Judges (9/21)

← Judges (9/21) →

Tin, Jerubaala fapa Abimeleka chu Sekem khuaah a nu nutate hnenah a kal a, a nu pate chhungkua zawng zawngte nen a bia a,

"Sekem khuaa mi zawng zawngte beng hriatah thu sawi u la, 'Jerubaala fa zawng zawng mi sawmsarihten in chunga ro an rel ange tha zawk in tih, pakhatin in chungah ro a rel?' ti teh u khai: tin, kei pawh in thisen zawmpui ka ni tih hi hre reng bawk ang che u," tiin a sawi a.

Tin, a nu nutate chuan Sekem khua ami zawng zawngte beng hriatah chuan chung a thu zawng zawng chu an sawi a: tichuan Abimeleka zui duhna rilru an lo pu ta a: "Ani chu kan unau a ni alawm," an ti ta si a.

Tin, Baal-berith in ata tangka sawmsarih an pe a, chu chuan Abimelekan mi ho tak tak leh , mi tawrawt pui puite a ruai a, anni chuan amah chu an zui a.

Tin, Ophra khuaa a pa inah a va kal a, Jerubaala fapa, a unau sawmsarihte chu lung pakhat chungah a that hlawm a: Jerubaala fapa naupang ber Jothama erawh chu a damah a tang a: a lo biru hlau a ni.

Tin, Sekem khuaa mi zawng zawng leh Beth-milo a mi zawng zawng chu an pung khawm a, tichuan Abimeleka chu Sekem khuaa lungphun bul sasaw kiangah chuan lalah an siam ta a.

Tin, chu chu Jothama an hrilh chuan Gerizim tlang chhipah a han ding a, aw ring takin a au a, an hnenah, "Nangni Sekem khuaa mite u, ka thusawi hi ngaithla teh u, tichuan Pathian pawhin in thu a lo ngaithla ve dawn nia.

Vawikhat chu thing hi an lal atana hriak thih turin an va chhuak a; olive thing hnenah hian, 'Nang kan lalah awm ta che,' an ti a.

Nimahsela olive thing chuan an hnenah, 'Pathian leh mihring chawimawi phahna'na an mi hmanna ber ka hriak hi chhuahsanin thing chungah lehlam lehlaman ka peh ka pheh tehlul ang maw?' a ti a.

10.

Tin, thingte chuan theipui kung hnenah hian, 'Hawh teh, nang kan lalah awm ang che,' an va ti a.

11.

Nimahsela theipui kung chuan an hnenah, 'Ka thlumna leh ka rah tha tak hi chhuahsanin, thing chungah lehlam lehlaman ka phe ka phe tehlul ang maw?' a ti a.

12.

Tin, thingte chuan grep hrui hnenah, 'Hawh teh, nang kan lalah awm ang che,' an ti a.

13.

Tin, grep hrui chuan an hnenah, 'Pathian leh mihring tilawm thintu ka uain hi chhuahsanin thing chungah lehlam lehlaman ka phe ka phe tehlul ang maw?' a ti a.

14.

Chutichuan thin gzawng zawng chuan hling hnenah, 'Hawh teh, nang kan lalah awm ang che,' an ti a.

15.

Tin, hling chuan thing hnenah, 'In lal atana hriak mi thih takzet in nih chuan ka hlimah hian lo bi ta che u: in nih loh erawh chuan hlingah chuan mei lo chhuakin Lebanon tlanga sidar thingte chu kang zo vek rawh se,' a ti a.

16.

Chutichuan Abimeleka in lal atana in lo siam ta mai hi tih takzet leh fel taka ti in nih a, Jerubaala leh a chhungte chu tha taka in tih a, a phu ang zela a chunga lo tite in nih a;

17.

(Ka pa hian ral a lo dosak che u a, a lo thih phah ta hial a, Midian-ho kut ata chu a lo chhanchhuak ta che u a:

18.

vawiinah hian ka pa chhungte chungah chuan in lo hel a, a fapate sawmsarih zet lung pakhat chungah in lo tihlum a, in unaupa a nih avangin a bawihnu fapa Abimeleka hi Sekem khaw mite lalah in lo siam ta si a;)

19.

vawiinah hian Jerubaala leh a chhunge chunga tih takzet leh fel taka ti in ni phawt zawngin le, Abimeleka chungah hian lawm rawh u, tin, ani pawh in chungah hian lawm rawh se:

20.

chutiang a nih loh erawh chuan Abimeleka atang hian mei lo alh chhuak se la, Sekem khuaa mite leh Beth-milo mite chu kang zo vek rawh se; tin, Sekem khuaa mite leh Beth-milo atangin mei lo alh chhuak se la, Abimeleka chu kang zo vek rawh se," a ti a.

