← Job (3/42) → |
1. | Hetih hnu hian Joba chuan a ka a ang a, a pianna ni chu anchhia a lawh ta a. |
2. | Tichuan Joba chuan, heti hian a sawi a: |
3. | "Ka pianna ni chu boral rawh se, Mipa fa a pai ta e, tihna zan nen chuan. |
4. | Chu ni chu thim lo ni se, Chung lam atangin Pathianin ngaihsak lo se; Eng pawh chu a chungah eng suh se; |
5. | Thim leh thihna hlim chuan an ta atan chuhse, Chhumin bawh reng mai se la; Chhun tithimtu zawng zawng khan tihlau rawh se. |
6. | Chu zan chu zawng thimin chelh reng mai se la, Chu kuma nite zingah chuan him ve lo se la; Thla chhiarna zingah pawh lo tel suh se. |
7. | Chu zan chu zan khawhar lo ni se, tah chuan hlim thawm leng suh se. |
8. | Ni anchhelawh thiamte chuan anchhia lawh rawh se, Leviathan chawh thawh thiamte chuan. |
9. | A vartian arsi chu thim se la, Eng lo nghak se, hmu si lo se la. Zing khawfingchat pawh hmu hek suhse: |
10. | Ka nu chhul kawngka a lo khar loh avang leh Ka mithmuha buaina a thup hek loh avangin. |
11. | Engati nge chhula ka lo thih loh? Engati nge pum ata ka chhuaha ka thaw a lo tawp loh? |
12. | Engah nge mal chunga mi lo chawi? Engah nge ka hnek tur hnutein mi lo hmuah? |
13. | Chutin ka mu ang a, ka reh riai tawh tur; Ka muhil ang a, ka chawl tawh tur: |
14. | Lei lalte leh remruatpuitute, Hmun ram lo indinsaktute nen chuan; |
15. | A nih loh leh, hotute rangkachak sum neia, Tangkaa an in tikhatute nen chuan: |
16. | A nih loh leh, a hun loa piang thup bo ang ka ni tawh tur, Nausen eng hmu ngai lote ang mai hian. |
17. | Tah chuan mi suaksualten chawhbuai an bang a, Tah chuan mi chaute pawh an chawl a. |
18. | Tah chuan mi tangte an chawl hahdam hlawm a, Vengtu aw pawh an hre lo. |
19. | Tah chuan mi lian mi te an awm za a. Chhiahhlawh pawh a pu lakah a fihlim. |
20. | Engah nge hreawm tuar hnenah eng pek a niha, Engah nge rilrua mangang hnenah nunna pek a nih? |
21. | Thih chak em ema, hmu si lo, Ro phum zawn aia nasaa zawngtu, |
22. | Thlan an hmuha lawma, nasa taka hlim em em tur hnenah chuan? |
23. | Mi a kawng thup bosaka hnenah engati nge eng pek a nih ? Pathianin huang a hung hnan hnenah chuan? |
24. | Ka ei dawn pawhin ka thaw a pik a, Ka rum chu tui angin a luang chhuak a. |
25. | Ka tihzawng tak ka chungah a lo thleng a, ka hlauhzawng tak ka hnenah a lo thleng.Ka hahdam lo a, ka awm hle hle thei lo a, ka chawl thei hek lo; buaina a lo thleng zawk a ni. |
26. | Ka hahdam lo a, ka awm hle hle thei lo a, ka chawl thei hek lo; buaina a lo thleng zawk a ni. |
← Job (3/42) → |