←  Proverbs (5/31)  →
1. Ka fapa, ka finna ngaithla la, ka hriatnaah i beng dawh rawh,
2. Ngaihruat thiamna i vawn a, i leiin hriatna a vawn theihna'n.
3. Hmeichhe sual hmui ata khawizu a far a, a hmui chu hriak aiin a nal si;
4. A tawpna erawh chu sai angin a kha a, khandaih hriam tawn angin a hriam.
5. A ke chu thihnaah a chhuk a, a ke penin Seol lam a pan.
6. Chutichuan nunna kawng rualrem a hmu lo a, a kawngte chu a nghet lo a, a hre si lo.
7. Chuvangin ka fapate u, ka thu ngaithla u la, ka kaa thu hi hawisan teh suh u khai.
8. I kawng chu a hnen ata sawn daih la, a kawngka va hnaih suh.
9. Chutilochuan i ropuina chu mi dang a pe ang a, i kumte chu mi nun chhia i pe dah ang a,
10. Ram dang mite chu i thahruiin i titlai ang a, i thawhrimna chu hmel hriat loh inah a awm dah ang e.
11. Tin, i tisa leh i taksa a ral hunin i hun tawp lamah chuan i tap ang a,
12. "Engtiziaa zirtirna chu ka lo huat a, ka thinlungin zilhhauna chu lo ngainep nge maw ni aw?
13. Mi zritrtu thu lah ka lo awi ta hek lo a, mi zirtirtute chungah ka beng ka lo dawh ta bawk hek lo;
14. 'Mipuite leh pungkhawmho zingah chuan ka lo thih teuh hle chu le!' i la ti ang.
15. Nangma tuibel ata tui in la, nangma tuichhunchhuaha tui thar lam chu.
16. I tuihalnate chu ram tina luang darhin kawtthlerahte lui tui a luang dawn em ni?
17. I tan chauh ni se la, ram dang mite tawmpui lohin.
18. I tuichhunchhuah chu malsawmin awm se la, i tleirawl lai nupuiah chuan hlim rawh.
19. Zukpui duhawm tak leh zukchal nalh tak angin englai pawhin a tang chhung chuan tilungawi fo che se la, a hmangaihnaah chuan lawm fo rawh.
20. Enga tan nge nang, ka fapa chuan hmeichhe sual i lawm ang a, a tang i pawm ang?
21. Mihring kawngte chu LALPA mithmuhah a awm a, a kawng zawng zawng a tihrualremsak thin.
22. Ama khawlohna ngeiin mi suaksual chu a man ang a, a sualna hruizena thlunin a awm ang.Zirtirna tlakchham vangin a thi ang a, a at em vangin a bo ang.
23. Zirtirna tlakchham vangin a thi ang a, a at em vangin a bo ang.
←  Proverbs (5/31)  →