21.

Chutichuan Jothama chu a tlan a, a tlan bo a, Beer-ah a tlan a, a unaupa Abimeleka a hlauh avangin chutah chuan a awm ta reng a.

22.

Tin, Abimeleka chu Israel-ho chungah kum thum a lal a.

23.

Tin, Pathianin Abimeleka leh Sekem khuaa mite karha chuan rilru sual a awmtir a, tichuan Sekem khuaa mite chuan Abimeleka chungah vervek takin an ti ta a:

24.

chu chu Jerubaala fapa sawmsarihte chunga rawng taka an tih avanga an chunga phuba lakna a lo thlen theihna tur leh, anmahni thattu an unaupa Abimeleka chungah leh, a unaute that tura a kut lo tichaktu Sekem-hote chunga an thisen awm theihna turin a ni.

25.

Tin, Sekem khuaa mite chuan tlang chhipahte amah chang rutute an dah a, chu mi kawnga kal apiangte chu an lo suam thin a; chu mi thu chu Abimeleka an hrilh a.

26.

Tin, Ebeda fapa Gaala a unauteho nen an lo thawk a. Sekem khuaah an lut a: Sekem- hote chuan an lo ringhlel lo a.

27.

Tin, lo lamah an va kal a, an grep huana mi an lo a, an chil a, an kut a, an pathian inah an lut a, an eiin an in a, Abimeleka chu anchhia an lawh a.

28.

Tin, Ebeda fapa Gaala chuan, "Tunge ni Abimeleka chu? Sekema pawh hi tu nge maw anih a, keinin a rawng kan han bawl tehlul tur chu? Jerubaala fa a ni lo'm ni? Zebula hi a upa a ni lo'm ni?Sekema pa Hamora hote rawng i bawl ang u hmiang; engah nge a ni rawng chu kan bawl ang?

29.

Hengho hi ka thuin han awm teh se la chu aw! Abimeleka hi ka han titlawm der mai tur," a ti a. Tin, Abimeleka hnenah, "I sipaite tipung la, lo thawk rawh khai," a ti a.

30.

Tin, chu mi khaw roreltu Zebula chuan Ebeda fapa Gaala thusawi chu a lo hriat chuan a thin a ur ta thut a.

31.

Tichuan fin vervekin, Abimeleka hnenah chuan, "Ngai teh, Ebeda fapa Gaala leh a unauteho Sekem-ah an lo kal a; tin, ngai teh, i chunga helpui tumin khua amite an fuihpawrh e.

32.

Chutichuan i hote nen azan azanin lo thawk u la, phulah lo chang rawh u:

33.

tichuan heti hi a ni ang a, zingah ni chhuah veleh, tho la, khua chu rawn bei mai ang che: tin, ngai teh, amah leh a hote chuan an rawn beih dawn veleh che, remchang i tih dan ang angin an chungah lo ti mai ang che," tia hrilh turin mite a tlantir a.

34.

Chutichuan Abimeleka leh a hote zawng zawng chu azan azan chuan an tho a, pawl lia insiamin Sekem khua chu an hual ta a.

35.

Tin, Ebeda fapa Gaala chu a va chhuak a, khawpui luhna kawngkaah chuan a va ding a: tin, Abimeleka chu ahote nen chuan an chan rukna hmun ata chu an lo thawk ta a.

36.

Tin, Gaalan mipuite a han hmuh chuan Zebula hnenah, "Ngai teh, tlang chhip atangin mipuite an lo chhuk e," a ti a. Tin, Zebula chuan a hnenah, "Tlang hlim saw mihring angina i hmu mai ani ang," a ti a.

37.

Tin, Gaala chuan, "En ta che maw le, ram lai taka saw mipui an lo chhuk, pawl khat phei chu Meonemim sasaw thing, kawngah an lo kal saw," a ti leh a.

38.

Tichuan Zebual chuan a hnenah, "Tunge maw Abimeleka, a rawng kan han bawl tura chu ni?' tia i sawina ka kha khawiah nge ni ta, hengho hi i mi hmusitate ngei kha an ni lo'm ni? Va chhuak la, va bei mawlh rawh khai," a ti a.

