←  Leviticus (23/27)  →
1. Tin, LALPA'n Mosia a bia a,
2. "Israela thlahte bia la, an hnenah, 'LALPA kut hunbi, inkhawmpui thianghlima in siam tur ka kut hunbi chu hengte hi a ni.
3. Ni ruk hnathawh tur a ni a, ni sarih ni erawh chu urhsun taka lak chawlhna, inkhawmpui thianghlim a ni; eng hna mah in thawk tur a ni lo: in awmna apiangah LALPA tana chawlhni a ni.
4. LALPA kut hunbi, inkhawmpui thianghlim chu hengte hi a ni.
5. Thla khatna, ni sawm leh ni lo ni tlai lam chu LALPA Kalhlen Kut a ni.
6. Tin, chu mi thle vek ni sawm leh ni nga ni chu LALPA tana chang dawidim telh loh kut a ni: ni sarih chhung chu chhang dawidim telh loh in ei tur a ni.
7. A ni khat ni chuan inkhawmpui thianghlim in nei ang a, hna reng reng in thawk tur a ni lo.
8. Ni sarih chhung chuan meia thilhlan LALPA hnenah in hlan tur a ni: a ni sarih ni chuan inkhawmpui thianghlim a ni a, hna reng reng in thawk tur ani lo,' ti rawh," tiin..
9. Tin, LALPA'n Mosia a bia a,
10. "Israela thlahte bia la, an hnenah, 'Ram ka pek che u in va thlen a, chuta buhte in seng hun chuan, in buh thar hmasate phal khat chu puithiam hnenah in rawn keng tur a ni.
11. Tin, pawmsak theih che u a nihna'n, anin buhphal chu LALPA hmaah a lo then ang a: tin, chawlhni tuk tuk lehah chuan puithiamin a then tur a ni.
12. Tin, buhphal in then ni chuan beram no a pa, sawiselbo kum khat mi halral thilhlanah LALPA hnenah in hlan tur a ni.
13. Tin, chuta chhangphut thilhlan chu chhangphut dip mi epha hmun sawma thena hmun hnih hriaka hmeh LALPA tana rimtui tak, meia thilhlan a ni tur a ni: tin, chuta in tur thilhlan chu uain hin hmun lia thena hmun khat a ni tur a ni.
14. In Pathian tana thilhlan chu in hlan hma chuan, chu mi hma reng reng chuan a changin emaw, a kanin emaw, a vuiin emaw in ei tur a ni lo: hei hi in awmna apiangah in thlahte zel thlenga kumkhaw dan tur a ni.
15. Chawlhni tuk tuk leh, then thilhlan buhphal in rawn ken ni atangin in chhiar ang a, chawlhni vawi sarh a tling tur a ni;
16. tin, chawlhni vawi sarihna tuk atang chuan ni sawmnga in chhiar ang a, LALPA hnenah chhangphut thar thil hlan in hlan tur a ni.
17. In awmna hmun atangin epha hmun sawma thena hmun hniha siam, chhang hlawm then tur pahnih, chhangphut dip mi, dawidim nena awm, LALPA tana siam hmasak ber hla tur in rawn keng tur a ni.
18. Tin, chhang hlan rual chuan beram no pasaraih sawisel bo kum khat mi leh bawng tuai leh beram pa pahnih in hlan tur a ni: chungte chu an chhangphut thilhlan leh an in tur thilhlante nen chuan, LALPA tana halral thilhlante nen chuan, LALPA tana halral thilhlan, LALPA tana rimtui tak, meia thilhlan a ni ang.
19. Tin, sual thawina'n kelpa pakhat leh remna thilhlan inthawinaah beram no a pa pahnih kum khat mi in hlan tur a ni.
20. Tin, puithiamin siam hmasak ber chhang chu beram no pahnih nen chuan LALPA hmaa then thilhlanah at hen ang a: puithiam pual, LALPA tana thianghlim a ni ang.
21. Tin, chumi ni vek chu in ruat ang a, in tan inkhawmpui thianghlim an ang a, hna reng reng in thawk tur a ni lo: hei hi in awmna apiangah in thlahte zel thlenga kumkhaw dan tur a ni.
