Revelation (17/22)  

1. Tin, vantirhkoh pasarih, berhbu pasarih kengte zinga pakhat chuan mi bia a, "Hawh teh, tui tam taka thu nawhchizuar ropui tak hremna chu ka entir ang che;
2. leia lalte chuan ani chu an ngai thin a, leia awmte pawh chu a mi ngaih chinna uain chuan hrai ruihin an awm thin," a ti a.
3. Chutichuan, ani chuan Thlarauin thlalerah mi kalpui a; tin, Pathian sawichhiatna hminga khat, lu sarih leh ki sawm nei, sakawlh sen tak chunga chuang hmeichhia ka hmu a.
4. Chu hmeichhia chuan puan senduk leh sen lar a sin a, rangkachak leh lung man tam leh tuikeplungin a inchei a, rangkachak no, thil tenawm, a mi ngaih chinna thil bawlhhlawha khat a keng a,
5. a chalah chuan thuruk, "Babulon Khaw Ropui, Leia Nawhchizuarte leh Thil Tenawmte Nu," tia hming ziak a awm a.
6. Tin, chu hmeichhia chu mi thianghlimte thisen leh Isua martarho thisena rui ka hmu a. Ka hmuh veleh mak ka ti em em mai a.
7. Tichuan, vantirhkoh chuan ka hnenah,"Eng vangin nge mak i tih kha? Hmeichhia leh a phurtu sakawlh, lu sarih leh ki sawm nei thuruk chu ka hrilh ang che.
8. Sakawlh i hmuh kha a awm tawh zet a, a awm leh ta lo a; tin, leilawt atangin a lo chhuak chho ang a, boralnaah a kal ang. Tin, leia awmte, leilung pian tirh ata Nunna Bua hming ziak lohte chuan, sakawlh chu an hmuh hunah a awm tawh zet a, a awm leh ta lo a, a lo kal leh dawn chu mak an la ti ang.
9. Hetah hian fin thiam a tulzia a lang. Lu sarihte chu hmeichhe thutna tlang sarihte chu an ni.
10. Lal pasarih pawh an ni a; pangate chu an tlawm ta a, pakhat chu a la awm a, pakhat chu a lo la awm rih lo a;a lo awm hunah chuan rei lo te a awm tur a ni.
11. Tin, sakawlh awm tawh zet a, awm leh ta loa ngei pawh kha a pariatna a ni a, pasarihte zinga mi kha a ni nghe nghe a, boralnaah a la kal ang.
12. Tin, ki sawm i hmuhte kha lal sawm, ram la nei lote an ni a; darkar khat chhung erawh chu sakawlh nen lal thuneihna an la chang ang.
13. Chung chuan thu khat vuain an thiltihtheihna leh thuneihna chu sakawlh an pe ang.
14. Chung chuan Beram No chu an do ang a, tin, Beram No chu hotute Hotu leh lalte Lal a nih avangin anni chu a hneh ang a; tin, a hnena awm, koha te, thlana te, rinawma te chuan an hneh bawk ang," a ti a.
15. Tin, amah vek chuan ka hnenah, "Nawhchizuar thutna tui i hmuhte kha, mi te, mipui te, hnam te, tawng te a ni a.
16. Ki sawm i hmuh leh sakawlh ngei chuan nawhchizuar chu an hua ang a, engmah nei lo leh saruakin an siam ang a,a sa pawh an ei ang a, meiin an halral ang.
17. Pathian thute chu a thlen hma loh chuan a duhzawng an tihna tur leh, thu khat an lo vuakna tur leh, an ram chu sakawlh hnenah an pekna turin Pathianin an thinlungah a tir si a.Tin, i hmeichhe hmuh kha khaw ropui, leia lalte chunga roreltu chu a ni," a ti a.
18. Tin, i hmeichhe hmuh kha khaw ropui, leia lalte chunga roreltu chu a ni," a ti a.

  Revelation (17/22)