←  Isaiah (56/66)  →
1. LALPA chuan heti hian a ti, "Dik takin ro rel u la, fel takin ti rawh u: ka chhandamna chu a lo thleng dawn dawnin ka felna chu a lo lang dawn ta si a.
2. Chutiang ti mi leh, chumi pawm tlattu mihring fapa chu, a eng a thawl e; chawlhni bawhchhe loa serh thintu leh, thil tha lo reng reng ti lo tura a kut veng tha thintu chu.
3. Tin, ram dang mi, LALPA zamwtu chuan, 'LALPA'n a mite lakah mi tihrang ngei ang,' ti suh se: mi tilreh chuan, 'En teh, thing ro ka nih hi,' ti hek suh se.
4. Ka chawlhnite serha, ka lawmzawng thilte thlanga, ka thuthlung pawm tlattu mi tilrehte chungchang thu-ah chuan LALPA'n heti hian a ti si a:
5. An hnenah ka in chhungah leh ka kulh chhungahte chuan fanu leh fapa neite ai mah chuan hriat rengna tha zawk leh hming tha zawk ka pe ang; an hnenah kumkhaw hming, tihboral tawh loh tur ka pe ang,' tiin.
6. Ram dang mite pawh, chawlhni bawhchhe loa serh thin leh, ka thuthlung pawm tlat apiang, LALPA rawng bawl tur leh, LALPA hming ngaina tur leh, a chhiahhlawhahte awm tura LALPA zawm apiangte chu;
7. anni ngei chu ka tlang thianghlimah chuan ka hruai ang a, ka tawngtaina inah ka tihlim ang; halrala an thil hlante leh an inthawinate chu ka maichamah chuan lawmin a awm ang: ka in chu mi tinreng tan tawngtaina in an ti dawn si a," tiin.
8. Lalpa PATHIAN, Israel hnawh chhuahhote hruai khawmtu chuan, "Hruai khawm sate bakah mi dang pawh ka la hruai khawm ang," a ti a.
9. Ram sa zawng zawngte u, a ni, ramhnuaia sa awm zawng zawngte u, ei turin lo kal rawh u.
10. A ralvengtute chu an mit a del a, hriatna nei lo hlir an ni a; ui aw nei lo hlir an ni a, an bauh thei lo; mumang neia, mu renga, mut duh mi an ni a.
11. A ni, uite chu duham tak an ni a, tawk tih lem an nei ngai lo; chung chu beram vengtu thil hre thei lote an ni: mahni kawng kawng, mahni hlawkna lam theuh, an hawi vek hlawm, an zavai maiin."Lo kal rawh u, uain ka la ang a, tichuan zuin kan inthun khat dan nia; naktuk chu vawiin ang hi a ni leh ang a, ni ropui nasa deuh mai ani ang," an ti theuh a.
12. "Lo kal rawh u, uain ka la ang a, tichuan zuin kan inthun khat dan nia; naktuk chu vawiin ang hi a ni leh ang a, ni ropui nasa deuh mai ani ang," an ti theuh a.
←  Isaiah (56/66)  →