←  Matthew (24/28)  →
1. Tin, Isua Pathian biak in ata a chhuak a, a kal dawn a. Tin, a zirtirte chu Pathian biak inte entir turin a hnenah an lo kal a.
2. Ani erawh chuan an hnenah, He'ng zawng zawng hi in hmu maw? Tih tak meuhin ka hrilh a che u, tihchim loha lung intiang reng reng hetah a awm lo ang, a ti a, a chhang a.
3. Tin, Oliv Tlangah chuan a thut laiin zirtirte chu anmahni chauhin a hnenah an kal a, Chu'ng chu engtikah nge a lo awm ang? I lo kal lehna leh khawvel tawpna chhinchhiahna chu eng nge ni ang? Min hrilh rawh, an ti a.
4. Tin, Isua'n a chhang a, an hnenah, Tuma'n an tihder lohna'n che u fimkhur rawh u.
5. Mi tam takin, 'Krista chu ka ni,' tiin keima hming chhalin an lo kal ang a, mi tam tak an tihder dawn si a.
6. Tin, indo thu leh indo thuthang in la hria ang; in mangan lohna'n fimkhur rawh u; chung chu a lo thleng tur reng a ni; nimahsela tawpna chu a la ni rih lo ang.
7. Hnam hrang leh hnam hrang an indo ang a, ram hrang leh ram hrang an indo ang a; hmun hrang hrangah tamte a tla ang a, lirte a nghing ang.
8. Chung zawng zawng chu nau vei tantirhna a ni.
9. Chu mi hunah chuan hrehawm tuar turin an mantir ang che u a, an tihlum ang che u; ka hminga vangin hnam zawng zawng huat in ni ang.
10. Chu mi hunah chuan mi tam tak an tlu ang a, an inmantir tawn ang a, an inhaw tawn ang.
11. Zawlnei der tam tak pawh an lo chhuak ang a, mi tam tak an tihder ang.
12. Tin, sual a la pun dawna vangin mi tam zawk hmangaihna chu a la dai ang.
13. Nimahsela, a tawp thlenga tuar peih apiang chu, chu mi ngei chu chhandamin a awm ang.
14. Tin, he ram Chanchin Tha hi hnam zawng zawng hriattirna turin khawvel zawng zawngah hrilhin a awm ang; chu mi zawhah chuan tawpna chu a lo thleng ang.
15. Chutichuan, Titiautu Tenawm, zawlnei Daniela sawia kha, hmun thianghlima dinga in hmuh hunah chuan, (a chhiar apiangin a awmzia hre rawh se).
16. Judai rama awmte chu tlangahte tlan bo rawh se.
17. In chunga awm chu a ina englo chuh turin chhuk suh se.
18. Tin, loa awm chu a puan chuh turin kir leh suh se.
19. Chu'ng ni chuan raite leh nau no pawmte chung chu a pik ang.
20. Tin, in tlan bo hun tur chu thlasikah emaw, Chawlhniah emaw a lo thlen lohna'n tawngtai rawh u.
21. Chu mi hunah chuan hrehawm nasa tak a awm dawn si a; chutianga nasa reng reng chu leilung pian tirh ata tun thlengin a la awm ngai lo a, awm pawh engtikah mah a lo awm leh tawh hek lo ang.
22. Tin, chu'ng nite chu tihtawi ni suh se la, mihring reng reng damin an chhuak lo ang; nimahsela, thlantea vang chuan chung nite chu tihtawi a ni ang.
23. Chutih hunah chuan tupawhin in hnenah, 'En teh, Krista chu heta hi a awm,' emaw, 'Heta hi,' emaw, an tih chuan awi suh ang che u.
24. Krista derte leh zawlnei derte an lo chhuak dawn si a, chung chuan thei ang sela thlante meuh pawh an tihder theihna'n chhinchhiahna leh thilmak ropui takte an ti ang.
25. Ngai teh u, ka hrilh lawk tawh che u hi.
26. Chutichuan, in hnenah, 'Ngai teh u, thlalerah a awm,' an tih che u chuan, kal chhuak suh u; 'Pindan chhungrilahte a awm,' an tih che u chuan, awi duh suh u.