22. Tin, in loa buh in seng hunin in vau femte thlengin in seng vek tur a ni lo a, a to pawh in zawng tur a ni lo: mi rethei leh ram dang mi in zuahsak tur a ni: Kei hi LALPA in Pathian chu ka ni,' ti rawh," tiin.
23. Tin, LALPA chuan Mosia a bia a,
24. "Israela thlahte bia la, an hnenah, 'Thla sarihna, chu mi thla ni khat ni chu in tan urhsun taka lak chawlhna, tawtawrawt tuma hriat reng,a inkhawmpui thianghlim a ni ang a.
25. Hna reng reng in thawk tur a ni lo; LALPA tana meia thilhlan in hlan tur a ni,'ti rawh" tiin.
26. Tin, LALPA chuan Mosia a bia ,
27. "Thla sarihna ni sawm ni erawh hi chu inrema ni a ni a: in tan inkhawmpui thianghlim a niang a, in rilrute in tihreawm ang a; tin, LALPA tana meia thilhlan in hlan tur a ni.
28. Chu mi ni chuan eng hna mah in thawk tur a ni lo; LALPA in Pathian hmaa remna siamsak tur che u a inremna ni a ni si a.
29. Tupawh ni se la, chu mi nia an rilru tihreawm lote chu an chipuite zing ata tuithlarin an awm ang.
30. Tupawh ni se la, chu ni nia hna engpawh thawk apiang, chu mite chu an chipuite zing ata ka tiboral ang.
31. Eng hna mah in thawk tur a ni lo: hei hi in awmna apiangah in thlahte zel thlenga kumkhaw dan tur a ni.
32. In tan chawlhni urhsun taka lak chawlhna a ni ang a, in rilrute in tihreawm tur a ni; chu mi thla ni kua ni tlai lam, chu mi tlai lam atanga tlai lam leh thleng chu chawlhnia inhmang tur a ni," tiin.
33. Tin, LALPA'n Mosia a bia a,
34. "Israela thlahte bia la, an hnenah, 'Thla sarihna ni sawm leh ni nga ni hi LALPA tana ni sarih awh Bawkte Kut a ni a.
35. A ni khatna chu inkhawmpui thianghlim a ni ang a, hna reng reng in thawk tur a ni lo.
36. Ni sarih chhung chuan meia thilhlan LALPA hnenah in hlan ang a, a ni riat ni chu in tan inkhawmpui thianghlim a ni ang a; meia thilhlan LALPA hnena in hlan tur a ni: inkhawmpui tiakna ropui taka ni: hna reng reng in thawk tur a ni lo.
37. Hengte hi a ni, LALPA kut hun bi, LALPA chawlhni te, in thilpek te, in thutiam zawng zawng te, mahni duh thua thilhlan, LALPA hnena in hlan thinte tiam lo a, LALPA tana meia thilhlan te, halral thilhlan te,
38. chhangphut thilhlan te, inthawina te, in tur thilhlan te a ni bik theuha hlan tura inkhawmpui thianghlim in siam turte chu.
39. Tin, thla sarihna ni sawm leh ni nga nia in loa thil hawngte in seng zawh chuan LALPA kut chu ni sarih in awh tir ang a: a ni khatna ni chu chawlh derna ani ang a, a ni riat ni pawh chu chawlh derna a ni bawk ang.
40. A ni khat ni chuan thing kung mawi tak tak rah te, tum kau te, thing buk tak zar te, luia tuipuisuthlah te in keng ang a, LALPA in Pathian hmaah ni sarih inhlim ang.
41. He kut hi LALPA tan kum tin, ni sarih in awhtir tur a ni: hei hi in thlahte zel thlenga kumkhaw dan tur a ni: thla sarihnaah in nei thin ang.
42. Chhawlbukah ni sarih in awm ang a, Israela rama mi rengte chu chhawlbukah in awm vek ang a;
43. tichuan in thlahte chuan Israel thlahte chu Aigupta ram ata ka hruai chhuah lai khan chhawlbukah ka awmtir tih an hre thei ang: Kei hi LALPA in Pathian chu ka ni,' tirawh," tiin.Tichuan Mosia'n LALPA kut hunbi siamte chu Israela thlahte hnenah a puang ta a.
44. Tichuan Mosia'n LALPA kut hunbi siamte chu Israela thlahte hnenah a puang ta a.
←  Leviticus (23/27)  →