←  Judges (15/21)  →
1. Nimahsela heti hi ani a, a nakin deuhvah chuan, buh seng hun lai hian, Samsona chuan kel no kengin a nupui a va kan a; "Pindan chhungah sawn ka nupui hnenah ka va lut dawn e," a ti a. Nimahsela apain a luh a lo phal ta lo a.
2. Tin, a pa chuan, "Amah hi i haw hle emaw ka ti a; chuvangin i thian ka lo pe ta a ni: a nau hi amah aiin a hmel a tha zawk ani lawm maw ni? A aiah khawngaih takin nei zawk mai rawh khai," a ti a.
3. Tin, Samsonan an hnenah, "Tun tum chu Philistia-te pawi khawih mah i la dem ka kai lo ang," a ti a.
4. Chutichuan Samsona chuan sihal zathum a va man a, meicher a la a, an mei leh mei chu a zawm a, an mei inkar theuhvah chuan meichher chu a dah theuh a.
5. Tin, meichherte chu a han hal veleh chuan Philistia-ho buh ding zingah chuan a tlan luhtir chiam a, buhphal leh buh la dingte chu, oliv hmunte nen lam a kang ta vek a.
6. Chutichuan Philistia-hote chuan, "Tu tih nge maw ni le?' an ti a. Tin, anni chuan, "Timna khuaa mi makpa Samsona tih a ni, a nupui a chhuhsak a, a thianpa kha a neihtir avangin," an ti a. Tin, Philistia hote chuan an pafain an han hal hlum ta a.
7. Tin, Samsonan an hnenah, "Hetianga in tih chuan in chungah phuba ka la ve phawt ang a, chu mi zawhah chuan ka ti tawh lo ang," a ti a.
8. Tichuan a bei vak a, a that chiam a: tin, a chhuk thla a, Etam lungpui keh karah a awm ta a.
9. Chutichuan Philistia-ho chu an han chho a, Judai ramah chuan an han inkulh a. Lehi hmunah an inzar chiam a.
10. Tin, Judai rama mite chuan, "Engtizia nge min bei tura in lo kal mai?" an ti a. Tin, anni chuan, "Samsona phuara kan chunga a tih ang bawka a chungah ti ve turin kan lo kal a ni," an ti a.
11. Chutichuan Judai rama mi, mi sangthum Etam lungpui keh karah chuan an zuk kal a, Samsona hnenah, "Philistian-ho hi kan chunga roreltute an ni tih i hre na nge? Eng tiziaa hetianga kan chunga thil rawn ti ta mai nge i nih le?" an ti a.
12. Tin, ani chuan an hnenah, "Nangmah hi phuar a, Philistia-ho kuta pe turin kan lo chhuk a ni," an ti a. Tin Samsonan an hnenah, "Nangni chuan mi tihlum lo turin ka hnenah chhia chham rawh u," a ti a.
13. Tin, anni chuan a hnenah, "Tihlum lo e; amaherawhchu kan phuar tlat ang chia, an kutah kan pe dawn che a ni: thah zawng kan that hauh lo ang che," tiin an sawi a. Tichuan hruizen thar pahnihin an phuar a, lungpui ata chu an hruai chho ta a.
14. Lehi hmun a lo thlen chuan Philistia hoin an lo hmuak a, an lo au dur dur a; tin, LALPA thlarau chu a chungah nasa takin a lo thleng a, tichuan a ban phuarna hruizen chu ziza zai kang chat ang mai a lo ni ta a, a phuarnate chu a kut ata a tla ta tawp mai a.
15. Tin, sabengtung khabe ruh tharlam hi a hmu a, a han ban a, a la a, chu chuan mi sangkhat a vawhlum a.
16. Tin, Samsona chuan, Sabengtung khabe ruhin ka tiang pawng ther thur mai le, Sabengtung khabe ruhin mi sangkhat ka vaw hlum e," a ti a.
17. Tin, heti hi a ni a, thu a sawi zawh veleh chuan a khabe ruh ken chu a paih ta a; tin, chu hmun chu Ramath-lehi an lo ti ta a.
18. Tin, a tui a lo hal ta em em mai a, LALPA a au a, "Nangin i chhiahhlawh kut hi hmangin ropui takin mi lo chhan chhuak ta a: tunah hian tuihalin ka thi mai dawnin, serhtan lohho kutah hian ka tlu lut mai dawn em ni ang le?" a ti a.
19. Nimahsela Pathianin Lehi hmuna khuarkhurum awm chu a han tikhichat ta phuk a, tin, tui a lo chik chhuak ta a; tin, chu chu a han in veleh a rilru a lo chak leh ta a, a lo harh ta huai a: chutichuan chu mi hmingah chuan En-hakore an ti ta, tun thlengin Lehi hmunah chan a la awm reng a.Tichuan Philistia-ho hun lai chuan Israelte chungah kum sawmhnih ro a rel a ni.
20. Tichuan Philistia-ho hun lai chuan Israelte chungah kum sawmhnih ro a rel a ni.
←  Judges (15/21)  →