←  Jeremiah (33/52)  →
1. Tin, Jeremia hnenah, vengtu hung chhunga a la awm laiin, LALPA thu chu vawi hnihnaah a lo thleng leh a,
2. Thiltitu LALPA, nghet tura siamtu LALPA (LALPA chu a hming a ni) chuan heti hian a ti:
3. Mi au la, ka chhang ang che, thil ropui leh inthup i hriat ngai loh chu ka entir ang che.
4. Israel Pathian LALPA chuan he khawpui inte leh Juda lal inte, khandaih leh lei chhun pawnte laka venna siam tura an thiat chhiat chungchang thu-ah chuan heti hian a ti:
5. Kaldaiho beio turin an lo kal a, ka thinur leh thinrimnaa ka thah ruangte chuan an tikhat zawk dawn, an sualna zawng zawng avangin he khawpui lakah hian ka hmel ka lo thup tawh si a.
6. Ngai rawh, damna leh hriselna ka rawn thlen ang a, ka tidam ang: muanna leh himna nghet tak ka hmuhtir ang.
7. Tin, Juda awm dan leh Israel awm dan ka lamlet ang a, atira ka din ang khan ka din leh ang.
8. Tin, an kahwlohna, ka chunga an thiltih sualna lak ata ka tleng fai a, an khawlohna, ka chunga an thiltih sualna leh ka chunga an bawhchhiatnate zawng zawng chu ka ngaidam ang.
9. Tin, he khawpui hi leia hnam zawng zawng, an tana ka tihthat zawng zawng hmutute hmaah chuna ka tan hlimna te, chawimawina te, ropuina te ani ang a: thatna leh muanna an chungah ka thlen zawng zawng vangin hlauin an khur ang.
10. LALPA chuan heti hian a ti: He hmun, 'Juda khahwpui meuh pawha mi leh sa awm tawh loa tiau, Jerusalem kawtthlera mi leh sa leh chengtu awm loa ram tawh' an tihah hian,
11. hlimna aw te, moneitu aw te, mo aw te, 'Sipaihote LALPA hnenah chuan lawm thu hril rawh u, LALPA chu a tha si a: a ngilneihna kumkhuain a awm dawn si,' titute aw leh LALPA ina lawmna inthawina rawn kengtute aw chu an la hre leh ang. Atira a awm dan angin ram chu ka awmtir ang, tih hi LALPA thu chuak a ni.
12. Sipaihote LALPA chuan heti hian a ti: He hmun, mi leh sa awm lo khawpa tiau tawh leh a khawpui zawng zawngah hian, berampu an beram rual bawhtirtute chenna hmun a la awm leh ang.
13. Tlang ram khawpuiah te, phai ram khawpuiah te, chhim lam khawpuiah te, Benjamina ramah te, Jerusalem vel hmunahte, Juda khawpuiah te, an chhiartu kut hnuaiah chuan beramte an kal zung zung ang, tih hi LALPA thu chhuak a ni.
14. Ngai rawh, nite a lo thleng mek e, tih hi LALPA thu chhuak a ni, Israel chhungte chungchangah leh Juda chhungte chungchang thu tha tak ka lo sawi tawh chu ka hlen ang.
15. Chung niahte leh chumi hunah chuan felna Chawrno Juda hnenah ka chhuahtir ang, chu ramah chuan dik tak leh fel takin ro a rel ang.
16. Chung niahte chuan Juda chu chhanhimtu a awm ang a, Jerusalem chu him takin a awm ang: tin, a hming put tur chu hei hi a ni ang, "LALPA chu kan felna" tih hi.
17. LALPA chuan heti hian a ti a ni: Davida chuan Israel chhungte lalthutthlenga thu tur mi a hmai ngai lo ang:
18. Puithiam, Levia chite pawhin ka hmaa halral inthawi hlan tur leh buhbal thil hlan tur leh inthawi zel turin mi an hmai hek lo ang.
19. Tin, LALPA thu chu Jeremia hnenah a lo thleng a:
20. LALPA chuan heti hian a ti: Ka chhun ruat leh ka zan ruat thu hi in phelh theih a, chhun leh zan hi an hun taka awm lo tura in tih theih chuan,
21. ka rawngbawltu Davida hnena ka thuthlung pawh a lalthutthlenga thu tur fapa a neih lohna'n tihchhiat a ni ve chauh vang: Leiva chite, puithiam te, ka rawngbawltute hnena mi pawh.
22. Vana awmho chhiarsen loh leh tuipuia tiau chhiarsen loh ang maiin ka rawngbawltu Davida thlah leh Levia ka rawngbawltu David thlah leh Levia chi rawng mi bawlsaktute ka tipung ang.
23. LALPA thu chu Jeremia hnenah a lo thleng a:
24. chhungkaw hnih LALPA'n a thlante chu a paih bo ta' tia he miten an sawi chu i ngaihtuah ngai lo em ni? An mithmuha hnam tih tham an nih lohna'n hetiangin ka mite chu an hmusit a ni.
25. LALPA chuan heti hian a ti: Ka chhun leh zan thu ruat chu a din hlen loh a, lei leh van awm dante hi ka ruat lo a nih chuan,
26. Jakoba thlahte leh ka rawngbawltu Davida thlahte chu ka paih bo ang,Abrahama te, Isaaka te, Jakoba thlahte chungah roreltuah a thlah ka la bo ang: an awm dante ka lamletsakin an chungah khawngaihna ka nei dawn si a.
←  Jeremiah (33/52)  →