←  Numbers (11/36)  →
1. Tin, mipuite chuan LALPA beng hriatah phunnawi hmangte angin thil tha lo tak an sawi thin a; chu chu LALPA'n a lo hriatin a thin a alh ta a; tichuan LALPA mei chu an zingah chuan a lo thawk a, an riahhmun pawn lam chu a lo kang ta dur dur mai a.
2. Chutichuan mipuite chuan Mosia an au a; tin, Mosia chuan LALPA hnenah a tawngtai a, mei chu a rem ta a.
3. Chu mi hmun hming chu Tabera an ti a. LALPA mei chu an zinga a lo thawh avang chuan.
4. Tin, an zinga hnam dang nena inneih pawlhhote chuan tisa chakna an lo nei ta a; Israela thlahte pawh an tap leh a, "Tunge sa ei tur min pe dawn?
5. Duh duha Aigupta rama sangha kan ei thinte chu kan hre reng a, fanghmate, hmazilte, purun hel ei mite, run balte, purun var mite pawh:
6. nimahsela tunah chuan kan thling a ro zo ta, engmah reng reng beisei tur a awm lo, mana mai lo hi chu," an ti a.
7. Manna chu koriader mu ang, a lan danah chuan tuikeplung ang hi a ni.
8. Mite chuan an chhar khawm a, rawtsawmnaah an rawt sawm a, sumahte an deng a, belah an chhum a, chhangahte an siam a: han ei chuan hriaka kan chhang ang a ni a.
9. Riahhmuna zana dai a tlakin manna chu a tla tel ve a.
10. Tin, mipuite chu an chhungkua kuain an puan in kawngka theuhvah an tap tih Mosia'n a lo hria a; tin, LALPA thin chu nasa takin a alh ta a. Tin, Mosia pawh a lungni lo a;
11. tichuan LALPA hnenah, "Eng vangin nge i chhiahhlawh hi mi tihhreawm, engtizia nge i mit ka tlun loh a, he'ng mipui zawng zawng phurrit hi ka chunga i nghah?
12. Heng mipui zawng zawng hi ka hrin em an nih? An pi leh pute chhechhama pek i tiam rama hruai lut turin, 'Nau pawmtuin hnute hne lai a pawm angin i angchhungah pawm rawh,' i mi tih atan em ni ka hruai chhuah hlawm?
13. Heng mipui zawng zawng pek tur hi khawia ta nge sa ka neih ang? Kan ei atana sa mi pe rawh," tia tapin mi bei si a.
14. Heng mipui zawng zawng hi mahni ngawt chuan ka phur zo lo, ka tan a rit lutuk a ni.
15. Hetianga mi tih dawn chuan min khawngaih la, min tihlum daih law law mai la, mi tirethei tawh suh khai," a ti a.
16. Tin, LALPA'n Mosia hnenah, "Israelte upa, mipuite upa leh an hotu nia i hriat mi sawmsarihte kha ka hnenah khan hruai khawm la, inbiakna puan inah nangmah nena ding ho turin han hruai rawh.
17. Tichuan ka lo chhuk ang a, chutah chuan ka rawn bia ang che: tin, nangmaha thlarau chu an chungah ka dah ang a; nangmah chauha phur loin mipuite phurrit chu an phurhpui ang che.
18. Tin, nangin mipui hnenah, 'Naktuk atan hian intithianghlim vek u la, tichuan sa chu in ei mawlh ang: Sa ei tur tuin nge min pe dawn? Aigupta rama kan nawm nen khan, tiin LALPA benghriatah in tap a; chuvangin LALPA'n sa a pe ang che u a, in ei mawlh ang.
19. Ni khat emaw, ni hnih emaw, ni nga emaw, ni sawm emaw, ni sawmhnih emaw mai pawh ni loin,
20. thla khat pumhlum, ngei hlui khawp leh luak chhuak hlui kawpin in ei ang: in zinga awm LALPA chu duh lo a, 'Engati nge Aigupta ram ata kan chhuah ni, tia a hmaah in tah avangin,' ti ang che," a ti a.
21. Tin, Mosia'n, "Ka awmpui mipuiho kea kal theih thiau pawh 6,00,000 an ni a: 'thlakhat pumhlum ei tur sa ka pe ang,' i ti a.
22. Beram rual leh ran rual pawh talhsak i la, an khawpkham dawn em ni? Tuifinriata sangha zawng zawng pawh mansak vek i la, an khawpkham dawn em ni? A ti a.
23. Tin, LALPA'n Mosia hnenah, "LALPA kut chu a tawi ta em ni? I chungah ka thu angin a thlen leh thlan loh chu i hre mai ang," a ti a.
24. Tichuan Mosia chu a chhuak a, LALPA thu chu mipuite chu a hrilh a: tin, mipuihote upa sawmsarihte chu a ko khawm a, Puan In velah chuan a dintir a.
25. Chutichuan LALPA chu chhumah chuan a lo chhuk a, a rawn bia a, amaha thlarau chu upa sawmsarihte chungah chuan a dah a: tin, heti hi a ni a, thlarau chu an chunga a han awm veleh chuan thu an sawi ta dual dual a; nimahsela chutiang chuan an ti an ti leh tawh lo.
26. Amaherawhchu bukah chuan mi pahnih an la awm ta a, pakhata hming chu Eldada a ni a, pakhat leha hming chu Medada a ni: thlarau chu an chungah a awm a, chhiarte zinga tel chu an ni a, inbiakna Puan Inah erawh chuan an kal ve lo: bukah chuan thu an sawi bual bual a.
27. Tichuan tlangval pakhat a va tlan a, Mosia a va hrilh a, "Eldada leh Medadan bukah thu an sawi bual bual mai," a ti a.
28. Tin, Nuna fapa Josua, a tleirawl tirh atanga Mosia rawngbawltu chuan a chhang a, "Ka pu Mosi, khap rawh khai," a ti a.
29. Tin, Mosia'n a hnenah, "Keimah avanga ngaimawh em i nih? LALPA mi zawng zanwgte chuzawlnei ni vek se la LALPA'n an chungah a thlarau chu dah theuh se la tih nak alaiin," a ti a.
30. Tichuan Mosia chu bukah chuan a lut leh a, amah leh Israel-ho upate nen.
31. Tin, LALPA hnen atang chuan thli a lo tleh a, tuifinriat lam ata vahmin a rawn len a, buk lehlam pang ni khat kal, a lehlam pang ni khat kal ve ve awhin buk velchuan tawng hnih laia sangin a tlaktir a.
32. Tin, mipuite chuan chu mi ni nileng leh zankhua leh a tuk nileng chuan vahmim chu an va chhar khawm a: a chhar tlem ber pawhin homer sawm a chhar a: buk velah chuan mahni tan tan an pho theuh a.
33. Tin, chumi sa chu an ei lai, an la ei zawh hmain, mipue chungah LALPA thin chu a alh ta a, mipuite chu hripui nasa takin LALPA'n a hrem ta a.
34. Chu mi hmun hmingah chuan Kibrot-hatava an ti a; chutah chuan tisa chakna neitute chu an phum avangin.Tin, Kibrot-hatava atang chuan mipuite chu Jazeroth-ah an kal a; Hazeroth-ah chuan an awm ta a.
35. Tin, Kibrot-hatava atang chuan mipuite chu Jazeroth-ah an kal a; Hazeroth-ah chuan an awm ta a.
←  Numbers (11/36)  →