39.

Tichuan Gaala chuan Sekem-hote hma chu a va hruai a. Abimeleka chu a va bei ta a.

40.

Tin, Abimeleka chuan a lo um a, a tlanchhe ta a, khawpui luhna kawngka thlengin mi tam tak hliamin an tlu phung a,

41.

Tin, Abimeleka chu Aruma khuaah chuan a awm ta a" tichuan Zebula chuan Gaala leh a uanute ho chu Sekem khuaa awm thei lo turin a hnawt chhuak ta vek a.

42.

Tin, heti hi a ni a, a tukah chuan mipuite chu phulah hian an va kal chhuak a; tin, Abimeleka an va hrilh a.

43.

Tin, mipuite chu a hruai a, pawl thumah a siam a, phulah chuan an chang a: tin, a han hawi a, tin, ngai teh, mipuite khawpui ata an lo chhuak a, tichuan anmahni chu a lo bei a, a lo that a.

44.

Tin, Abimeleka leh a pawlhote chuan an lo bawh a, khawpui luhna kawngakaah chuan an va ding a: tin, pawl hnihte chuan phula awmho zawng zawng chu an bawh chiam a, an that ta hlawm a.

45.

Tin, Abimeleka chuan khawpui chu chu mi ni chuan nilengin a bei a, tichuan khawpui chu a la a, a chhunga mite ch a that a: khawpui chu a chhu chhe vek a: chiin a theh ta a.

46.

Tin, Sekem kulha awm zawng zawngte chuan chu mi thu chu an lo hria a, Elberith kulhbingah an lut ta vek a.

47.

Tin, Sekem kulah mi zawng zawngte chu an awm khawm vek tih Abimeleka an hrilh a.

48.

Tin, Abimeleka leh a hnena awmho zawng zawngte chu Zalmon tlangah an chho a; tin, Abimeleka chuan hreipui a keng a, thing zar a chek thla a, a pu ta a: tin, a hote hnenah chuan, "Ka tih dan in hmu a, ka tih ang hian nangni pawhin ti ve thuai thuai rawh u," a ti a.

49.

Tin, mi awng zangin thin gzar chu an chek thla ve theuh a, Abimeleka chu an zui a, kulhbing velah chuan an dah zel a, tin, kulhbingah chuan an hal khum ta a; chutichuan Sekem khulha mi zawng zawngte pawh chu an thi a, mipa leh hmeichhia sangkhat lai an ni.

50.

Tichuan Abimeleka chu Thebez khuaah a kal a, Thebez khua chu a hal a, a la a.

51.

Amaherawhchu chu khawpui chhungah chuan kulhpui a awm a, chutah chuan mipa leh hmeichhia zawng zawng leh khawpui chhunga mi zawng zawng chu an tlan lut a, an inkhar khum tlat a, kulh chungah chuan an awm khawm a.

52.

Tin, Abimeleka chu kulh lamah chuan a han kal a, a han bei a, hal tumin kulh kawngka bulah a kal a.

53.

Tin, hmeichhia tuin emaw buh rawtsawmna chung lam lung hi Abimeleka luah a zuk thlak a, a lu ruh a keh a.

54.

Tichuan ralthuam kengtu tlangval chu a han ko thuai a, a hnenah, "I khandaih kha phawi la, mi han that theh khai, tichuan miten, 'hmeichhe thah a ni,' mi tih loh nan," a ti a. Tin, a tlangval chuan a vit tlang ta zawk a, tichuan a thi ta a.

55.

Tin, Israel-hote chuan Abimeleka chu a thi tih an hriat veleh, mi tin, mahni in lamah an haw ta theuh a.

56.

Abimeleka a unaute sawmsarih a thah a, a pa chunga a tih dan kawnga a suahsualna kha Pathianin chutiang chuan a lo thungrul ve ta a ni:i sualna zawng zawng kha Pathianin a rawn thungrul ve tha thung a: tin, Jerubaala fapa Jothama anchhia kha an chungah chuan a lo tla ta a ni.

57.

i sualna zawng zawng kha Pathianin a rawn thungrul ve tha thung a: tin, Jerubaala fapa Jothama anchhia kha an chungah chuan a lo tla ta a ni.

← Judges (9/21) →