←  Isaiah (44/66)  →
1. "Tunah erawh chuan, aw Jakob-ho ka chhiahhlawhte u, aw Israel-ho ka thlante u, ngaithla rawh u:
2. LALPA, nangmahni siamtu, chhul atanga nangmahni dintu, nangmahni tanpuitu tur chuan heti hian a ti: 'Aw Jakobho ka chhiahhlawhte u, nangni Jesurun-ho ka thlante u, hlau suh u.
3. Tuihal chungah chuan tui ka leih dawn si a, lei rovah chuan tuiluangte chu ka leih bawk dawn a ni: in thlahte chungah ka thlarau ka leih ang a, in fate chungah ka malsawmna ka leih bawk ang:
4. tichuan anni chu, tuipuisuthlahte tui luanna kianga to ang hian, hlobet zingah chuan an to ang.
5. Mi pakhatin, LALPA ta ka ni, a ti ang a; mi dangin Jakoba hming a invuah ang a;midangin a kutah, LALPA ta, tia ziakin, Israel hming chu chi hmingah an hmang ang,' tiin," a ti a.
6. LALPA, Israel-ho Lal, an tlantu sipaihote LALPA chuan heti hian a ti: "Kei hi hmasa bera chu ka ni a, hnuhnung bera pawh ka ni; keimah lo chu Pathian reng reng an awm lo.
7. Hmasanga mite ka din achinah khan keima tih angin tuin nge ko ang a, tuin nge chung chu sawi ang a, tuin nge ka aiah indawt zelin tilang ang le? Thil lo thleng turte leh lo la awm turte chu sawi rawh se.
8. Hlau suh u la, tih hek suh u: hmasang khan in hnenah ka sawi tawhin ka hriattir tawh che u a ni lo'm ni? Tichuan nangni hi mi hriatpuitute in ni. Keimah lo hi Pathian reng reng an awm em? A ni, Lungpui reng reng a awm lo; pakhat mah a awm ka hre lo.
9. "Milem siam chawp siamtute chu an zain boruak mai an ni a; an thil duhzawngte chu a tangkai lo ang; an mualphona tur reng rengin anmahni hriatpuitute pawhin an hmu thei lo a, an hre thei hek lo.
10. Tuin nge pathian din tehlul le? A nih loh leh, tuin nge engmaha tangkai hlei lo milem siam chawp chhung tehlul le?
11. Ngai teh, a pawlpui zawng zawngte chu an mualpho ang a; hnathawk mite pawh mihring zinga mi an ni: an zain inkhawm vek se la, ding rawh se; an hlau vang a, an mualpho tlang ang.
12. Thirdengin hreipui a chher thin a, meihawlah chuan a thawlh a, tubohtein a deng a, a ban chak tak chuan a chher thin: a ni, a ril a lo tam a, a tha chu a lo zawi thin: tui reng reng a in lo a, a chau thin.
13. Thingrem siamtuin hrui a pawt mar a, pensilin a riruat a, nawhmamnatein a riruang a din a, bial siamnain a riruat a, mihring ruangam angin a din a, ina awm tan mihring mawina angin a din thin.
14. Sidar thingte a tan a kit a, thil leh sasua a la a, ngaw thing zinga mi pakhat chu a puala awm turin a tinghet a: far kung a phun a, ruahin a chawm thin.
15. Chumi hnuah chuan mi tan meia tuahah a ni tawh ang; chumia mi chu a la a, a intilum thin; a ni, meiah a chhem a, chhang a hem thin: a ni, pathian a siam a, a be thin; chu thing chu milem siam chawpah a siam a, chu chu bawkkhupin chibai a buk thin.
16. Chu thing chu a then meiah a tuah a; a then chu sa eina'n a hmang a; sa a rawh a, a tlai thin: a ni, mei lum a ai a, 'Chhei, ka lum ta, mei hmel ka hmu ta le,' a ti a:
17. a bang chu pathianah a siam a, a siam chawp milem ngeiah chuan: chu chu bawkkhupa chibai bukin a bia a, a hnenah a tawngtai a, 'Mi chhanhim rawh, ka pathian i ni si,' a ti thin.
18. An hre lo a, an ngaihtuah hek lo: ani chuan an hmuh theih lohna turin a maimitchhintir ta si a; an hriat thiam lohna turin an thinlung pawh a kharsak ta a ni.
19. Tichuan tumah an hre chhuak leh lo a, 'THenkhat chu meiah ka tuah si a; a ni, a vamah pawh chhang ka hem nghe nghe a; sa pawh ka rawh a, ka ei si a: a bang chu thil tenawmah ka siam dawn em ni? Thinga mi bawkkhupin chibai ka buk dawn em ni?' Ti turin anmahniah chuan hriatna leh hriatthiamna a awm hek lo.
20. Vut chauh a ei thin a: a thinlung buma awm chuan, a nunna a inchhanhim theih lohna tur leh, 'Ka kut ding lamah hian dawt a awm lo em ni?' A tih theih lohna turin, amah chu a pentir ta.
21. "Aw Jakob-hote u, chung thilte chu hre reng rawh u, Israel-hote u, hre reng bawk rawh u, chhiahhlawh in ni si a: keiin ka din che u a; ka chhiahhlawh in ni: aw Israel-hote u, ka theihnghilin in awm lo ang.
22. In bawchhiatnate chu chhum chhah mup tihbo angin ka tibo ta a, in sualnate chu chhum tihbo angin ka tibo ta bawk a: ka hnenah lo kir leh rawh u, ka tlan tawh si che u a," tiin.
23. Aw vante u; hlim takin zai rawh u, LALPA'n chu chu a ti ta si a: lei hnuai lamte u, au rawh u, tlangte u, aw ram hnuai leh a chhunga thing awm tinrengte u, hla sa chhuak phut rawh u: LALPA chuan Jakob-ho a tlan tawh a, Israel-hovah chuan a inchawimawi dawn si a.
24. LALPA, nangmahni tlantu, chhul atanga nangmahni dintu chuan heti hian a ti: "Kei hi LALPA, thil zawng zawng siamtu, mahni chauha van kai pharhtu, lei tizautu chu ka ni; tu nge ka hnenah awm?:
25. Kei hi dawtheiho chhinchhiahna engmah loa siam a, aienthiamte mi aa siamtu, mi finte hawi kirtira, an hriatna atthlaka siamtu,
26. mahni chiahhlawh thu tingheta, mahni palaite remruat hlensaktu, Jerusalem chungchang thua, 'Chutah chuan mi an awm leh ang,' titu elh Juda ram khaw chungchang thua, 'Siamin a awm leh hlawm ang a, a chhe laite chu ka siam tha leh ang,' titu,
27. tui thuk tak hnena, 'Kang chat rawh, i luite pawh ka tikang bawk dawn,' titu,Kura chungchang thua, 'Ani chu ka beram vengtu a ni a, Jerusalem chungchang thua Siamin a awm leh ang, tih leh, Pathian biak in hnena, I lungphum chu remin a awm leh ang, ti hial khawpin ka duhzawng zawng zawng chu a ti ang,' titu ka ni," tiin.
28. Kura chungchang thua, 'Ani chu ka beram vengtu a ni a, Jerusalem chungchang thua Siamin a awm leh ang, tih leh, Pathian biak in hnena, I lungphum chu remin a awm leh ang, ti hial khawpin ka duhzawng zawng zawng chu a ti ang,' titu ka ni," tiin.
←  Isaiah (44/66)  →