←  Romans (5/16)  →
1. Chuvangin rinna avanga thiam changa awmin, kan Lalpa Isua Krista avangin Pathian nen inremin i awm ang u;
2. amah avang vek chuan he khawngaihna kan din nghehnaah hian rinnain kan lut ta a; Pathian ropuina beiseiin lawmin i awm bawk ang u.
3. Tin, chuti chauh chu ni loin, kan hrehawmnaah pawh lawmin i awm ang u, hrehawmna chuan chhelna a siam a,
4. chhelna chuan hriatfiahna a siam a, hriatfiahna chuan beiseina a siam tih kan hre si a;
5. tin, Thlarau Thianghlim kan hnena min pek khan Pathian hmangaihna chu kan thinlunga a leih tawh avangin beiseina chuan a timualpho lo a.
6. Kan la chak loh lai khan, a hun tein Krista chu mi sualte ai chuan a lo thi ta si.
7. Mi fel aia thih miin a duh awm lo hle si a, mi tha ai erawh chuan mi tu emaw tal chuan thih a ngam mial mahna.
8. Nimahsela Pathian chuan a mi hmangaihna chu fak tlakin a lantir a, mi sualte kan la nih laia Krista kan aia a thih avng khan.
9. Chutichuan a thisena thiam chantira kan awm tawh hnu hian, amah avangin Pathian thinurna lak ata chu chhandamin kan awm ngei ang.
10. Hmelma kan nih lai maha a Fapa thihna avanga Pathian nena lo inrem tawh kan nih si chuan, inrema kan awm tawh hnu hian a nunna avangin chhandamin kan awm ngei ang.
11. Chuti chauh pawh a ni lo a, inremna tuna min hmuhtirtu kan Lalpa Isua Krista avang chuan Pathianah kan lawm bawk a ni.
12. Chutichuan mi pakhat avangin sual khawvelah a lut a, sual avangin thihna a lut bawk a, chutiang bawkin mi zawng zawngin thil an lo tihsual avangin thihnain mi zawng zawng a fan chhuak ta a.
13. Dan awm hmain khawvelah sual a awm tawh si a; dan a awm si loh chuan sual chu suala ngaih a ni lo;
14. nimahsela Adama awm achin Mosia awm thlengin, Adama bawhchhiatna anga thil tisual lote chungah pawh thihna chuan ro a rel thin. Adama chu lo la kal tura nen tehkhinna a ni.
15. Nimahsela thilthlawnpek chu sualna nen a inang lo bawk. Mi pakhat sual avang mah khan mi tam tak chu an thih si chuan, Pathian khawngaihna leh mi pakhat Isua Krista khawngaihna avanga thilpek chu mi tam tak chungah vurin a awm ngei ang.
16. Tin, thilpek chu mi pakhat sual avanga thil lo awm nen a inang hek lo; thiam loh chantirna rorelna chu mi pakhat avangin a lo awm a, thiam chantirna thilthlawnpek erawh chu, sual tam tak avangin a lo awm ta zawk si a.
17. Mi pakhat sual avnga thihnain, chu mi pakhat avang maha ro a rel si chuan khawngaihna nasa tk leh felna thilpek hmutute chuan, mi pakhat (Isua Krista) avang khan nunnaah chuan ro an rel ngei ang.
18. Chutichuan sual pakhat avangin thiam loh chantirna rorelna chu mi zawng zawng chungah a lo awm a; chutiang bawkin thil fel pakhat tih avangin nunna hmuhna'n thiam chantirna thilthlawnpek chu mi zawng zawng chungah a lo awm.
19. Mi pakhat tihmawh avang khan mi tam tak chu mi sual an lo ni ta a; chutiang bawkin mi pakhat a tihawih avang khan mi tam tak chu mi fel an lo ni ang.
20. Tin, sual a lan lehzual theihna'n Dan a lo awm leh nghal a. Nimahsela sual a punna apiangah khawngaihna chu a pung lehzual thin;sual chuan thihnain ro a rel ang takin, khawngaihna chuan felnain, chatuan nun channa khawp hialin kan Lalpa Isua Krista zara, ro a rel theihna'n.
21. sual chuan thihnain ro a rel ang takin, khawngaihna chuan felnain, chatuan nun channa khawp hialin kan Lalpa Isua Krista zara, ro a rel theihna'n.
←  Romans (5/16)  →