←  Isaiah (55/66)  →
1. Hawh u, tuihal apiangte u, tuiahte hian lo kal rawh u, tangka nei lote pawh; lo kal u la, lei u la, ei rawh u; a ni lo kal u la, uain leh hnutetui tangka pe loin, a man pawh pe loin lei rawh u.
2. chaw ni si loah eng vangin nge tangka in sen? Puar leh fanna ni si loah eng vangin nge in tha in sen? Ka thu ngun takin ngaithla u la, thil tha chu ei rawh u, in nunna chu thil thauvah chuan hlim rawh se.
3. In beng rawn dawh u la, ka hnenah lo kal rawh u; ngaithla u la, tichuan in nunna chu a nung ang: tin, in hnenah kumkhaw thu ka thlung ang, Davida hnena khawngaihna tiam tlatte chu.
4. Ngai teh, ani chu mi tin tan hretuah ka ruat a, mi tin tan hruaitu leh hotuah ka ruat a ni.
5. Ngai teh, i hriat ngai loh hnam chu i ko ang a, nangmah hre ngai lo hnam chu i hnenah an lo tlan ang, LALPA i Pathian avang leh Israel-ho Mi Thianghlim avang chuan; ani chuan a chawimawi si chia.
6. Hmuh awla a awm loa hian LALPA chu zawng u la, a hnaih lai hian ko rawh u:
7. mi suaksual chuan a awm dan chu bansan se la, mi fel lo chuan a ngaihtuahnate chu bansan bawk rawh se: LALPA hnenah kir leh rawh se, tichuan anin a lo khawngaih ang; kan Pathian hnenah kir leh rawh se, anin a ngaidam nasa khawp dawn si a.
8. Ka ngaihtuahte hi i ngaihtuahte a ni si lo a, i awm dante chu ka awm dan a ni hek lo, LALPA'n a ti.
9. Van khi lei aia a sang zawk angin, ka awm dante hi in awm dante aiin a sang zawk si a, ka ngaihtuahte pawh hi in ngaihtuahte aiin a sang zawk bawk a ni.
10. Ruah leh vur chu van atangin a sur thin a, khi lamah khian a kir leh ngai lo a, lei hi a chawm zawk a, thil a totirin a chawrtir a, buh chi thehtu hnenah buh chi a pe a, eitu hnenah ei tur a pe thin;
11. Chutiang bawkin ka ka atanga ka thu chhuak chu a awm ang: engmah tih nei loin ka hnenah a kir leh lo ang a, ka duh ang chu a tizo zawk ang a, thil ti tura ka tirhnaah chuan a hlawhtling bawk ang.
12. Hlim taka chhuakin, thlamuang taka hruai chhuahin in awm dawn si a: tlang liante leh tlang tete chuan in hmaah hla an sa chhuak phut ang a, phul thing zawng zawngte chuan an kut an beng bawk ang.Hnimhlingnei ai chuan far a to zawk ang a, buar ai chuan lenhmui a to zawk ang: chu chu LALPA tan hming thatna tur leh kumkhaw chhinchhiahna tihborala awm lo tur a ni ang.
13. Hnimhlingnei ai chuan far a to zawk ang a, buar ai chuan lenhmui a to zawk ang: chu chu LALPA tan hming thatna tur leh kumkhaw chhinchhiahna tihborala awm lo tur a ni ang.
←  Isaiah (55/66)  →