←  Romans (7/16)  →
1. A nih leh, unaute u, dan chuanin mi a dam chhung zawng a chungah ro a rel thin tih in hre lo em ni? (dan hre mite hnenah ka sawi a nih hi).
2. Hmeichhe pasal nei chu a pasal dam chhung zawng danin a pasalah phuar belhbawmin a awm thin; nimahsela a pasal chu a thih chuan, pasal kawngah dan ata chu thlahin a awm thin.
3. Chutichuan a pasal dam chhunga mi dang a neih chuan, "Uirenu" an ti ang; a pasal a thih erawh chuan chu dan ata chu thlahin a awm a, chutichun mi dang nei mah se la uire a ni lo.
4. Chutichuan ka unaute u, mi dang (Pathian lama kan rah theihna turin mitthi zing ata kaihthawha ngei kha) in neih theihna'n, Krista taksa avangin Dan kawngah tihthihin in lo awm ta a.
5. Tisaa kan awm lai khan, Dan avanga duhzawng sual lo chhuakte chuan kan taksa pengahte, thihna khawpa rah turin a thawk thin.
6. Tunah erawh chuan min chelhtu lakah thi tawhin, Dan ata thlahin kan awm ta, lehkha ziak hlui ang mai ni lo a, thlarau thara rawng kan bawl theihna'n.
7. Engnge kan sawi tak ang le? Dan chu sual em ni? Hnai lo e. Nimahsela Dan avanga hriat ni suh se la chu sual ka hre lo tur; Dan chuan, "Awt suh," ti suh se la chu awh hi ka hre lo tur a ni.
8. Nimahsela sualnain, thupek avang chuan remchan lai hmuin, awhna tinreng ka chungah a awmtir a. Dan lo chuan sualna chu thi a ni.
9. Tin, hmanah khan kei dan loin ka nung a; nimahsela thupek chu a lo awm veleh sual a lo harh a, kei chu ka thi ta a.
10. Tin, nunna tura thupek chu thihna tur a lo ni tih ka lo hre ta a;
11. sualnain thupek avang chuan remchan lai hmuin mi bum a, thupek chu hmangin mi tihlum ta a ni.
12. Chutichuan Dan chu a thianghlim a ni, thupek pawh chu a thianghlim a, a fel a, a tha a ni.
13. A nih leh, thil tha chu ka tan thihna a lo ni em ni? Hnai lo e. Sualna chu ka tan thihna a lo ni ta zawk a ni, chutichuan sualna chu sualna a ni tih a lan theihna'n thil tha chu hmangin mi tihlum a ni; sualna chu (thupek avang khan) sual nasa tak a lo nih theihna turin.
14. Dan chu thlarau lam thil a ni tih kan hre si a; kei erawh chu tisa lama mi, sual bawiha hralh tawh ka ni.
15. Thil ka tih hi a ngaihna ka hre si lo; ka thiltih thin hi, ka thiltih duhzawng a ni si lo, ka thil huatzawng tak chu ka ti zawk thin a ni.
16. Ka tih duh lohzawng chu ka tih si chuan, Dan chu a tha tia awih ka ni ang a sin.
17. Chutichuan ka thiltih hi keima tih a ni tawh lo a, sual keimaha awm tih chu a ni zawk.
18. Keimahah (chu chu ka tisaah tihna a ni) thil tha reng a awm lo tih ka hria; thil tha tih duhna chu keimahah a awm na a, thil tha tihna erawh chu a awm si lo.
19. Thatna tih ka duh hi ka ti lo a; sualna tih ka duh loh hi ka ti zawk si thin a.
20. Ka duh lohzawng chu ka tih si chuan a titu chu kei ka ni tawh lo a, sual keimaha awm chu a ni zawk e.
21. Chutichuan he dan hi ka lo hre ta: thil tha tih ka duh laiin sualna ka hnenah a lo awm thin a ni.
22. Ka rilru tak takin Pathian dan chungah ka lawm si thin a;
23. nimahsela ka taksa pengahte hian dan danglam a awm tih ka hria, chu chuan ka rilru dan a do a, ka taksa pengtea sualna dan awm hnenah chuan salah mi hruai thin a.
24. Mi rethei ka va ni tehlul em! He thihna taksa lakah hian tuin nge mi chhan chhuak ang?Isua Krista kan Lalpa avangin Pathian hnenah lawmthu ka sawi a ni. Chutichuan keimah tak chuan ka rilru chuanin Pathian dan rawng ka bawl thin, ka tisa erawh chuan sualna dan rawng ka bawl thin.
25. Isua Krista kan Lalpa avangin Pathian hnenah lawmthu ka sawi a ni. Chutichuan keimah tak chuan ka rilru chuanin Pathian dan rawng ka bawl thin, ka tisa erawh chuan sualna dan rawng ka bawl thin.
←  Romans (7/16)  →