←  Leviticus (17/27)  →
1. Tin, LALPA chuan Mosia a bia a,
2. "Arona leh a fapate leh Israela thlahte zawng zawng bia la, an hnenah, 'Hei hi LALPA thupek chu a ni.
3. Israel chhungkaw zinga mi reng reng, bawngpa emaw, beram no emaw, kel emaw riahhmun emaw, daipawn emawa talh a,
4. LALPA biak buk hmaa LALPA tana thilhlana inbiakna puan in kawngka bula rawn la lo apiang, chu mi chu thisen chhuaha ngaih a ni ang; thisen chhuah ngei a ni a, chu mi chu a chipuite zing ata tuithlarin a awm tur a ni;
5. chu chu Israela thlahten an inthawinate, tamlaka an inthawinate chu an rawn lak a, LALPA tan ngeia inbiakna puan in kawngka bulah, puithiam hnenah an rawn laka, LALPA tana remna thilhlan inthawinaa an inthawi theihna'n a ni.
6. Tin, puithiamin inbiakna puan in kawngka bula maicham chu thisen chuan a theh ang a, a thau chu LALPA tana rimtui takah a hal tur a ni a.
7. An uire thinna kelpa hnenah chuan an inthawi tawh tur a ni lo,' tih hi. Hei hi an thlahte zei chena an kumkhaw dan tur a ni," tiin.
8. Tin, an hnenah, 'Israel chhungkaw zinga mi reng reng emaw, ram dang mi an zinga khawsaten emaw halral thilhlan emaw, inthawina emaw hian a,
9. LALPA hnena inthawi tura inbiakna puan in kawngka bula rawn la lo an awm chuan chu mi chu a chipuite zing ata tuithlarin a awm tur a ni.
10. Tin, tupawh Israel chhungkaw zinga mi emaw, ram dang mi an zinga khawsa emaw, eng thisen pawh ei apiang chu, chu thisen eitu chungah chuan ka hmai ka thuar ang a, a chipuite zing ata tuithlarin ka awmtir ang.
11. Tisa nunna chu thisenah chuan a awm si a: in nunna atana inremna siamna tura maicham chunga ka pek che u a ni: nunna atana inremna siamna chu thisen ngei chu a ni si a.
12. Chuvang chuan Israela thlahte hnenah, tumahin thisen in ei tur a ni lo a, ram dang mi in zinga khawsate pawhin thisen an ei tur a ni hek lo, ka ti a ni.
13. Tin, Israela thlate zinga mi emaw, ram dang mi an zinga khawsain emaw ram vak a, sa emaw, sava emaw, ei theih chi a rawn hawn chuan a thisen chu a tichhuak ang a, vaivutin a vur tur a ni.
14. Tisa zawng zawng nunna thuah chuan a thisen leh a nunna chu angkhat chiah a ni; chuvangin Israela thlahte hnenah chuan, 'Eng sa thisen mah in ei tur a ni lo, tisa zawng zawng nunna chu a thisen chu a ni si a; tupawh a ei apiang chu tuithlarin a awm tur a ni.
15. Tin, amaha thi emaw, sa seh emaw ei apiang chu, chu mi rama mi reng emaw, ram dang mi emaw pawh ni se la, an puan an su ang a, an inbual tur a ni a, tlai lam thlengin an bawlhhlawh ang a; chu mi hnuah chuan an lo thianghlim tawh ang.An suk loha an inbual loh phei chuan an khawlohna mawh chu an phur ang, ka ti a,' ti rawh" tiin.
16. An suk loha an inbual loh phei chuan an khawlohna mawh chu an phur ang, ka ti a,' ti rawh" tiin.
←  Leviticus (17/27)  →