←  Mark (9/16)  →
1. Tin, amah vekin an hnenah, "Tih tak meuhin ka ti a che u, heta dingho a thente hi, Pathian ram thiltihtheihna nena lo thleng an hmuh hma loh chuan thihna tem tawp lo tur an awm," a ti a.
2. Tin, ni ruk achinah chuan Isua'n Petera te, Jakoba te, Johana te chu a hruai a, ahrangin tlang sang takah anmahni chauh a kal chhohpui a; an hmaah chuan a hmel awmzia chu a lo danglam ta a.
3. Tichuan a silhfente chu leia puan sutu reng rengin an suk var theih loh khawp hiala var hlakin a lo tle ta sur a.
4. Tin, Elija leh Mosia chu an hnenah an rawn inlar a, Isua nen an inbe ho a.
5. Tin, Petera'n Isua a bia a, "Rabbi, kan tan heta awm hi a tha e; bawkte pathum kan khawh ang e, i tan pakhat, Mosia tan pakhat, Elija tan pakhat," a ti a.
6. (An hlauh em em avangin sawi tur ahleih pawh an hre si lo a.)
7. Tin, anmahni hliahin chhum a lo zing ta a; tin, chhumah chuan aw a lo chhuak a, "Hei hi ka Fapa duh tak a ni, ama thu ngai rawh u," a ti a.
8. Tin, an han en vel thuai a, anmahni hnena Isua chauh lo chu tumah an hmu ta lo a.
9. Tin, tlang ata chu an chhuk laiin, Mihring Fapa, mitthi zing ata a thawhleh hnuah chauh lo chuan an thil hmuhte chu tumah hrilh loh tur a ti tlat a.
10. Tichuan, chu thu chu an vawng reng a, "Mitthi zing ata thawhleh chu eng tihna nge ni ang?" tiin an inzawt thin a.
11. Tin, anni'n a hnenah, "engtiziaa lehkhaziaktuten, 'Elija a lo kal hmasa tur a ni,' ti nge an nih?" tiin an zawt a.
12. Tin, ani chuan an hnenah, "Elija chu a lo kal hmasa dawn reng a, engkim a siamtha dawn a ni; thil tam tak tuarin mi hmuhsitin a awm tur a ni tih, Mihring Fapa chanchin engtiziaa ziak nge an nih?
13. Nimahsela, ka hrilh a che u, Elija chu a lo kal tawh reng a ni, tin, a chanchin an ziak ang ngei khan a chungah an duh duhin an ti tawh reng bawk a," a ti a.
14. Tin, zirtirte hnen an zuk thlenin, an vela mipui tam takte leh lehkhaziaktuten an lo hnial lai an zuk hmu a.
15. Tin, mipui zawng zawng chuan amah an hmuh veleh chuan mak an ti hle a, a hnenah an tlan nghal a, chibai an va buk hlawm a.
16. Tin, ani chuan an hnenah, "Anniho nen eng thu nge in inhnial?" tiin a zawt a.
17. Tin, mipui zinga mi pakhatin a hnenah, "Zirtirtu, ka fapa, ramhuai tawng thei lo pai i hnenah ka rawn hruai a;
18. a manna apiangah a titlu vak thin a; tichuan, a chilphuante a tla a, a hate a thial a, a cher telh telh thin a; tichuan, i zirtirte hi hnawtchhuak turin ka ti a; an thei si lo a," tiin a chhang a.
19. Tin, ani chuan an hnenah, "Chhuan rinna nei lote u, eng chen nge in hnena ka awm ang a, eng chen nge ka ngaihtheih ang che u? amah chu ka hnenah rawn hruai rawh u," tiin a chhang a.
20. Tin, amah chu Isua hnenah an rawn hruai a; tin, ramhuai chuan ani chu a hmuh veleh naupang chu nasa takin a sawisa ta nghal a; tichuan leiah a tlu a, chilphuan tla zawih zawihin a tal ta awrh awrh a.
21. Tin, ani chuan a pa hnenah, "Hetianga a lo awm tanna hi eng chen nge ni tawh?" tiin a zawt a. Ani chuan, "A naupan lai ata tawh a ni;
22. tichuan, amah tiboral turin vawi tam tak meiah te, tuiahte pawh a nam thlu tawh a; nimahsela nangin eng emawti tala i tih theih chuan min khawngaih la, min pui ang che," a ti a.
23. Tin, Isua'n a hnenah, "I theih chuan a maw! ringtu atan chuan engkim tih theih a ni a sin," a ti a.
24. Tichuan naupang pa chuan, "Ka ring e, ka rinhlelhnaah hian mi pui ang che," tiin a au chhuak ta nghal a.
25. Tin, Isua'n mipui an lo tlan khawm mek a hmuhin, ramhuai bawlhhlawh chu a hau a, a hnenah, "Nang ramhuai tawng thei lo leh bengngawng, thu ka pe a che, a chhung ata lo chhuak la, lut leh tawh suh," a ti a.
