih tur chu a lo hrilh ang che," a ti a.
5. Tin, ani chuan a hnenah, "I sawi apiang chu ka ti ang e," a ti a,
6. Tichuan hruiah chuan a zuk kal a, a piin a hrilh ang apiang chuan a ti a,
7. Tin, Boaza chuan chaw a ei a, a in zawh chuan a rilru a lo hlim ta em em a, buh vum bulah chuan mu turin a kal ta a; tin, zawitein a va kal a, a ke chu a hlim a, a mu ve ta a.
8. Tin, heti hi a ni a, zanlai chuan chu pa chuan a hlau a, lehlam a hawi a; tin, ngai teh, a ke bulah chuan hmeichhia a lo mu reng mai a.
9. Tin, ani chuan, "Tunge i nih?" a ti a. Ani chuan, "I chhiahhlawhnu Ruthi ka ni; chutichuan i chiahhlawh hi i puan mi han zawn rawh, ka laichin bul i ni si a," a ti a.
10. Tin, ani chuan, "Ka fanu, Lalpain malsawm che rawh se: tlangval rethei emaw, hausa emaw i zui loh danah hian a tir ai mahin a hnu lamah hian thatna i tilang nasa ta zawk a
11. Chutichuan ka fanu, hlau suh aw; i sawi ang zelin i chungah ka ti ang: kan khuaa mi zawng zawngte hian hmeichhe fel tak i ni tih an hre vek si a.
12. Tin, laichin inhnai kan ni ngei mai a, amaherawhchu keimah aia hnai zawk a awm a.
13. Zanin chu awm phawt la, naktuk zingah chuan i chungah ani chuan a laichin tih tur a tih duh chuan a tha a ni ang a; laichin pual chu ti ang hmiang: amaherawhchu laichin tih tur i chunga a tih duh loh chuan, laichin tih tur chu LALPA a nung ngei ang hian keima'n ka ti ngei ngei ang: zing thlengin mu reng mai rawh," a ti a.
14. Tichuan zing thlengin a ke bulah chuan a mu ta a: tin, tumah la inhmuh chian theih hmain a tho va "Hruiah chuan hmeichhia chu a lo kal tih reng reng tumahin hre suh se," a ti reng a.
15. Tin, a hnenah, "I puan bah kha han la la, dawh rawh," a ti a; tichuan a dawh a; tin, barli hu tehkhawng rukin a teh a, a chhung a, tin, khuaah a kal ta a.
16. Tin, a pi hnen a han thlen chuan, "Ka fanu, eng nge i an le?" a lo ti a. Tin, ani chuan chu pain a chunga thil a lo tih zawng zawng chu a hrilh a.
17. "He barli tehkhawng ruk hi min pe a, 'I pi hnenah chuan kutbengin haw hauh suh ang che,' min ti a ni," a ti a.Tin, ani chuan, "Ka fanu, eng angin nge thil a lo awm dawn i hriat hma loh chuan awm mai rawh: vawiin nia he thil hi a tih zawh hma loh chuan chu pa chu a ngawi mai dawn si lo a," a ti a.
18. Tin, ani chuan, "Ka fanu, eng angin nge thil a lo awm dawn i hriat hma loh chuan awm mai rawh: vawiin nia he thil hi a tih zawh hma loh chuan chu pa chu a ngawi mai dawn si lo a," a ti a.
←  Ruth (3/4)  →