Romans (6/16)  

1. Engnge kan sawi tak ang le? Khawngaihna chu a pun lehzual theihna'n sualin kan awm reng dawn em ni?
2. Hnai lo e. Keini sual kawnga thi tawh sualin engtin nge kan la nun theih cheu vang?
3. Keini zingah Krista Isuaa baptisma chang apiangte chu a thihnaah baptisin kn awm tih in hrelo emaw ni.
4. Chuvangin a thihnaah baptisma kanchanin, a hnena phum vein kan awm; Pa ropuinain mitthi zing ata Krista a kaihthawh ang khan, keini pawh nunna tharin kan awm theihna'n.
5. A thihna anpuiin amah nen kan inzawm tawh si chuan a thawhlehna anpui pawhin kan inzawm bawk ang.
6. Heng hi hria i la: kan mihring hlui chu a hnenah khenbehin a awm ve ta, sual pu taksa chu tihborala a awm theihna'n, tun achinah sual bawiha kan awm lohna turin.
7. Tupawh thi tawh chu sual lakah a chhuak tawh si a.
8. Tin, Krista hnena kan thih ve tawh chuan a hnenah kan nung ve bawk ang tih kan ring a ni;
9. Krista chu mitthi zing ata kaihthawhin a awm a, a thi leh dawn tawh lo tih kan hre si a; thihna chuan ama chungah thu a nei tawh lo.
10. A thihna chu sual lam kawngah chatuan atan vawi khat chauh a thi a ni, a nunna erawh chu Pathian lam kawngah a nung a ni.
11. Chutiang bawkin nangni pawh sual lam kawngah thi tawhah inruat u la, Pathian lam kawngah erawh chuan Krista Isuaah nungah inruat rawh u.
12. Chuvangin in taksa duhzawng in zawmna turin, intaksa thi theiah chuan sualnain ro rel suh se.
13. In taksa pengte pawh fel lohna hriamhrei atan sualna hnenah pe phal hek suh u; amaherawhchu mitthi zing ata nung leh angin Pathian hnenah inpe ula, in taksa pengte pawh chu felna hriamhrei atan Pathian hnenah pe phal zawk rawh u.
14. Sualnain in chungah thu a nei dawn tawh si lo, dan rorela awm in ni lo a, khawngaihna rorela awm in ni zawk si a.
15. Engtin nge ni ang le? Dan rorela awm kan nih loh a, khawngaihna rorela awm kan nih zawk avang hian kan sual tur em ni ang?Hnai lo e.
16. Tu hnenah pawh an thu awih tura bawiha in luh chuan (thihna khawpa sual bawih emaw, felna khawpa thu awih bawih emaw), a thu in awiha bawih chu in ni tih in hre lo em ni?
17. Amaherawhchu sual bawihte ni mah u la, zirtir dan a hnena in inpekna chu rilru tak zetin in lo awih a;
18. tin, sual lak ata chhuahin in awm a, felna bawihte in lo ni ta a; chuvangin Pathian hnenah lawmthu awm rawh se;
19. (in tisa chak lohzia avangin mihring danin thu ka sawi a ni e) in taksa pengte chu bawlhhlawhna hnenah leh, bawhchhiatna turin bawhchhiatna hnenah bawiha in pe phal ang khan, tunah in taksa pengte chu thianghlimna turin felna hnenah bawihah pe phal rawh u.
20. Sual bawihte in nih lai khan felna lakah in fihlim a ni.
21. Tuna in thil zahpui takahte hian, khang lai khan rah eng nge in lo hmuh thin le? Khang thil tawpna kha thihna a ni thin a sin.
22. Tunah erawh chuan sual lakah tihfihlima awma Pathian bawihte in lo nihin, thianghlimna hmu khawpin in rah in nei a sin, chu mi tawpna - chatuana nunna nen,Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni.
23. Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni.

  Romans (6/16)