26. Tichuan a au chhuak a, nasa taka a sawisak zawhin a lo chhuak ta a; tin, naupang chu thi ang maiin a lo awm ta a, chutichuan mi tam zawk chuan, "A thi a ni," an ti a.
27. Isua erawh chuan a kut a chelh a, a kaitho a; tin, a lo tho ta mai a.
28. Tin, Isua chu ina a va luh chuan a zirtirten, "Engati nge keini'n kan hnawh chhuah theih loh le?" tiin fianrialah an zawt a.
29. Tin, ani chuan an hnenah, "Hetiang hi tawngtai chauh lo chuan engtin mah a chhuak thei lo," a ti a.
30. Tin, chuta ta chu an kal chhuak a, Galili ram chu an kal tlang a, tuma hriat a duh lo a.
31. A zirtirte chu a zirtir si a, an hnenah, "Mihring Fapa hi mihringte kuta mantirin a awm tur a ni a, an tihlum bawk ang a; tin, an tihhlum hnu ni thum achinah a tho leh ang a," a ti a.
32. Nimahsela a thusawi chu a ngaihna an hre lo a, amah lah chu an zawt ngam si lo a.
33. Tin, Kapernaum khua chu an lo thleng a; tin, in chhungah chuan a awm laiin an hnenah, "Kawngah khan eng thu nge in inhnial le?" tiin a zawt a.
34. Nimahsela kawngah chuan, "Kan zingah tu nge ropui ber ang?" tiin an lo inhnial tawh avangin an ngawi ta reng a.
35. Tin, ani chu a thu a, sawm leh pahnihte chu a ko a, an hnenah, "Tupawhin hmasa ber nih a duh chuan mi zawng zawng aiin hnuhnung berah a awm tur a ni a, mi zawng zawng rawngbawltuah a awm bawk tur a ni," a ti a.
36. Tin, naupang te a kai a, an zingah a dintir a; tin, a kuangkuah a, an hnenah,
37. "Tupawh ka hming avanga hetiang naupang te pakhat pawh lawm apiang chu keimah mi lawm an ni ang; tupawh kei mi lawm apiang chu, kei mi lawm an ni lo ang a, mi tirtu lawm an ni zawk ang," a ti a.
38. Johana chuan a hnenah, "Zirtirtu, tu emaw i hminga ramhuaite hnawt chhuak kan hmu a; min zui ve loh avangin kan khap ta a sin le," a ti a.
39. Isua erawh chuan, "Khap tawh su u; tumah ka hminga tilmak ti sia mi sawichhe nghal thei an awm lo a ni.
40. Tupawh min dodal lo chu kan lama tang an ni si a.
41. Tupawh Krista mi in nih avanga tui no khat in tur pe apiang che u chu, tih tak meuhin ka hrilh a che u, a lawmman tur chu a chan tawp lo ang.
42. "Tin, tupawh he'ng mi ringtu mi tete zinga pakhat pawh titlu apiang chu, an nghawngah buh rawt sawmna lung lianpui awrhtirin tuifinriatah thlak se la, an tan a tha zawk tur a ni.
43. Tin, i kutin a tihtluk che chuan tan mai rawh; kut pahnih neia Gehenna-a mei mit thei loa kal ai chuan, piangsuala nunnaa luh i tan a tha zawk e;
44. chutah chuan an lungte chu a thiin, an mei chu tihmihin a awm ngai lo.
45. Tin, i kein a tihtluk che chuan, tan mai rawh; ke pahnih neia Gehenna-a paih ai chuan, kebaia nunnaa luh i tan a tha zawk e;
46. chutah chuan an lungte chu a thiin, an mei chu tihmihin a awm ngai lo.
47. Tin, i mitin a tihtluk che chuan kher chhuak mai rawh; mit khing hnih neia Gehennaa paih ai chuan, mit khing khat neia Pathian rama luh i tan a tha zawk e.
48. Chutah chuan an lungte chu a thiin, an mei chu tihmihin a awm ngai lo.
49. Mi tin meia alhin an awm dawn si a.Chi hi a tha e; nimahsela, chi pawh hi a dak tawh chuan engin nge an tihal leh ang? Nangmahni ngeiah chi nei u la, inngeih rawh u," a ti a.
50. Chi hi a tha e; nimahsela, chi pawh hi a dak tawh chuan engin nge an tihal leh ang? Nangmahni ngeiah chi nei u la, inngeih rawh u," a ti a.
←  Mark (9/16)  →