←  Numbers (12/36)  →
1. Tin, Miriami leh Arona chuan Mosia'n Kus hmeichhia nupuia a neih avangin an sawichhia a: Kus hmeichhia chu a nei ngei si a.
2. Anni chuan, "Mosia hnenah chauh hian em ni LALPA'n thu a sawi bik: Keini hnenah pawh hian a sawi ve lo em ni?" an ti a. Chu chu LALPA'n a lo hria a.
3. Mosia chu lei chunga mihring zawng zanga zaidam lawrlak a ni a.
4. Tin, Mosia leh Arona leh Miriami hnenah LALPA'n, "In pathumin lo chhuak u la, inbiakna puan inah lo kal rawh u," a ti ta thut mai a. Tichuan an pathum chuan an va kal a.
5. Tin, LALPA chu chhum dingah a lo chhuk a,Puan In kawngkaah a lo ding a, Arona leh Miriami chu a ko a; tin, an pahnih chuan an lo chhuak a.
6. Tin, ani chuan, "Ka thu hi ngaithla rawh u: in zingah hian zawlnei in awm chuan amah chu kei LALPA hi inlarnain ka inhriattir ang a, mang lamah ka bia ang.
7. Ka chhiahhlawh Mosia hi zawng chutiang a ni lo: ka chhungkaw thu zawng zawngah chuan a rinawm a ni.
8. Ani nen zawng tawngkain thuruk awm loin tlang takin kan inbia ang a; LALPA hmel pawh a hmu ang; chuvangin ka chhiahhlawh Mosia hi engtiziaa sawichhe ngam nge in nih?" a lo ti a.
9. Tichuan LALPA thin chu an chungah a alh a, a kal leh ta a.
10. Tin, Puan In chunga chhum chu a kiang ta a; tin, ngai teh, Miriami chu vur ang maia varin a lo phar ta a; Arona chuan Miriami chu a han en a, ngai teh, phar a lo ni ta reng mai a.
11. Chutichuan Aronan Mosia hnenah, "Aw, ka pu, ka chungah sual nghat lul suh ang che, atthlak takin kan lo ti a, kan lo sual ta a ni e.
12. Mi, a nu chhul ata a lo chhuah tirh atanga thi sa deuhthaw angin awm lul suh se," a ti a.
13. Tichuan Mosia'n, "Aw Pathian, tidam leh teh khai," tiin LALPA chu a au a.
14. Tin, LALPA'n Mosia hnenah, "A pain a hmaia chil a chhak ngawt pawhin ni sarih chu a zak dawn lo'm ni? Daipawnah ni sarih bibo se la, chu mi zawhah hruai luh leh ni rawh se," a ti a.
15. Chutichuan Miriami chu daipawnah ni sarih a bibo a; Miriami an hruai luh leh hma chuan mipuite chu an tawl sawn lo a.Chumi zawhah chuan mipuite chu Hazeroth ata an chhuak a, Paran thlalerah awmhmun an khuar a.
16. Chumi zawhah chuan mipuite chu Hazeroth ata an chhuak a, Paran thlalerah awmhmun an khuar a.
←  Numbers (12/36)  →