John (8/21)

← John (8/21) →

Isua erawh chu Oliv tlangah a kal ta zawk a.

Tin,zingah Pathian biak inah a lut leh a, mi zawng zawng a hnenah an lo kal a; tin, ani chu a thu a, anmahni a zirtir a.

Tin, lehkhaziaktute leh Pharisaite'n hmeichhe pakhat a uire lai an man an rawn hruai a; tin, a laiah an dintir a,

Isua hnenah, "Zirtirtu, he hmeichhia hi a uire lai an man a ni, a uire lai takin.

Dan Lehkhabuah, Mosia'n hetiang mi hi lunga den hlum thu min pe a; nangin engtin nge i ngaih?" an ti a.

Chu thu chu amah fiahna'n an ti a, a hekna tur an hmuh theihna'n. Chutichuan Isua a kun a, a kut zungin leiah a ziak a.

Tin, an zawh sek sek avangin ani chu a tho a, an hnenah, "In zinga sual nei lo apiangin amah chu lungin deng hmasa rawh se," a ti a.

Tin, a kun leh a, a kutzungin leiah a ziak leh a.

Tin, anni chuan a thusawi chu an hriatin, upa berin a tan a, a tawp thlengin, pakhat khatin an relh chhuak ta zel a; chutichuan Isua chauh a awm ta a, hmeichhia a laia a awmna ngaia awm nen khan.

10.

Tin, Isua a tho a, a hnenah, "Hmeichhia, khawiah nge an awm tak? Tuma'n thiam loh an chantir na che nge?" a ti a.

11.

Tin, ani chuan, "Lalpa, tuma'n mi chantir lo e," a ti a. Tin, Isua'n, "Kei pawhin thiam loh ka chantir lo va che; kal la, tun hnuah tisual leh tawh suh," a ti a.

12.

Tin, Isua'n an hnenah thu a sawi leh a, "Kei khawvel entu ka ni; tupawh mi zui chu thimah a leng tawp loing a, nunna eng a nei zawk ang," a ti a.

13.

Chutichuan Pharisaite'n a hnenah, "Mahni thu hriattir i ni; i thu hriattir a dik lo e" an ti a.

14.

Isua'n an hnenah, "Mahni thu hriattir mah i la, ka thu hriattir a dik a ni; keiin ka lo chhuahna leh ka kalna tur chin pawh ka hria e; nangni zawngin ka lo chhuahna leh ka kalna tur chin pawh in hre si lo.

15.

Nangni'n tisa angin in sawisel thin; kei zawngin tumah ka sawisel lo.

16.

A ni, sawisel mah i la ka sawiselna a dik ang; keimah chang ka ni lo a, kei leh Pa mi tirtu kan ni zawk si a.

17.

A ni, in Dan Lehkhabuah pawh, 'Mi pahnih thu a dik,' tih ziak a ni bawk alawm.

18.

Kei hi mahni thu hriattirtu ka ni, Pa mi tirtu chuan ka thu a hriattir bawk," a ti a, a chhang a.

19.

Tin, anni chuan a hnenah, "I Pa khawiah nge?" an ti a. Isua'n, "Nangni'n kei min hre lo, ka Pa pawh in hre lo; kei mi hriat chuan ka Pa pawh in hria ang," tiin a chhang a.

20.

Chung thu chu Pathian biak inah a zirtir pahin, thawhlawm dahna hmunah a sawi a; tuma'n amah an man si lo, a hun a la thlen loh avangin.

21.

Tin, ani chuan an hnenah, "Ka kal bo dawn hi, nangni'n mi zawng ang a, in sual nei rengin in thi ang; ka kalna turah in lo kal thei lo ang," a ti leh a.

22.

Tin, Judaten, " 'Ka kalna turah in lo kal thei lo ang,' a tih hi, a intihlum dawn em ni?" an ti a.

23.

Tin, ani chuan an hnenah, "Nangni hnuai lama chhuak in ni; kei zawng chung lama chhuak ka ni; nangni he khawvela chhuak in ni; kei zawng he khawvela chhuak hi ka ni lo.

24.

Chuvangin in hnenah,'In sual nei rengin in thi ang,' ka tih kha; ani chu ka ni tih in awih loh chuan in sual nei rengin in thi mawlh ang," a ti a.

25.

Tin, anni chuan a hnenah, "Tunge maw i nih leh?" an ti a. Isua'n an hnenah, "Atir ata in hnena ka sawi thin kha.

26.

Nangni chungchang thu-ah hian thil tam tak sawi tur leh ngaituah tur ka nei; engpawh ni rawh se, mi tirtu chu mi dik tak a ni; a hnena thu ka hriat apiang khawvel hnenah ka hrilh hi," a ti a.

27.

Pa thu an hnenah a sawi tih an hre lo.

28.

Chutichuan Isua vekin, "Nangni'n Mihring Fapa hi in khaikan hnuah, ani chu ka ni tih leh, keiin mahni thuin thil engmah ka ti lo a, Pain mi hrilh ang zelin he'ng thu hi ka sawi zawk a ni tih in lo la hria ang.

29.

Mi tirtu chu ka hnenah a awm a, mi thlahthlam lo e; a thil lawmzawng apiang ka tih fo avangin," a ti a.

30.

Tin, chung thu chu a sawi laiin mi tam takin amah chu an ring ta a.

31.

