←  Romans (8/16)  →
1. Chutichuan tunah zawng Krista Isuaa awmte tan chuan thiam loh chantirna reng a awm tawh lo.
2. Krista Isuaa Nunna Thlarau dan chuan sualna leh thihna dan ata chu mi tichhuak tawh si a.
3. Tisa avanga Dan chu a chak loh a, a tih theih rual loh chu Pathianin ama fapa ngei, tisa sual ang puin, sual thawina'n rawn tirin, tisaa sualna awm chu thiam loh a chantir ta a ni;
4. tisa dan zawh loa Thlarau dan zawh zawktu keimahniah hian Dan thu ruat chu hlena a awm theihna turin.
5. Tisa dana awmte chuan tisa lam thilte an duh thin; Thlarau dana awmte erawh chuan Thlarau lam thilte an duh thin.
6. Tisa lamthilte duh chu thihna a ni si a, Thlarau lam thil duh erawh chu nunna leh thlamuanna a ni;
7. tisa duhzawng chu Pathian dona a nih avangin. Chu chu Pathian danin a awm si lo a, awm pawh a awm thei bawk hek lo a ni.
8. Chutichuan tisaa awmte chuan Pathian an tilawm thei lo.
9. Nimahsela Pathian Thlarau nangmahnia a awm tak zet chuan tisaa awm in ni lo a, Thlarauva awm in ni zawk e. Amaherawhchu tupawh Krista Thlarau nei lo chu amaha mi a ni lo.
10. Krista chu nangmahnia a awm si chuan sualna avangin taksa a thi a ni; thlarau erawh chu felna avangin nunna a ni.
11. Nimahsela mitthi zing ata Isua titho lehtua Thlarau chu nangmahnia a awm chuan, mitthi zing ata Krista Isua titho lehtu khan, nangmahnia awm Thlarau zarah chuan in taksa thi theite chu a tinung bawk ang.
12. Chuvangin unaute u, bat kan nei; tisa dana awm turin tisa lakah erawh chuan a ni lo.
13. Tisa dana in awm chuan in thi ngei tur a ni; amaherawhchu taksa thiltihte Thlarauva in tihhlum thin chuan in nung ang.
14. Pathian Thlarau hruaia awm apiangte chu Pathian fate an ni si a.
15. Hlauva awm leh turin bawih nihna thlarau inhmu a ni si lo a; fa nihna thlarau inhmu a ni zawk e, chu thlarau avang chuan "Abba!(Ka pa!)" tiin kan au thin hi.
16. Thlarau ngei chuan keimahni thlarau nen Pathian fate kan ni tih min hriattir thin;
17. tin, fate kan nih chuan roluahtute kan ni a; Pathian roluahtu, Krista luahpuitute kan ni; a hnena chawimawiin kan awm ve theihna turin amah kan tuarpui tak zet chuan.
18. Tun laia tuarnate hi nakina kan chunga ropuina tihlan tur nen chuan tehkhin thamah ka ruat si lo.
19. Thil siam zawng zawngte chuan beisei em emin, Pathian fate lo lanna chu an nghakhlel hle si.
20. Thil siam zawng zawngte chu thil lawilo thu thua awmtirin an awm tawh (an duha awm an ni lo a, a awmtirtu avang a ni zawk e); beiseina neiin,
21. thil siam zawng zawngte ngei pawh chu chhiatna bawih ata tihchhuahin an awm ang a, Pathian fate zalenna ropuiah chuan an lut dawn si a.
22. Thil siam zawng zawngte chu tun thlengin rum leh nauvei na tuarin an awmhlawm tih kan hre si a.
23. Chu chang a ni lo, keini ngei pawh, Thlarau hmahruai neitute hian, fa kan nihna (kan taksa tlanna chu) nghakin, keini meuh pawh kan rilruin kan rum bawk si.
24. Beiseinain a ni, chhandamin kan awm ni; nimahsela hmuh theih reng beiseina hi beiseina a ni lo e. Miin a hmuh theih reng chu engati nge a la beisei thin?
25. Kan hmuh loh chu kan beisei erawh chuan kan nghak fan fan thin a ni.
26. Chutiang bawkin Thlarau chuan kan chak lohnate a pui thin a; engtia tawngtai tur nge tih kan hre si lo a; nimahsela Thlarau chuan rum sawi hleih theih loin min tawngtaisak thin.
27. Tin, Pathian duhzawng ang zelin mi thianghlimte chu a tawngtaisak thin avangin rilrute Entu chuan Thlarau duhzawng chu a hre thin a ni.
28. Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria;
29. a hriat lawkate chu ama Fapa ang taka awm turin a ruat lawk si a, a Fapa chu unau tam takte zinga fa tir a lo nih theihna'n.
30. Tin, a ruat lawkate chu a ko bawk a; tin, a kohvate chu thiam a chantir bawk a, tin, thiam a chantirate chu a chawimawi bawk a.
31. Chung thuah chuan eng nge kan sawi ang le? Pathian kan lama a tan chuan tuin nge min do thei ang?
32. Ama Fapa ngei pawh zuah lo a, kan zaa aia petu chuan thil zawng zawng pawh athlawnin min pe tel lo va ngem ni?
33. Pathian mi thlante chu tuin nge hek ang? Thiam chantirtu kha Pathian a ni si a.
34. Tuin nge thiam loh chantir ang? Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni.
35. Krista hmangaihna ata chu tuin nge min then ang? Hrehawmnain emaw, lungngaihnain emaw, tihduhdahnain emaw, tamin emaw, saruaknain emaw, hlauhawmnain emaw, khandaihin emaw min then ang em ni?
36. "Nangmah avangin nilengin thahin kan awm thin; beram talh turte anga ngaih kan ni," tih ziak ang khan.
37. Then suh e, chung zawng zawngah chuan min hmangaihtu avang chuan, ropui taka ngamtu kan ni.
38. Thihna te, nunna te, vantirhkoh te, lalna te, thil awm sa te, thil lo la awm tur te,thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lo ang tih dik takin ka hre si a.
39. thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lo ang tih dik takin ka hre si a.
←  Romans (8/16)  →