←  Matthew (13/28)  →
1. Chu mi ni chuan Isua chu in ata a kal chhuak a, dil kamah chuan a thu a.
2. Tin, a hnenah mipui tam takte an rawn inkhawm a, chutichuan lawngah a chuang a, a thu a; mipui zawng zawng tiauphoah an ding a.
3. Tin, tehkhin thuin thu tam tak an hnenah a sawi a: Ngai teh u, buh chi thehtu buh chi thehin a feh a.
4. Tin, a theh laiin a then kawng dungah a tla a, savaten an rawn tlan zo ta a.
5. Tin, a then pialtlep lei pan hmunah a la a; lei a chhah loh avangin a to ta nghal a.
6. Nimahsela, ni a lo tlangsan deuhin em vuaiin a lo awm a, zung a neih loh avangin a rawp ta mai a.
7. Tin, a then hnimhlingnei zingah a tla a, hnim chu a lo to sang a, a dip ral ta a.
8. Tin, a then lei thaah a tla a, thenkhat a leh za te, thenkhat a leh sawmruk te, thenkhat a leh sawmthum tein a lo rah ta a.
9. Tupawh beng nei chuan hre rawh se, a ti a.
10. Tin, zirtirte chu an lo kal a, a hnenah, engatinge an hnenah tehkhin thuin i sawi? an ti a.
11. Tin, ani chuan a chhang a, an hnenah, Van ram thuruk chu nangni hriat zawng phal a ni a, anni hriat erawh chu phal a ni lo.
12. Tupawh a nei apiang an pe belhchhah ang a, an nei teuh ang; nimahsela, tupawh a nei lo apiang chu, an neih chhun pawh an laksak ang.
13. Chutih avang chuan tehkhin thuin an hnenah ka sawi a ni; hmu mah se la an hmuh thin loh a, bengin hre mah se la an hriat thin loh a, a ngaihna pawh an hriat thin loh avangin.
14. Tin, Isaia thu sawi lawk kha an chungah a lo thleng a nih hi: Beng zawngin in hre na ang a, a ngaihna erawh chu in hre tawp lo ang; Hmuh zawng in hmu na ang a, hriat erawh chu in hre tawp lo ang.
15. He chite thinlung hi a lo chawlawl ta a, an bengte a lo ngawng deuh a, an maimitchhing bawk a, 'Chutilochuan, kan mitin kan hmu ang a, kan bengin kan hria ang a, kan thinlungin kan hre bawk ang a, kan hawi kir leh ang a, Ani'n min tidam hlauh dah ang e,' an ti a, a tih kha.
16. Nangni mit erawh chu a vannei a ni, a hmuh thina vangin; in beng pawh a vannei a ni, a hriat thina vangin.
17. Tih tak meuhin ka hrilh a che u, zawlnei tam takte leh mi fel tam takte pawhin in thil hmuhte hi hmuh an chak a, nimahsela an hmu si lo; in thil hriatte pawh hi hriat an chak a, nimahsela an hre si lo.
18. Chutichuan, buh chi thehtu tehkhin thu chu hre rawh u.
19. Tupawhin ram thu chu benga a lo hriat a, a ngaihna a hriat si lo chuanin, mi sual chu a lo kal a, a thinlunga theh sa chu a chhuhsak thin. Chu mi chu kawng dunga theh chu a ni.
20. Tin, pialtlep hmuna theh chu, thu chu hriaa lawm taka pawm nghal thin hi a ni.
21. Nimahsela, amahah chuan zung a awm lo a, rei lote chauh a awm a; tin, thu avang chuan hrehawmna emaw, tihduhdahna emaw a lo awm veleh a tlu nghal mai thin.
22. Tin, hnimhlingnei zinga theh chu, thu hretu a ni a, nimahsela, khawvel lungkhamna leh hausakna bumna chuan thu chu a dip a, rah loin a lo awm thin.
23. Tin, lei tha chunga theh chu, thu chu benga hriaa a ngaihna hre bawk hi a ni; chu mi chu a rah ngei a, thenkhat a leh za te, thenkhat a leh sawmruk te, thenkhat a leh sawmthum tein a pung thin, a ti a.
24. Tehkhin thu dang an hnenah a sawi leh a: Van ram chu, mi a loa chi tha thehtu nen chuan tehkhin a ni.
25. Nimahsela, mi an muthilh hlanin a hmelma a lo kal a, buh zingah chuan buh lem a theh a, a kal bo leh ta a.
26. Tin, buh chu a lo to a, a lo vuih chuan, buh lem chu a lo lang ve ta a.
27. Tin, in neitu bawihte chu an lo kal a, a hnenah chuan, 'Ka pu, i loah chi tha i theh lo em ni? Buh lem saw khawi ata lo awm nge ni le?' an ti a.
28. Tin, ani chuan an hnenah, Chu chu hmelmain a lo ti ta a nih chu a ti a. Tin, bawihte chuan a hnenah, a nih leh chung chu va la khawm mai i la rem i ti em? an ti a.