Chutichuan Isua'n a ringtu Judate hnenah chuan, "Ka thua in awm reng chuan ka zirtirte in ni tak tak ang.

32.

"Tin thutak in hria ang a, thutak chuan bawih a ban ang che u," a ti a.

33.

Tin, anni chuan a hnenah, "Abrahama thlahte kan ni a sin, tun thlengin tuma bawihah kan awm ngai lo, 'Bawih a ban ang che u,' eng ti tiha i ti nge ni?" an ti a,an chhang a.

34.

Tin, Isua'n an hnenah, "Tih tak meuhin, tih tak meuhin ka hrilh a che u, tupawh thil tisual apiang, sual bawih a ni.

35.

Bawih chu kumkhuain inah a awm reng lo; fapa erawh chu kumkhuain a awm reng thin.

36.

Chutichuan Fapain bawih a ban che u chuan in chhuak tak meuh ang.

37.

Abrahama thlahte in ni tih ka hria e; ni mah u la, mi thah in tum si, ka thuin in rilrua awmna a neih loh avangin.

38.

Keiin ka Pa hnena thil ka hmuh chu ka sawi thin; nangni pawhin in pa hnena thil in hriat chu in ti thin," a ti a.

39.

Tin, anni chuan a hnenah, "Kan pa Abrahama a ni," an ti a, an chhang a. Tin, Isua'n an hnenah, "Abrahama fate in nih chuan Abrahama thil in ti ang chu.

40.

Nimahsela tunah mi thah in tum si. Pathian hnena thutak ka hriat hrilhtu che u ka ni a sin; Abrahama zawngin hetiangin a ti lo e.

41.

Nangni zawngin in pa thil chu in ti thin," a ti a. Tin, anni chuan a hnenah, "Inuirea hrin kanni lo e, Pa pakhat chauh kan nei, Pathian chu," an ti a.

42.

Isua'n an hnenah, "Pathian in Pa a nih chuan nangni'n mi hmangaih ang chu; Pathian hnena chhuak leh a hnen ata lo kal ka ni si a; keima thua lo kal ka ni hek lo, amahin mi tir zawk a ni.

43.

Engati nge ka tawng awmzia in hriat loh? Ka thu in dawnsawn theih loh avang a ni.

44.

Nangni zawng in pa diabola hnena chhuak in ni a, in pa duhzawng tih in duh a ni. Ani chu atir ata tualthat a ni, thutakah a awm lo, a chhungah thu tak reng a awm loh avngin. Dawt thu a sawiin ama tihchhuah a sawi a ni thin; dawthei a ni si, dawt pa pawh a ni.

45.

Thutak ka sawi avangin nangni'n mi ring lo a ni.

46.

In zingah tuin nge sual kawngah thiam loh mi chantir thei awm? Thutak ka sawi pawhin nangni'n engati nge mi rin loh?

47.

Pathian hnena chhuak chuan Pathian thu a pawm thin; he mi avang hian in pawm lo a ni, Pathian hnena chhuak in nih loh avangin," a ti a.

48.

Tin, Judate chuan a hnenah, "Samari mi, ramhuai zawl i ni kan tih kha kan tidik zet lo em ni?" an ti a, an chhang a.

49.

Isua'n, "Ramhuai zawl ka ni lo e; ka Pa ka chawimawi a ni zawk e, nangni'n ka hming in tihchhiat hi.

50.

Nimahsela mahni mawina zawng ka ni lo; a zawngtu leh a ngaihtuahtu mi pakhat a awm a ni.

51.

Tih tak meuhin, tih tak meuhin ka hrilh a che u, miin ka thu a zawm chuan kumkhuain thih ni hmel a hmu lo ang," a ti a.

52.

Tin, Judaten a hnenah, "Ramhuai zawl i ni tih tunah kan hre ta. Abrahama a thi tawh, zawlneite nen, nangin, 'Miin ka thu a zawm chuan kumkhuain thihna a tem lo vang,' i ti si a.

53.

Kan thlahtu Abrahama aiin i ropui zawk em ni? Ani pawh a thi tawh, zawlneite pawh an thi tawh; tuah nge i insiam ni?" an ti a.

54.

Tin, Isua'n, "Mahni inchawimawi i la ka mawi engah mah a ni lo: 'Kan Pathian,' in tih ka Pa chu mi chawimawitu a ni;

55.

nangni'n amah in hre si lo; kei erawh chuan amah ka hria; 'Amah ka hre lo,' ti i la, nangmahni anga dawthei bawk ka ni ang: chutichuan amah ka hria a, a thu pawh ka zawm thin.

56.

In thlahtu Abrahama kha, ka ni hmu tur a nih avngin a hlim em em thin, tin, a hmu ngei a, a lawm hle a," a ti a, a chhang a.

57.

Tin, Judate chuan a hnenah, "Nang kum sawmnga pawh la ni lo pui che, Abrahama i hmu em ni?" an ti a.

58.

Isua'n an hnenah, "Tih tak meuhin, tih tak meuhin ka hrilh a che u, Abrahama awm hma pawhin ka awm," a ti a.Chutichuan a denna'n lung an char a; nimahsela Isua a biru a, Pathian biak in ata chu a chhuak ta a.

59.

Chutichuan a denna'n lung an char a; nimahsela Isua a biru a, Pathian biak in ata chu a chhuak ta a.

← John (8/21) →