←  Matthew (25/28)  →
1. Chu mi hunah chuan van ram chu nula thianghlim sawm an khawnvar kenga mo neitu hmuak tura chhuakte nen chuan tehkhin a ni tawh ang.
2. An zinga mi panga an a a, panga an fing.
3. A ate chuan an khawvarte an kenin, a tui an keng tel si lo a.
4. A fingte erawh chuan an khawnvarte an keng a, an umte chuan a tui an keng tel bawk a.
5. Tin, mo neitu chu a lo kal har avangin an zain an muthlu a, an lo muhil ta a.
6. Tin, zan lai takah chuan, 'Ngai teh u, mo neitu chu a lo kal e! A hmuak turin lo chhuak r'u khai!' tiin au thawm a lo awm ta a.
7. Chu veleh chuan nula thianghlimho chu an tho vek a, an khawnvarte chu an buatsaih a.
8. Tin, a ate chuan, a fingte hnenah, 'In khawnvar tui kha min pe ve rawh u; kan khawnvarte a thi dawn e,' an ti a.
9. Nimahsela, a fingte chuan, 'Keini leh nangni tan a daih lo ang e; a zuartute hnenah kal u la lei ve zawk rawh u,' tiin an chhang a.
10. Tin, lei tura an kal bo hlan chuan mo neitu chu a lo thleng ta a; tichuan, a peihte chu amah nen lawi chaw eiin an lut a; tin, kawng chu an khar ta a.
11. Chu mi hnuah chuan nula thianghlim dangte pawh chu an lo thleng a, 'Ka pu, ka pu, min hawnsak rawh!' an ti a.
12. Ani erawh chuan, 'Tih tak meuhin ka hrilh a che u, ka hre lo che u a ni,' a ti a, a chhang a.
13. Chutichuan, ngaihven rawh u, a ni leh a hun chu in hre si lo a.
14. Mi, ram danga kal dawn a, ama bawihte koa, a sumte an hnena kawltir ang chu a ni si a.
15. Bawih pakhat hnenah talent nga a pe a, bawih dang hnenah talent hnih a pe a, bawih dang hnenah talent khat a pe a; an tih theih tawk tur ang zel theuhin a pe a; tichuan a kal ta a.
16. Tin, talent nga dawngtu chu chung chuan a va sumdawng ta nghal a, talent nga dang a dek chhuak ta a.
17. Chutiang bawkin talent hnih dawngtua pawh chuan talent hnih dang a dek chhuak ta a.
18. Talent khat dawngtu erawh chu a va kal a, lei a lai a, a pu tangka chu a thukru ta zawk a.
19. Tin, rei tak hnuah chung bawihho pu chu a lo haw a, an hnenah a sum chanchin a tifel a.
20. Tichuan, talent nga dawngtu a lo kal a, talent nga dang a rawn keng a, 'Ka pu, nangin talent nga mi kawltir kha; en teh, talent nga dang ka dek chhuak e,' a ti a.
21. A pu chuan a hnenah, 'Bawih tha leh rinawm, i titha e; tlemte chungah i rinawm a, tam tak chungah ka awmtir ang che; i pu lawmnaah lut rawh,' a ti a.
22. Tin, talent hnih dawngtu pawh chu a lo kal a, 'Ka pu, nangin talent hnih mi kawltir kha; en teh, talent hnih dang ka dek chhuak e,' a ti a.
23. A pu chuan a hnenah, 'Bawih tha leh rinawm, i titha e; tlemte chungah i rinawm a, tam tak chungah ka awmtir ang che; i pu lawmnaah lut rawh,' a ti a.
24. Tin, talent khat dawngtu pawh chu a lo kal a, 'Ka pu, mi ti kher kher i ni tih ka hria a che; i tuh lohnaah pawh i at thin a, i tihdarh lohnaah pawh i seng thin a ni.
