←  Proverbs (30/31)  →
1. Jakeha fapa Agura thute: thufing chu. Miin Ethiela hnenah, Ethiela leh Ukala hnenah heti hian a ti.
2. Mi ahluanah ka mawl ber a, mihringin hriatthiamna an neih hi ka nei lo a:
3. Finna ka zir lo a, mi thianghlima hriatna ka nei hek lo.
4. Tu nge ni vana chho tawh a, lo chhuk leha chu? Tu nge ni a kuta thli hum khawmtu chu? Tu nge ni a puana tui funtu chu? Tu nge ni kawlkil zawng zawngte tinghet? Tu nge ni a hming, tu nge ni a fapa hming pawh i hria em?
5. LALPA thu zawng zawng chu fiah a ni tawh, amah ringtu zawng zawngte tan ani chu phaw a ni.
6. A thute chu belhchhah suh, chutilochuan a lai lang ang chia, dawthei i lo ni dah ang e.
7. Thil pahnih ka dil chia, ka thih hmain rem ti lul ang che.
8. Thil lawi lo leh dawtte chu mi tihsawnsak daih ang che. Pachhiatna emaw, neihnunna emaw mi pe hek suh. Ka tana mamawh chawin min chawm rawh.
9. Chutilochuan ka tlaipuar ang a, ka phat ang chia, LALPA chu tu nge ni? Ka ti dah ang e; a nih loh vek leh ka lo rethei ang a, ruk ka ru ang a, Ka Pathian hming ka tihliau dah ang e.
10. Chhiahhlawh chu a pu hnenah rel suh, anchia a lawh ang chia, thiam loh i hlawh dah ang e.
11. An pate anchhia lawh a, an nute malsawm lo chhuan an awm a.
12. Mahni ngaiha thianghlim inti chhuan an awm a; nimahsela an bawlhhlawhna tlen fai an ni si lo.
13. Tha inti em emte an awm a, tha an va inti teh reng em!
14. An ha chu khandaih ang, an ha hnuai lam chemte ang chhuan an awm a, leilung ata mi rethei leh mihring zing ata mi renchhamte ei zo turin.
15. Mi pe rawh, mi pe rawh, tia au fanu pahnih nei satliah a awm a. Thil pathum, kham lem nei lo a awm a; e! Thil pali, a ni; a tawk e, ti ngai lote.
16. Thlan leh chhul ching, tui khawpkham lo leilung leh a tawk e, ti ngai lo mei.
17. A pa hmusittu leh a nu thu awi ngaineptu mit chu phai choakin an kher chhuak ang a, mupui note'n an ei ang.
18. Thil pathum ka tana mak lutuk a awm a. E! Thil pali a ni ka hriat loh chu.
19. Boruaka mupui kawng; lung chunga rul kawng; tuifinriata lawng kawng; mipain nula a panna kawngte.
20. Chutiang chu a ni, hmeichhe uire hmang kawng chu! A ei a, a hmui a hru fai a, thil sual engmah ka ti lo, a ti thin.
21. Thil pathum vangin leilung a khur thin; thil pali a ni, tuar theih lohte.
22. Chhiahhlawh chu lal a lo nih a, mi a chu buh leh saa a lo tlai a.
23. Hmeichhe huatthlala takin pasal a lo neih a, chhiahhhlawh nulain a pi ro a luahin.
24. Thil te tam te pali lei chungah hian a awm a; mahse an fing hle reuh mai.
25. Fanghmir hi chak lo tak an ni a; nimahsela thalah an chaw tur an khawlkhawm thin.
26. Sazupui hi chhiatha tak an ni a; nimahsela lungpuiahte an awmna an siam thin.
27. Khaute hian lal an nei lo a; nimahsela a rualin an kal thin.
28. Daidepte hi an kein an inham tang thin a; nimahsela lal inah an awm thin.
29. Thil pathum an awm dana ropui tak an awm a. E! Pali a ni, an awm dana ropui tak chu.
30. Sakeibaknei chu ram sa zingah a chak ber a, engmahin a tilet zo lo a.
31. Ui sa thiam; kelpa pawh; Lal, tumah amah bei ngam awm lo chu.
32. Nangmah inchawisang tura thil atthlak tak i lo tih tawh emaw, thil tha lo i lo ngaihtuah tawh emaw anih chuan, i ka hup rawh.Hnute tui chawhin hnute khal a rawn tichhuak ang leh hnar sawra thi a lo chhuak angin tihthinur luinain inhauna a hring thin.
33. Hnute tui chawhin hnute khal a rawn tichhuak ang leh hnar sawra thi a lo chhuak angin tihthinur luinain inhauna a hring thin.
←  Proverbs (30/31)  →