←  Nehemiah (4/13)  →
1. Nimahsela heti hi a ni a, Sanbalatan kulh kan siam tih a han hriat chuan, a thinur a, nasa takin a thin a tirim a, Judate a cheksawlh ta a.
2. Tichuan, a unaute leh Samari sipaite hmaah chuan thu a sawi a, Heng Juda mi chhiathahote hian eng nge maw an tih le? Khawpui sak that an tum em ni vei le? An inthawi tehlul ang maw? Ni khat thil thu-ah an puitlin tehlul ang maw? Bawlhhlawh awm khawm mai mai ata lung kang chhe tawh si an din thar leh ang maw?" a ti a.
3. Tin, a kianga Amon mi Tobia chuan, "Han din teh reng se; sihal pawh han lawn sela an lung kulh chu a tichim mai ang chu," a ti a.
4. Aw kan Pathian ngai teh, hmusitin kan awm hi: an mi sawichhiatna chu anmahni lu chungah lentir la, anni pawh khawii ramah emaw mualpho takin tantir reng ang che;
5. an bawhchhiatna chu khuh suh la, an sualnate chu i hma ata thaiboin awmtir suh ang che; kulh siamtute hmaah an tihthinur che hi.
6. Chutichuan kulh chu kan siam a; a san lam chanvein kulh zawng zawng chu kan zawm chhuak vek a; mipuite chuan thawh chakna rilru an pu hle mai a ni.
7. Amaherawhchu heti hi a ni a, Sanbalata te, Tobia te, Arab mi te, Amon mite leh Asdod miten Jerusalem kulh chu siam that a ni zel tih leh a chhe laite kan thawm tan tih an hriat chuan, an thinur ta hle mai a;
8. tichuan Jerusalem chu rawn beia buaina rawn siam an phiar tlang ta a.
9. Nimahsela anmahni avangin kan Pathian hnenah kan tawngtai a, chhun leh zan an laka vengtu kan dah reng a.
10. Tin, Juda chuan, "Thawktute tha a chau zo tawh a, bawlhhlawh lah a nasa si a; kulh chu kan siam thei dawn ta lo a nih hi," a ti a.
11. Tin, kan hmelmate lah chuan, "An zinga kan han kal a, kan han thah a, hna chu kan han tihtawpsak hma chuan an hre lo ang a, min hmu hek lo ang,"an lo ti bawk si a.
12. Nimahsela,Juda mi an kianga chengte chuan kan hnenna lo kalin kan hmelmate min phiarna chu min hrilh fo bawk a.
13. Chuvang chuan kulh phen, a hniam lai ber, hmun thawthawl takahte mipuite chu a chung chhungin an khan daih te, an fei te, an thla ngulte kengin tanhmun ka khuartir a.
14. Tin, ka han en vel a, ka tho a, mi thate leh roreltute leh mipi dangte hnenah chuan, "Anmahniho chu hlau hauh suh u la, LALPA ropui tak leh hlauhawm tak mai chu hre rengin in unaute, in fapa te, in fanu te, in nupui te, in inte hum turin bei rawh u," ka ti a.
15. Tin, heti hi a ni a, kan hmelmaten kan lo hria tih leh an thiltih tum chu Pathianin engmah loah a siam tih an hratin kulh lamah mahni hnathawhna theuhvah kan kal leh ta vek a.
16. Tin he ti hi a ni a,chuta chin chu ka tlangvalho zatvete chuan hna an thawk a,tin a zatvete chuan feite , phawte, thal ngulte ,awmphawte chu an kawl a; tin roreltu chuan Juda chhungte, kulh siamtu zawng zawngte chu an tan tlat a.
17. Kulh siamna tur hmanraw phurtute pawhin an kut khing khatin hna an thawk a, khing khatin hriamhrei an keng a;
18. a siamtute chuan an khandaih an pai theuh a, chutiang chung chuan an siam a ni. Tin, tawtawrawt hamtu chu ka kiangah a awm a.
19. Tin, mi thate leh roreltute leh mipuite hmaah chuan, "Hna chu a nasain a zau em mai a, kulhah hian kan darhsarhin kan inhlat hle mai si a;
20. tawtawrawt ri in hriatna lam apiangah chuan chuta chuan kan hnenah lo tlan khawm ula; kan Pathianin min dosak ang," ka ti a.
21. Chutiang chuan hna chu kan thawk a; tin, a zatve chuan khawfing chah atangin arsi lan thlengin feite chu an kawl reng a.
22. Chutiang bawkin chu mi lai vek chuan mipuite hnenah, "Zana min venga chhunlawna hnahawk atan tupawh an chhiahhlawhte nen Jerusalem chhungah riak vek rawh se," ka ti a ni.Chutichuan kei pawh, ka unaute pawh, ka tlangvalte pawh, vengtu mi zui thinte pawh, tumah reng rengin kan silhfen kan hlip lo a, hriamhrei inbel chung theuhin tui lamah chuan kan kal ta thin a.
23. Chutichuan kei pawh, ka unaute pawh, ka tlangvalte pawh, vengtu mi zui thinte pawh, tumah reng rengin kan silhfen kan hlip lo a, hriamhrei inbel chung theuhin tui lamah chuan kan kal ta thin a.
←  Nehemiah (4/13)  →