25. Tichuan, ka hlau a, ka va kal a, i talent kha leiah ka thukru a; en teh, i ta ngai kha i hmuh leh hi,' a ti a.
26. A pu chuan a hnenah, 'Bawih sual leh zawmthawpa, ka tuh lohnaah pawh ka at a, ka tihdarh lohnaah pawh ka seng thin tih i hria maw?
27. Chuti a nih a hnu, ka tangka chu sumdawngtute hnenah lo dah tawh tur i ni, chutichuan, ka lo haw hian ka ta hi a pung nen ka hmu leh tur a ni.
28. Tichuan, a talent khat kha laksak u la, talent sawm neitu hnenah pe rawh u.
29. Tupawh a nei apiang an pe belhchhah ang a, a lo ngah ang; tupawh a nei lo apiang erawh chu a neih chhun pawh an laksak ang.
30. Tin, bawih thahnem lo kha pawn lamah thimah chuan paih chhuak rawh u; chutah chuan tah leh ha thial chu a awm ang,' a ti a, a chhang a.
31. Amaherawhchu, Mihring Fapa hi chu, a vantirhkohte zawng zawng nen, a ropuinaa inthuama a lo kal hunah chuan, a ropuina thutphahah a thu ang a.
32. A hmaah chuan hnam tin an inkhawm ang a: beram vengtuin kel zing ata a beramte a hlir angin anniho chu a hlir ang a.
33. Beramte chu a ding lamah a dah ang a, kelte erawh chu a vei lamah a dah ang.
34. Chu mi hunah chuan Lalber chuan a ding lama mite hnenah chuan, 'Ka pa voh bikte u, lo kal u la khawvel siam tantirh ata in tana ram buatsaih chu chang rawh u.
35. Ka ril a tamin nangni'n ei tur mi pe a; ka tui a halin in tur mi pe a; mikhual ka nihin mi thleng a.
36. Saruak ka nihin puan mi sintir a; ka dam lohin mi kan a; tan ina ka awmin ka hnenah in lo kal si a," a la ti ang.
37. Chu mi hunah chuan mi felte chuan, 'Lalpa, engtikah nge riltamin kan hmuh chia ei tur kan pek che? tuihalin kan hmuh chia in tur kan pek che?
38. Engtikah nge mikhuala kan hmuh chia kan thlen che? Saruaka kan hmuh chia puan kan sintir che?
39. Engtikah nge dam loin emaw tan inah emaw kan hmuh chia i hnena kan lo kal?' tiin an la chhang ang.
40. Tin, Lalber chuan an hnenah, 'Tih tak meuhin ka hrilh a che u, he'ng ka unau te berte zinga mi pakhat chunga in tih chu ka chunga ti in ni,' tiin a la chhang ang.
41. Chu mi zawhah chuan, a vei lama mite hnenah pawh chuan, 'Anchhe dawngte u, kumkhaw mei, diabola leh a tirhkohte tan an buatsaihah chuan mi kal bosan rawh u.
42. Ka ril a tamin nangni'n ei tur mi pe lo a; ka tui a halin in tur mi pe lo a.
43. Mikhual ka nihin mi thleng lo a; saruak ka nihin puan mi sintir lo a; dam lo leh tan ina ka awmin mi kan si lo,' a la ti ang.
44. Chu mi hunah chuan anni pawhin, 'Lalpa, engtikah nge riltamin emaw, tuihalin emaw, mikhualin emaw, saruakin emaw, dam loin emaw, tan inah emaw kan hmuh chia, rawng kan bawlsak loh che? Tiin an la chhang ang.
45. Tin, ani chuan an hnenah, 'Tih tak meuhin ka hrilh a che u. Heng mi te berte zinga mi pakhat chunga in ti lo chu ka chunga ti lo in ni,' tiin a la chhang a.Tin, chung chu kumkhaw hremnaah an kal ang a; mi felte erawh chu kumkhaw nunnaah an kal ang, a ti a.
46. Tin, chung chu kumkhaw hremnaah an kal ang a; mi felte erawh chu kumkhaw nunnaah an kal ang, a ti a.
←  Matthew (25/28)  →