←  Nehemiah (13/13)    
1. Chu mi ni chuan mipui beng hriatah Mosia lehkhabu an han chhiar a; tin, chu miah chuan Amon mie leh Moab mite chu Pathian mite inkhawmnaah chuan engikah mah an tel ve hauh lo tur a ni tih a chuang a;
2. Israela thlahte chhang leh tuia hmuak lo a, anmahni anchhe lawhtu Balama an rawih avangin khan: nimahsela kan Pathianin anchhia chu malsawmnaah a chantir ta zawk a.
3. Tin, heti hi a ni a, dan chu an han ngaihthlak zawh chuan Israel mite zinga ta a chawhpawlhtu hnam dang mie an tihrang ta a.
4. Chu mi hma chuan kan Pathian in pindantea hotu atana ruat, puithiam Eliasiba, Tobia lamhnai chuan
5. tun hma lama Levi hote, hlasatute, kawngkhar vengtute chanvo, chhangphut thil hlante, rimtuite, bungbel te, buh sawma pakhat te, uain leh hriak leh puithiamte tana then thilhlante an dah thinnna pindan zau tak Tobia a buatsaihsak a.
6. Nimahsela chung thil zawng zawng awm laite chuan Jerusalem khuaah ka awm lo a; Babulon lal Artazerzia kum sawmthum leh kum hnih a lal kumin lal hnenah ka lal a, ni eng emaw zat hnuah phalna ka dil leh a:
7. tin, Jerusalem khuaah ka va kal a, Pathian in hung chhung kawtlaitea pindan buatsaihsaka Tobia tana Eliasiban thil tha lo a tih chu kan han hre ta a.
8. Mi tilungni lo em em mai a: chuvangin Tobia in chhung bungrua zawng zawng, chu mi pindan ata chu ka theh chhuak vek a.
9. Tin, thu ka pe a, pindante chu an thian fai a: tichuan Pathian in bungbelte chu chhangphut thilhaln te leh rimtuite nen ka la lut leh a.
10. Tin, Levi-hote leh hla satute chu an chan ai pek an nih loh avangin mahni lo lam theuhvah an tlan darh vek a ni tih ka hre leh ta bawk a.
11. Tichuan, roreltute ka khak a, "Engati nge Pathian in chu thlahthlam anih reng mai le?" ka ti a. Tin, anni chu ka ko khawm vek a, an hmun theuhvah ka awmtir leh a.
12. Chutichuan Juda mi zawng zawngte chuan buh sawma pakhat te, uain te, hriak te, thawhlawm dah khawmnaahte chuan an rawn la a.
13. Tin, puithiam Selemia leh lehkha ziaktu Zadoka leh Levi-ho zinga mi Pedaia te chu thawhlawm dahkhawmnate hotu atan ka siam a: anmahni puibawmtuah chuan Matania fa Zakura fapa Hanana a awm a; rinawma ngaih an ni a, an hnathawh chu an unaute hnena thil sem vel a ni.
14. Aw ka Pathian, he mi thuah hian min hre reng la, ka Pathian in leh a rawngbawlna atana ka thiltih thatte chu thai bo lul suh ang che.
15. Chung lai chuan Judai ramah chawlhnia uain sawr khurtea rap sawr te, buhphal rawn phur te, uain te, grep te, theipuite leh phurrit tinreng phurhtir tura sabengtung siam laite ka hmu a; chung chu chawlhniah Jerusalem-an an rawn phur lut a; ei tur zawrh nite chuan a dik lohzia ka hriattir a.
16. Tura rama mi chuta cheng vete pawhin sanghate leh bungraw tinrengte an rawn la a, chawlhniin Juda mite hnenah leh Jerusalem-ah an zuar a.
17. chutichuan Juda mi liante chu ka khak a, an hnenah, "Chawlhni tibawrhbanga in thil tha lo tih hi eng tizia nge ni?
18. In pi leh pute pawh khan hetiang hi an ti a ni lo'm ni? tin, kan Pathian chuan he'ng thil tha lo zawng zawngte hi kan chungah leh he khaw chungah hian a rawn thlentir ta a ni lo'm ni? Chuti chung pawhin chawlhni tibawrhbangin Israel mite chunga thinurna in la thlen belhtir cheu mai ka ti," ka ti a.
19. Tin, heti hi a ni a, chawlhni dawna Jerusalem kulh kawngkhar a thim deuh veleh kawngkharte khar turin thu ka pe a, tin, chawlhni a ral hma loh chuan hawn loh turin thu ka pe bawk a: chawlhnia thil phurh reng reng an lak luh lohna'n ka tlangval thenkhatte kawngkhar ka ventir a.
20. Chutichuan sumdawng mite leh bungraw tinreng zuar mite chu vawi khat emaw, vawi hnih emaw chu Jerusalem pawn lamah an riak a.
21. Chutichuan a dik lohzia ka hriattir a, an hneah, "Engati nge kulh bulah in riah? Hetianga in tih leh chuan in chungah ka kut ka thlak ang," ka ti a. Chuta chin chu chawlhni chuan an lo kal leh ta lo a.
22. Tin, Levi-hote chu inthian faia chawlhni tihthianghlimna tura kulh kawngkhar rawn veng turin thu ka pe a. Aw ka Pathian, he mi thuah pawh hian min hre reng la, i khawngaihna nasa tak avangin min zuah ang che.
23. Chung lai chuan Juda mi, Asdod hmeichhia te, Amon hmeichhia te, Moab hmeichhiate nupuia neite chu ka hmu a:
24. an fate chu Asdod tawngin an tawng zawk mah a, chungho tawng dan ang ang chauh lo chuan Juda tawngin an tawng thei lo a.
25. Tin, anni chu ka khak hlawm a, anchhia ka lawh a, thenkhatte chu ka vua a, an samte ka pawh thlaksak a, an fanute chu chungho fapa te neihtir lo tur leh chungho fanute chu an fapate tan emaw, anmahni tan emaw nei lo turin Pathian chhalin chhia ka chhamtir a.
26. "Israel lal Solomona pawh kha hetiang thilahte hian a sual ani lo'm ni? Chuti chung pawhin hnam tam tak zingah chuan amah ang lal an awm lo a, a Pathian mi duh tak a ni a, Pathianin Israel ram zawng zawng chunga lalah a siam bawk a; nimahsela ani meuh pawh chu ram dang hmeichhiain a tisual ta mai ani a.
27. Chutichuan ram dang hmeichhiate neia kan Pathian chunga thil tha lo tak mai hi ti turin in thu kan zawm dawn em ni?" ka ti a.
28. Tin, puithiam lal Eliasiba fa, Joiada fapa pakhat chu Horan mi Sanbalata makpa a ni a, chuvangin ka hnen atangin ka tlanbotir ta a.
29. Aw ka Pathian, puithiamna hna leh puithiamna hna thuthlung leh Levi-ho thuthlung an tihbawlhhlawh avangin hre reng hlawm ang che.Chutiang chuan ram dang mite lakah ka tithianghlim a, puithiam te, Levi-hote tan an hnathawhna theuha an rawngbawl dan tur ka ruatsak a;
30. Chutiang chuan ram dang mite lakah ka tithianghlim a, puithiam te, Levi-hote tan an hnathawhna theuha an rawngbawl dan tur ka ruatsak a;
←  Nehemiah (13/13)