Leviticus (1/27)  →
1. LALPA'n Mosia a ko a, inbiakna puanin atangin a bia a,
2. Israela thlahte chu bia la, an hnenah, 'In zinga tupawhin thilhlan LALPA hnena in hlanin, ran, bawng rual zinga mi in hlan tur a ni.
3. A thilhlan chu bawngrual zinga mi, halral thilhlan a nih chuan a pa, sawiselbo a hlan tur a ni: ani chu LALPA hmaa pawm a nih theihna'n inbiakna puanin kawngka bulah a hlan tur a ni.
4. Tin, halral thilhlan lu chungah chuan a kut a nghat ang a; tichuan a tan inremna siamnaturin pawmsak a ni ang.
5. Tin, LALPA hmaah bawngpa a talh ang a; tin, Arona fapa puithiamten thisen chu an hlan ang a, inbiakna puanin kawngka bula maicham chu thisen chuan an theh vel tur a ni.
6. Tin, halral thilhlan chu a lip anga, a chan tur a ni.
7. Tin, puithiam Arona fapate chuan maichamah chuan mei an dah ang a, mei chungah chuan thing an chhep khawm ang:
8. tin, Arona fapa puithiamte chuan sahrang te, a lu te, a thaute chu maichama mei chunga thingah chuan an dahfel ang a:
9. a kawchhungte leh a kete erawh chu tuiin a sil ang: puithiam chuan LALPA tana rimtui tak, meia hlan halral thilhlan atan a pum chuan maichamah a hal tur a ni.
10. Tin, a thilhlan chu halral thilhlan atana ran rual zinga mi, beram emaw, kel emaw a nih chuan, a pa, sawiselbo a hlan tur a ni.
11. Tin, maicham sir hmar lampangah LALPA hmaah a talh anga; tin, Arona fapa puithiamte chuam maicham chu a thisen chuan an theh vel tur a ni.
12. Tin, a chan ang a, a lu nen a thau nen; tin, puithiamin maicham chunga mei chungah thingah chuan a dah fel ang:
13. a kawchhungte leh a kete erawh chu tuiin a sil ang: tin, apumin puithiamin a hlan ang a, maichamah a hal tur a ni: LALPA tana rimtui tak, meia hlan halral thilhlan a ni.
14. Tin, LALPA tana a thilhlan chu sava lam halral thilhlan a nih huan, a thilhlanah thuro emaw, parva no emaw a hlan tur a ni.
15. Tin, puithiamin maichamah a rawn keng ang a, a lu a thuai bung ang a, maichamah a hal ang; tin, a thisen chu maicham pangah chuan an far kangtir ang a;
16. tin, a chawkchaweng chu a hmul nen a paih ang a, maicham kiang, chhak lampanga meivap dahna hmunah chuan a paih ang :tin, a thlate chu a thuai thlawn ang a, a tak erawh chu phel loin: tin, puithiamin maichamah, mei chunga thingah chuan a hal tur a ni: chu chu LALPA chuan a hal tur a ni: chu chu LALPA tana rimtui tak, meia hlan halral thilhlan a ni.
17. tin, a thlate chu a thuai thlawn ang a, a tak erawh chu phel loin: tin, puithiamin maichamah, mei chunga thingah chuan a hal tur a ni: chu chu LALPA chuan a hal tur a ni: chu chu LALPA tana rimtui tak, meia hlan halral thilhlan a ni.
      Leviticus (1/27)  →