←  Proverbs (20/31)  →
1. Uain hi nuihzatbura mi siamtu a ni a, zupui hi insual bung bungna a ni; chu mi buma awmte chu an fing lo a ni.
2. Lal vauna chu sakeibaknei rum ang a ni a, tupawh a thin tiur chu mahni nunna chunga thil tisual an ni thin.
3. Intihbuaina ata lo inthiarfihlim hi thil duhawm a ni a, mi a apiangte chu an insual thin.
4. Mi dawngdah chuan thlasik avangin lei a let peih lo a; chuvang chuan buh seng laiin kut a dawh ang a, engmah a nei lo ang.
5. Remruatna chu mihring thinlungah tui thuk tak ang a ni a; nimahsela hriatthiamna nei chuan a phawrh chhuak ang.
6. Rinawm tak niin an insawi theih a, rinawm tak tak tu nge hmu thei ang?
7. Mi fel, ama remruat thiama awm mi fate chu an nihlawh e.
8. Rorelnaa lal thu chuan a mitin thil tha lo zawng zawng a tibo thin.
9. 'Ka thinlung ka tithianghlim a, ka sual lakah ka thianghlim,' tu nge ti thei?
10. Bukna dang dang te, tehna dang dangte hi LALPA mithmuhah angkhat rengin thil tenawm a ni ve ve.
11. Naupang takngial pawh a thiltihin a intilang thin, a thiltih chu a thianghlim leh a dik emawin.
12. Hriatna beng leh hmuna mit hi LALPA siam ve ve a ni.
13. Mut thlahlel suh, i lo pachhe dah ang e; i mit meng la, tichuan chhang kham khawp i nei dawn nia.
14. 'Engmah a nih loh hi, engmah a nih loh hi,' thil leitu chuan a ti thin a, a kal hnu chuan a chhuang leh viau si thin.
15. Rangkachak te a awm a, lunghlu sente pawh a tam a; hriatna hmui erawh chu lungmawi hlu tak a ni.
16. Hnam dang tana mawhphurtua inpe silhfen chu la la, tin, hnam dang tana inpe chu hrengah hmang rawh.
17. Bumna chhagn chu miin tui a ti a, mahse a hnuah a ka chu lungtein a khat ang.
18. Mi rawnin i thil tum chu buk la. Fel taka relin hmelma bei rawh.
19. Mi kamtam tei vel ruai chuan thurukte a tilang thin a; chuvangin a ka zau taka ang chu pawl suh.
20. A nu emaw, a pa emaw anchhe lawhtu chu, thimtham lai berah a khawnvar tihmihsak a ni ang.
21. Sum hi atirah deh chhuah thuai theih mah se la, a tawpah malsawm a ni kher lo ang.
22. 'Sual chu ka thungrul teh mai ang,' ti suh la, LALPA ngaichang rih la, ani chuan a chhanhim ang che.
23. Bukna dang dang hi LALPA mithmuhah thil tenawm a ni a, khin dik lo hi a tha lo a ni.
24. Mihring kawngte chu LALPA ruat a ni a, engtin nge mihringin a kawng an hriat theih ang?
25. Pathian tan thil pe turin intiam thut suh, i inchhir leh dah ang e.
26. Lal fing chuan mi suaksualte a zap kiang a, an chungah sisep a ruai thin.
27. Mihring rilru chu LALPA khawnvar a ni a, pumpui chhungril lam zawng zawng pawh a en chhuak thin.
28. Zahngaihna leh thutakin lal a vawng tha a, a thutthleng chu zahngaihnaa tundinin a awm.
29. Tlangvalte ropuina chu an chakna a ni, putarte mawina chu an lu tuak a ni,Pem khawpa vuakna chuan thil tha lo a tleng fai a, vuakna chuan pumpui chhungril lamte pawh a fan.
30. Pem khawpa vuakna chuan thil tha lo a tleng fai a, vuakna chuan pumpui chhungril lamte pawh a fan.
←  Proverbs (20/31)  →