←  Leviticus (16/27)  →
1. Tin, Arona fapate pahnihin LALPA an va hnaiha an thih phah hnu chuan LALPA'n Mosia a bia a;
2. LALPA'n Mosia hnenah, "I unau Arona bia la, puanzar chhung hmun thianghlimah, bawm chunga zahngaihna thutphah hmaah chuan eng lai mahin lo lut hauh suh se, a thi dah ang e; zahngaihna thutphah hungah, chhumah ka rawn inlar dawn a ni.
3. Hetiang hian Arona chu hmun thianghlimah a kal tur a ni: sual thawina'n bawng tuai, halral thilhlanah berampa nen.
4. puan zai sin kawr thianghlim chu a ha ang a, a tisa khuhna'n puan zai sin kekawr chu a ha ang a, puan zai sin kawnghrenin a inhreng ang a, puan zai sin diar a khim tur a ni: he'ng hi silhfen thianghlim a ni a; a inbual te te ang a, a inbel tur a ni.
5. Tin, Israela thlahte mipuiho ta kelpa pahnih sual thawina'n leh halral thilhlanah berampa pakhat a keng ang a.
6. Tin, Arona chuan ama puala sual thawina bawngpa chu a hian ang a, amah leh a chhungte tan inremna a siam ang.
7. Kel pahnih chu a kai ang a, inbiakna puan in kawngka bulah LALPA hmaah a dah ang a.
8. Tin, Arona chuan kel pahnih chungchangah chuan thum a vawr ang a, pakhat chu LALPA pual a ni ang a, pakhat chu Azazela pual a ni ang a.
9. tin, Arona chuan LALPA puala tlu kel chu a la ang a, sual thawina'n a hlan ang a.
10. Azazela puala tlu kel erawh chu inremna siamna tura Azazela tan thlalera chhuah turin LALPA hmaah a nungin a dah ang.
11. Tin, Arona chuan ama puala sual thawina bawngpa chu a la ang a, amah leh a chhungte tan inremna a siam ang a, ama puala sual thawina bawngpa chu a talh ang a;
12. tin, LALPA hmaa maicham ata mei lakna meilinga khat a la ang a, rimtui tui tak rawt dip dep thum khat nen puanzar chhung lamah a rawn luhpui ang a;
13. rimtui khu chuan thu hriattirna chunga zahngaihna thutphah chu a bawhna turin, LALPA hmaa meiah rimtui chu a phul ang, thihna a tawh lohna'n;
14. tin, bawngpa thisen eng emaw zat chu a la ang a, a kut zungtangin zahngaihna thutphah chhak lampang chu a theh ang a, a kutzungtangin zahngaihna thutphah bul chu thisen chuan vawi sarih a theh tur a ni.
15. Tin, mipui pual sual thawina kel chu a talh ang a, a thisen chu puanzar chhung lamah a rawn luhpui ang a, a thisen chu bawngpa thisen a tih ang khan a ti ang a, zahngaihna thutphah leh zahngaihna thutphah bul chu a theh ang:
16. Israela thlahte bawlhhlawhnate avang leh an bawhchhiatnate, an sualna zawng zawngte avangin hmun thianghlim pualah inremna; a siam ang: chutiang bawk chuan an bawlhhlawhnate zinga awm, inbiakna puan in pualah pawh a siam bawk tur a ni.
17. Hmun thianghlima inremna siam tura a luh lai chuan, amah leh a chhungte leh Israel mipuiho puala inremna a siam zawha a lo chhuah leh hma loh chuan tumah reng reng inbiakna puan in chhungah chuan an awm tur a ni lo.
18. LALPA hmaa maicham lamah chuan a chhuak ang a, chu mi pualah inremna a siam ang a, bawngpa thisen leh kel thisen eng emaw zat chu a la ang a, maicham kiahte chuan a velin a tat ang.
19. Tin, a kutzungtangin vawi sarih a theh ang a, a thian ang a, Israela thlahte bawlhhlawh- nate lak ata chu a tithianghlim ang.
20. Tin, hmun thianghlim leh inbiakna puan in leh maicham puala inremna a siam zawh chuan kel nung chu a hlan ang a :
21. Arona chuan kel nung lu chungah chuan a kut khinghnih a nghat ang a, a chungah chuan Israela thlahte khawlohna zawng zawng te, an bawhchhiatna zawng zawng te, an sualna zawng zawngte chenin a chham ang a, chungte chu kel lu chungah chuan a nghat ang a, mi pakhat an ruat diama khan thlaler lamah a hruai bo daih ang:
22. tin, kel chuan an khawlohna zawng zawng chu chen loh leiah a phur ang a, kel chu thlaler- ah chuan a chhuah tur a ni.
23. Tin, Arona chu inbiakna puan inah chuan a lut ang a, hmun thianghlima luh laia puan zai sin silhfen a inbel chu a hlip ang a, chutah chuan a hnutchhiah ang a;
24. tin, hmun thianghlimah a inbual ang a, a silhfen a inbel ang a, a lo chhuak ang a, ama puala halral thilhlan leh mipui puala halral thilhlan chu a hlan ang a, amah leh mipui tan inremna a siam ang.
25. Tin, sual thawina thau chu maichamah a hal ang.
26. Tin, Azazela pual kel chhuahtu apiang chuan an puan an su ang a, an inbual ang a, chu mi zawhah chuan an awm hmun lamah an haw leh tur a ni.
27. Sual thawina bawngpa leh sual thawina kel thisen inremna a siamna'na hmun thianghlima an luhpui chu daipawn lama kalpui tur a ni ang a; a vun te, a sa te, a ek te chu an hal tur a ni.
28. A haltu chuan a puan a su ang a, a inbual ang a, chu mi zawhah chuan awm hmun lamah a haw leh tur a ni.
29. Tin, hei hi in kumkhaw dan tur a ni ang a: thla sarihna, chu mi thla ni sawm ni chuan in rilrute in tihrehawm ang a, in rama mi reng emaw, ram dang mi in zinga kbawsa emawin hna engmah an thawk tur a ni lo:
30. he mi ni hian nangmahni tihthianghlimna'n in tan inremna siam a ni dawn a ni; tichuan LALPA hmaah in sualna zawng zawng lak ata in thianghlim ang.
31. In tan chawlh hle hle ni a ni a, in rilrute in tihrehawm ang a; kumkhaw dan tur a ni.
32. Tin, puithiam, a pa aia puithiam ni tura hriak thih tur leh tihhran tura chuan inremna a siam ang a; puan zai sin silhfen, silhfen thianghlim chu a inbel ang a;
33. hmun thianghlim pualah inremna a siam ang a; inbiakna puan in leh maicham pualah inremna a siam bawk ang a; tin, puithiamte leh mipuiho tan inremna a siam leh bawk ang.An sualna zawng zawngte avanga kum tin vawi khat Israela thlahte tan inremna siam hi in kumkhaw dan tur a ni," a ti a. Tichuan LALPA'n Mosia thu a pek ang chuan a ti a.
34. An sualna zawng zawngte avanga kum tin vawi khat Israela thlahte tan inremna siam hi in kumkhaw dan tur a ni," a ti a. Tichuan LALPA'n Mosia thu a pek ang chuan a ti a.
←  Leviticus (16/27)  →