←  Leviticus (18/27)  →

---

1.

Tin, LALPA chuan Mosia a bia a,

2.

"Israela thlahte chu bia la, an hnenah, 'Kei hi LALPA in Pathian chu ka ni a.

3.

In awm tawhna Aigupta ram mite tih ang kha ti suh u la, ka hruai luhna tur che u Kanaan ram mite tih ang pawh ti suh ang che u; an dan pawh zawm bawk hek suh u.

4.

Ka rorelte chu in pawm ang a, ka dante chu zawhin in zawm tur a ni: Kei hi LALPA in Pathian chu ka ni.

5.

Chuvangin ka dan leh ka rorelte chu in zawm tur a ni: chu chu miin a tih chuan a nun phah ang: Kei hi LALPA chu ka ni.

6.

Tuma'n in chhung bulte reng reng chu an saruakna hlim turin in pan tur a ni lo: Kei hi LALPA chu ka ni.

7.

I pa saruakna, i nu saruakna chu i hlim tur a ni lo: i nu a ni a, a saruakna i hlim tur a ni lo.

8.

I pa nupui saruakna i hlim tur a ni lo, i pa saruakna a ni.

9.

I farnu, i pa fanu emaw, i nu fanu emaw, i pianpui emaw, i pianpui loh emawte saruakna pawh i hlim tur a ni lo.

10.

I fapaa fanu emaw, i fanua fanu emaw saruakna, an saruakna chu i hlim tur a ni lo. An saruakna chu nangma saruakna a ni si a.

11.

I pa nupuia fanu, i pa hrin saruakna chu, i farnu a ni a, a saruakna i hlim tur a ni lo.

12.

I pa farnu saruakna chu i hlim tur a ni lo; i pa chhung bul a ni.

13.

I nu laizawn saruakna chu i hlim tur a ni lo, i nu chhung bul a ni si a.

14.

I pa unau saruakna chu i hlim tur a ni lo a, a nupui chu i pan tur a ni lo, i nu a ni.

15.

I monu saruakna chu i hlim tur a ni lo, i fapaa nupui a ni a, a saruakna i hlim tur a ni lo.

16.

I unaupa nupui saruakna chu i hlim tur a ni lo, i unaupa saruakna a ni.

17.

Nufa faa saruakna chu i hlim tur a ni lo: a saruakna hlim turin a fapaa fanu emaw, a fanua fanu emaw i nei tur a ni lo; i chhung bulte an ni a; suahsualna nasa tak a ni.

18.

I nupuia laizawn chu a saruakna hlim turin i nupui la dam chhung chuan i nei kawp tur a ni lo.

19.

Tin, hmeichhia a bawlhhlawh dan pangngaia a bawlhhlawh chhung chuan a saruakna hlim turin i pan tur a ni lo.

20.

A laka intibawlhhlawh turin i vengpa nupui i mutpui tur a ni lo.

21.

Moleka puala meia tihluh turin i rila rahte reng reng i pe tur a ni lo a, i Pathian hming i tichhe tur a ni hek lo: Kei hi LALPA chu ka ni.

22.

Hmeichhia angin mipa i pawl tur a ni lo; thil tenawm a ni.

23.

Intihbawlhhlawhna turin ran reng reng i pawl tur a ni lo a, hmeichhia reng reng inpawltir turin ran hmaah a ding tur a ni hek lo; suahsualna chungchuang a ni.

24.

Heng thil, a engamahah hian intibawlhhlawh suh u; he'ng thil zawng zawngah hian in hmaa ka hnawhchhuah tak hnamte chu an lo bawlhhlawh tawh a;

25.

ram pawh chu a bawlhhlawh tawh a ni: chuvangin chuta a khawlohna chu ka hrem a, ram chuan a chhunga awmte chu a luak chhuak ta vek a.

26.

Chuvangin nangni chuan ka dan te, ka rorelte in zawm tur a ni a, he'ng thil tenawm hi a engamah in ti tur a ni lo, in rama mi reng emaw, ram dang mi in zinga khawsate pawhin;

27.

(he'ng thil tenawm zawng zawng hi in hmaa he rama awmte khan an lo ti tawh a, ram pawh chu a bawlhhlawh tawh a ni:)

28.

in hmaa awm hnam a law chhuak ang bawka in tihbawlhhlawha ram chuan a luak chhuah ve lohna tur che uin.

29.

Tupawh he'ng thil tenawm hi a engapawh titu apiang chu an chipuite zing ata tuithlarin an awm ang.Chuvangin he'ng thil tenawm in hmaa an chin ang hi in chin ve lohna'n leh chungah chuan in intihbawlhhlawh lohna'n ka thupek hi in zawm tur a ni: Kei hi LALPA in Pathian chu ka ni,' ti rawh," tiin.

30.

Chuvangin he'ng thil tenawm in hmaa an chin ang hi in chin ve lohna'n leh chungah chuan in intihbawlhhlawh lohna'n ka thupek hi in zawm tur a ni: Kei hi LALPA in Pathian chu ka ni,' ti rawh," tiin.

---

←  Leviticus (18/27)  →