←  Joel (2/3)  →
1. Zion-ah chuan tawtawrawh ham u la, ka tlang thianghlimah chuan inralrinna puang rawh u; he ram chhunga mi zawng zawngte chu khur rawh se: LALPA ni chu a lo thleng mek a, a hnai tawh si a;
2. thimna leh khaw durna ni, thim chhah mup angin mi hrang rual tam tak, la hmuh ngai loh, engtik maha hmuh leh ngai tawh loh tur an lo thawk anga, tlang chu khawfing chatin a tuam angin an rawn tuam ang.
3. An hma lam leh hnung lam chu a kang fai zel a; an hmabak ram chu Eden huan ang ni mahse an pelh hnu chuan thlaler ram ro a ni zel a, engmah zuah an nei lo.
4. An lan dan chu sakawr lan dan ang a ni; sakawr chuan mi angin an tlan a.
5. Indona tawlailir ri angin tlang chungah an kat ri sup sup a, pawl kang alh hluah hluah ang leh indonaa mipui chak tak inpeih sa angin.
6. An hmaah mipuite chu an thlaphang a: an hmelte chu a lo dang vek a.
7. Mi chak tak angin an tlan a; indo mi angin bangah an lawn a; mahni zawn theuhvah an kal a, an tlar dan an tibuai lo.
8. An innek hek lo a; mahni kawngah an kal theuh a; hriamhreite an su tlang a, an kal peng lo.
9. Khawpui chungah an zuang a; kulh chungah an tlan a; in chhungahte an lawn chho a; rukru angin tukverhahte an lut a.
10. An hmaah lei a khur a; vante a nghing a; ni leh thla chu a thim a, arsiten an eng an thup a:
11. tin, LALPA chuan sipai rualte hmaah a aw a chhuah a; a riah bukte chu a ropui hle si a; a thu hlentua a chak si a; LALPA ni chu a ropuiin a rapthlak em em si a; tuin nge tuar thei ang?
12. LALPA chuan, Chuti chung pawhin tunah in thinlung zawng zawngin, chaw ngheiin, tapin, lungngaiin ka lam lo hawi u la:
13. in puan ni loin in thinlung thler u la, LALPA in Pathian lam chu hawi rawh u: ani chu khawngaih thei tak leh lainatnaa khat, thin nel leh ngilneihna ngah, thil tha lo laka lemlet thin a ni, a ti a.
14. LALPA in pathian hnenah chhangphut hlan leh in tur hlanahte pawh chuan, a kirin, rilru lamletin, malsawmna hnutchhiahin a awm lo ang tih tuin nge hria?
15. Zion-ah chuan tawtawrawt ham u la, chaw nghei hun serh thianghlim u la, inkhawpui urhsun tak siam rawh u:
16. mipui khawm u la inkhawmho chu tithianghlim u la, putarte, naupangte, hnute hne laite khawm u la: mo neitu chu a pindan chhungril ata lo chhuak tawh se.
17. Puithiam, LALPA rawngbawltute chu, hulhliap leh maicham inkarah chuan tap se la; Aw LALPA, i mite zuah la, i rochante hi sawichhiata awma hnamten an chunga ro an relsak turin pe suh: An Pathian chu khawiah nge a awm tak, tiin an mipuite zingah chuan engah nge an tih ang? ti rawh se.
18. LALPA chuan a ram chu a hik a, a mite a khawngaih a.
19. LALPA chuan a mite hnenah, Ngai u la, in hnenah buh te, uain te, hriak te ka rawn thlen anga, chung chuan in tlai ang a: hnam zingahte chuan sawichhiatin ka awmtir tawhhauh lo ang che u:
20. amah-erawhchu, in hnen ata hmar lam atanga lo kal mi hrang rual chu ka um bo vek ang a; ram ro leh tiauvah ka kaltir ang, a hmasa pawl chhak lam tuipuiah, a hnuhnung pawl thlang lam tuifinriatah; a lo uih chhuak ang a, rimchhe takin a lo nam ang, thil nasa tak a tih tak avangin, tiin a chhang a.
21. Aw, ram, hlau suh la hlimin lawm rawh; LALPA chuan thil ropui takte a ti ta si a.
22. Rante u, hlau suh u; thlaler hlobet hmun a lo chawr a, thing chu a lo rah a, theipui kung leh grep hruite chu a lo duah si a.
23. Nangni, Zion fate u, lawm rawh u, LALPA in Pathianah chuan hlim rawh u: ruah hmasa chu tawk chiahin a pe si che u a, in tan ruah a surtir a, thla khatnaa ruah hmasa leh ruah hnuhnung chu.
24. Hruite chu buhin a khat ang a, uain leh hriak khute chu a khat liam ang a.
25. In zinga ka sipai rual tamtak ka tirh, khaukhuap te, thingnget te, pangang te, thingnget pangangten an ei zawh kumte kha ka rul leh ang che u.
26. Tam tak in ei ang a, in tlai ang a, mak taka ngaihtuah thintu che u LALPA in Pathian hming chu in fak ang a: ka mite chu an mualpho reng reng lo ang.
27. Tin, Israelte zingah ka awm tih leh LALPA in Pathian ka ni a, tumah dang an awm lo tih in hria ang: ka mite chu an mualpho ngai lo ang.
28. Chumi hnuah chuan heti hi a lo ni ang a, mi zawng zawng chungah ka thlarau ka leih ang a; tichuan in fapate, in fanuten ka thu an hril ang a, in putarten mumangah an mang ang a, in tlangvalten inlarnate an hmu ang a:
29. chung niahte chuan ka bawihpate, ka bawihnute chungah pawh ka thlarau ka leih ang a.
30. Vanah leh leiah thilmakte ka hmuhtir ang a,thisen te, mei te,meikhu ding te nen.
31. Ni thimah a chang ang a, thla thisenah a chang ang a, LALPA ni ropui tak leh rapthlak tak chu a lo thlen hmain.Tin, heti hi a ni ang a, tupawh LALPA hming lam apiang chu chhanhim an ni ang: LALPA'n a sawi ang khan tlan chhuakte chu Zion tlangah leh Jerusalem khuaah an awm si ang a, a la awm chhunte zingah chuan LALPA'n kohte chu an awm ang.
32. Tin, heti hi a ni ang a, tupawh LALPA hming lam apiang chu chhanhim an ni ang: LALPA'n a sawi ang khan tlan chhuakte chu Zion tlangah leh Jerusalem khuaah an awm si ang a, a la awm chhunte zingah chuan LALPA'n kohte chu an awm ang.
←  Joel (2/3)  →