← Matthew (22/28) → |
1. | Tin, Isua'n anmahni a bia a, an hnenah tehkhin thuin a sawi leh a. |
2. | Van ram chu lal tuemaw a fapa tana lawi chaw siam nen chuan tehkhin a ni. |
3. | Tin, lawi chaw eia a sawmte chu ko turin a bawihte a tir a, nimahsela an lo kal duh lo a. |
4. | Tin, ani chuan, 'Ka sawmte hnenah, Ngai teh u, ka ruai chu ka peih ta; ka sebawngpate leh ka ran chawm thaute ka talh a, engkim peih a ni ta e; lawi chaw ei turin lo kal tawh rawh u, ti rawh u,' tiin bawih dangte a tir leh a. |
5. | Nimahsela, an lo ngaihsak lo a, an kal ta mai a, pakhat chu a loah a kal a, pakhat chu a sumdawnnaah. |
6. | Mi dangte chuan a bawihte chu an man a, zahthlak takin an siam a, an tihlum ta mai a. |
7. | Chutichuan, lal chu a thinur ta a; a sipaihote a tir a, chu'ng tualthattute chu a tiboral a, an khua pawh a halsak ta a. |
8. | Tin, a bawihte hnenah chuan, 'Lawi chaw peih a ni ta, ka sawmte erawh kha chu ei tlak an ni lo. |
9. | Chutichuan, kawng peng thuamahte kal u la, mi in hmuh apiang lawi chaw ei turin sawm rawh u,' a ti a. |
10. | Tichuan, chung bawihte chu an chhuak a, kawngahte chuan an va kal a, an hmuh apiang mi sual leh mi thate pawh an hruai khawm ta vek a; tichuan lawi chaw pindan chu mi sawmtein an lo khat ta a. |
11. | Nimahsela, lal chu mi sawmte en tura a lo luh chuanin, inneihna puan sin lo mi pakhat chutah chuan a hmu a. |
12. | Tichuan, a hnenah, 'Thiana, eng tizia nge ni inneihna puan loin hetah i lo luh le?' a ti a. Tin, ani chu a ngawi reng a. |
13. | Tin, lal chuan a bawihte hnenah, 'A kut leh a ke phuar u la, pawn lam thimah paih chhuak rawh u; chutah chuan tah leh ha thial a awm ang,' a ti a. |
14. | Sawmte chu tam tak an ni a, thlante erawh chu tlemte an ni, a ti a. |
15. | Chu mi lai chuan Pharisaite chuan a thu sawia an man theihnazia tur an va inrawn a. |
16. | Tin, an zirtirte, Heroda pawla mite nen, a hnenah an tir a, chu mite chuan, Zirtirtu, mi dik tak i ni a, tih tak zetin Pathian kawng thu i zirtir thin a, pawisak chuan tumah i nei lo tih kan hria e; tumah thlei bik i nei si lo a. |
17. | Chutichuan, engtin nge i ngaih? Min hrilh teh khai! Kaisara hnena chhiah chawi hi a thiang nge thiang lo? an ti a. |
18. | Nimahsela, Isua'n an sualzia chu a lo hria a, Vervekte u, engah nge mi fiah? |
19. | Chhiah tangka chu mi entir rawh u, a ti a. Tin, a hnenah duli an rawn la a. |
20. | Tin, ani chuan an hnenah, Hei hi tu lem leh tu hming nge ni? a ti a. |
21. | Anni chuan a hnenah, Kaisara, an ti a. Tin, ani chuan an hnenah, A nih ahnu, Kaisara thilte chu Kaisara hnenah pe u la, Pathian thilte chu Pathian hnenah pe ta che u, a ti a. |
22. | Chu'ng thu chu an hriatin mak an ti hle a, amah chu an kalsan a, an kal ta daih a. |
23. | Chu mi ni vek chuan Saddukaiho, thawhlehna a awm lo tite chu a hnenah an lo kal a. |
24. | Zirtirtu, Mosia'n, 'Mi, fa nei loin thi se la, a unaupain a nupui chu neiin a unaupa tan chi a thlahsak tur a ni,' a ti a. |
25. | Aw le, kan zingah sal sarih an awm a; a upa berin nupui a nei a, a thi a, tin, chi a thlah loh avangin a nupui chu a unaupa rochun turin a hnutchhiah a. |
26. | Chutiang bawkin pahnihna chuan a ti a, pathumna chuan a ti bawk a, pasarihna thlengin an ti theuh a. |
27. | Tin, an zaa an thih hnuah chuan hmeichhia pawh chu a thi ta a. |
28. | Chutichuan, thawh leh hunah chuan an pasarihte zingah tu nupui ber nge ni ang? an zain an nei theuh si a, tiin an zawt a. |
29. | Isua'n an hnenah, Pathian Lehkha Thu leh Pathian thiltihtheihna inhriat loh avangin in ngai sual thin a ni. |
30. | Thawhlehnaah chuan nupui pasal an innei dawn tawh lo a, vana vantirhkohte ang an ni dawn zawk a sin. |
31. | Tin, mitthi thawhlehna thu chu - Pathianin, 'Kei Abrahama Pathian, Isaaka Pathian, Jakoba Pathian ka ni,' tia in hnena a sawi kha in chhiar lo vem ni? |
32. | Pathian chu mitthi Pathian a ni lo a, mi nung Pathian a ni zawk, a ti a, a chhang a. |
33. | Tin, mipuite chuan chu chu an hriatin a thu zirtir chu mak an ti hle a. |
34. | Pharisaite erawh chuan Isua'n Saddukaite chu a hnial dang tih an hriatin an inkhawm ta a. |
35. | Tin, an zinga mi pakhat, dan hretuin, |
36. | Zirtirtu, Dan thuah chuan eng thupek hi nge ropui ber? tiin amah fiahna'n thu a zawt a. |
37. | Tin, ani chuan a hnenah, Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni,' tih hi. |
38. | Chu chu thu pek ropui leh pawimawh ber a ni. |
39. | Tin, a dawttu, a anpui chu hei hi a ni, 'Nangmah i inhmangaih angin i vengte pawh i hmangaih tur a ni,' tih hi. |
40. | Chu'ng thupek pahnihah chuan dan thu leh zawlneite thu zawng zawng a inkhaikhawm vek a ni, a ti a. |
41. | Tin, Pharisaite chu an inkhawm lai chuan, Isua'n anmahni chu thu a zawt a. |
42. | Krista chu engtin nge in ngaih? Tu fapa nge ni? a ti a. Anni chuan a hnenah, Davida fapa, an ti a. |
43. | Ani chuan an hnenah, Davida'n, |
44. | 'Lalpa chuan, ka Lalpa hnenah, i hmelmate i kephah hnuaia ka dah hma loh zawng Ka ding lamah thu rawh, a ti,' tiin, eng tiziain nge Thlarauin ani chu 'Lalpa' a tih le? |
45. | Davida'n ani chu 'Lalpa' a tih si chuan, engtin nge a fapa a nih theih? a ti a.Tin, tuma'n kam khat mahin an chhang thei lo a, chu mi ni achin chu tuma'n thu dang reng reng an zawt ngam tawh hek lo. |
46. | Tin, tuma'n kam khat mahin an chhang thei lo a, chu mi ni achin chu tuma'n thu dang reng reng an zawt ngam tawh hek lo. |
← Matthew (22/28) → |