29. Ani erawh chuan, 'Ti lo e; buh lem chu in lak khawm zawngin buh chu in pawt tel hlauh dah ang e.
30. Buh seng thlengin to za rawh se; tin, buh seng hunah chuan buh attute hnenah, Buh lem chu la khawm hmasa zet u la, hal turin tei rawh u; buh erawh chu ka buh inah seng lut rawh u, ka la ti ang e,' a ti a, a ti a.
31. Tehkhin thu dang an hnenah a sawi leh a: Van ram chu antam chi fang khat miin a lak a, a loa a theh ang chu a ni a.
32. Chu chu chi zawng zawng aiin a te ber a; nimahsela a lo to san hunah chuan thlaite ai chuan a lian zawk a, thing a lo ni thin a, chutichuan chungleng savate chu an lo kal a, a zarahte chuan an riak thin a, a ti a.
33. Tehkhin thu dang an hnenah a sawi leh a: Van ram chu, dawidim hmeichhiain a laka, chhangphut tehkhawng thum zingah a zaa a thawk vek thlenga a phuma ang chu a ni, a ti a.
34. Chu'ng zawng zawng chu Isua'n tehkhin thuin mipuite hnenah a sawi a, tehkhin thu loin an hnenah engmah a sawi lo.
35. Zawlneiin, Tehkhin thuin ka ka ka ang ang a, leilung pian tirh ata thil inthup chu ka sawi chhuak ang, tia a sawi kha a lo thlen theihna turin.
36. Chu mi lai chuan mipuite chu a kalsan a, inah chuan a lut ta a, tin, a zirtirte chu a hnenah an lo kal a, Lova buh lem tehkhin thu kha min hrilhfiah rawh, an ti a.
37. Tin, ani chuan a chhang a, Chi tha thehtu chu Mihring Fapa hi a ni a.
38. Lo chu khawvel hi a ni a, chi thate chu ram fate an ni a, buh lemte chu mi sual fate an ni.
39. Hmelma, a thehtu chu, Diabola a ni a; buh seng chu khawvel tawpna tur a ni; buh attute chu vantirhkohte an ni.
40. Chutichuan, buh lemte chu an la khawm a, meiin an hal ang hian khawvel tawpnaah chuan a la awm ang.
41. Mihring Fapa hian a vantirhkohte chu a tir chhuak ang a, a ram ata tihsualtirtute leh thil tisualtute zawng zawng chu an thiar chhuak ang a,
42. rawhtuina meiah chuan an paih ang; chutah chuan tah leh ha thial chu a awm ang.
43. Chu mi hunah chuan mi felte chu an Pa ramah chuan ni angin an eng tawh ang. Beng nei chuan hre rawh se.
44. Van ram chu loa ro phum ruk ang a ni; chu chu miin a hmu a; a thukru a, a lawm avangin a neih zawng zawng chu a va hralh a, chu lo chu a lei ta a.
45. Tin, van ram chu sumdawng mi tuikeplung tha tak zawngtu ang chu a ni leh a;
46. tin, ani chuan tuikeplung hlu tak pakhat a hmu a, a neih zawng zawng chu a va hralh a, a lei ta a.
47. Tin, van ram chu lenkhang, tuifinriata den a, chi tinreng fun khawmna ang chu a ni leh pek a.
48. Chu chu a khah veleh a kamah an hnuk chhuak a; tin, an thu a, a tha zawng chu bawmah an la khawm a, a chhia erawh chu an paih a.
49. Khawvel tawp hunah chuan chutiang bawkin a awm ang; vantirhkohte chu an lo chhuak ang a, mi fel zing ata mi sualte chu an hlir ang a,
50. rawh tuina meiah chuan an paih ang; chutah chuan tah leh ha thial chu a awm ang, a ti a.
51. Isua vekin an hnenah, Chu'ng zawng zawng chu in hria em? a ti a. Anni chuan a hnenah, Hria e, an ti a.
52. Tin, ani chuan an hnenah, Chuti a nih chuan, lehkhaziaktu van ram kawng zirtira awm apiang chu, in neitu, a ro bawm ata thil tharte leh thil hluite phawrh chhuak thintu ang chu a ni, a ti a.
53. Tin, heti hi a ni a, Isua'n chu'ng tehkhin thute chu a sawi zawh veleh chuta tang chuan a kal ta a.
54. Tin, a awmna khaw lam chu a thleng a, an inkhawmna inah chuan anmahni a zirtir ta a, chutichuan mak an ti hle a, He mi hian he finna leh he'ng thilmak tihtheihnate hi khawi ata nge a hmuh?
55. He mi hi thingrem siamtu fapa kha a ni lo em ni? A nu chu Mari an tih hi a ni lo em ni? A unaute pawh Jakoba, Josefa, Simona, Juda an tihte hi an ni lo em ni?
56. A farnute pawh kan hnena awm an ni vek lo em ni? He mi hian khawi ata tehlul nge he'ng zawng zawng hi a hmuh ni? an ti a.
57. Tichuan, a chungah an lungni ta lo a. Nimahsela, Isua'n an hnenah, Zawlnei chu ama khaw lamah leh ama inah chauh lo chuan, chawimawi lohin a awm ngai lo, a ti a.Tin, an rin loha vangin chutah chuan thilmak tam a ti lo.
58. Tin, an rin loha vangin chutah chuan thilmak tam a ti lo.
←  Matthew (13/28)  →