27. Kawl, chhak lamah a lo phe chhuak a, thlang lam thleng pawhin a lang thin a, Mihring Fapa lo kal lehna chu chutiang chu a ni dawn si a.
28. Khawiah pawh saruang awmna apiangah mulukawlhte pawh an awm khawm ang.
29. Nimahsela, chu'ng ni hrehawm hnu lawkah chuan ni tihthimin a awm ang a, thla a eng tawh lo ang a, van atangin arsite a lo tla ang a, van thiltihtheihnate chu tihnghin a ni ang.
30. Chutih hunah chuan Mihring Fapa chhinchhiahna chu vanah a lang ang. Chu mi hunah chuan leia chi tinin an awmte an inchum ang a, Mihring Fapa hi thiltihtheihna leh ropuina nasa tak nen van chum chunga lo kal ang hmu ang.
31. Tin, a vantirhkohte chu, tawtawrawt ri nasa tak nen a tir chhuak ang. Anni chuan a thlante chu kawl kil li ata - van tawp atanga a tawp lehlam thlengin - a lawr khawm ang.
32. Tichuan, theipui kungah hian a tehkhin thu zir rawh u: A tang a lo no a, a hnah a lo chawr chuan nipui a thaw dawn tih in hre thin.
33. Chutiang bawkin nangni pawhin chung zawng zawng chu in hmuh hun chuan amah chu a lo hnai tawh a, kawngka bul ngeiah a awm tih hria ang che u.
34. Tih tak meuhin ka hrilh a che u, chung zawng zawng chu a thlen kim hma loh zawng tun lai chhuante hi an ral lo ang.
35. Lei leh van a ral ang a, ka thu erawh chu a ral lo ang.
36. Nimahsela, chu mi ni leh a hun thu chu Pa chauh lo chuan tuma'n, vana vantirhkohte pawhin, Fapa pawhin an hre lo.
37. Tin, Nova dam lai ang bawk kha Mihring Fapa lo kal lehna chu a ni ang.
38. Chu'ng ni tuilet hmate chuan Nova lawnga a luh ni thlengin an eiin an bar a, nupui pasal an innei thin.
39. Tui a lo let a, an zaa a lak bo vek hma loh chuan engmah an hre lo a; Mihring Fapa lo kal lehna chu chutiang bawk a ni ang.
40. Chu mi hunah chuan loah mi pahnih an awm ang a; pakhat chu kal bopuiin a awm ang a, pakhat chu hnutchhiahin a awm ang.
41. Hmeichhe pahnih buh rawt sawmnaah chuan buh rawt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang.
42. Chutichuan ngaihven rawh u, eng niah nge in Lalpa a lo kal dawn in hre si lo.
43. Nimahsela, hei hi hre rawh u, rukru a lo kal hun tur in neituin hria se la, a veng ang a, a in a reh pawhtir lo ang.
44. Chuvangin, nangni pawh inring rengin awm rawh u, in rin loh hunah Mihring Fapa a lo kal dawn si a.
45. Bawih rinawm, fing tak, a puin a hun apianga an chaw chan tur semsak turin a chhungte chunga hotua a siama chu, tu ber nge ni ang le?
46. A pu a lo kal huna bawih chutiang tia a rawn hmuh a chu a eng a thawl ang.
47. Tih tak meuhin ka hrilh a che u, a neih zawng zawng chungah hotuah a siam ang.
48. Amaherawhchu bawih sual chuan, a rilruin, 'Ka pu a lo kal lawk dawn lo e,' a ti a.
49. A bawihpuite lo vel ta se la, mi ruite hnenah eiin bar se la.
50. Chu bawiha pu chu a rin loh niah, a hriat loh laiin a lo kal ang a.Bung hnihah a rawn chhuah ang a, mi vervekte chan ang a chantir ang; chutah chuan tah leh ha thial chu a awm ang.
51. Bung hnihah a rawn chhuah ang a, mi vervekte chan ang a chantir ang; chutah chuan tah leh ha thial chu a awm ang.
←  Matthew (24/28)  →