Isaiah (40/66)  

1. Thlamuan rawh u, ka mite hi thlamuan rawh u, in Pathianin a ti.
2. Jerusalem-ho hnenah thlamuan lamzawngin thu sawi u la, an indona chu a kin a, an sualna chu ngaihdam a ni a,
3. Chu! Autu rawl chuan, "Thlalerah LALPA kawng buatsaih u la, ram rovah kan Pathian tan lamlian tirual rawh u.
4. Kawr tin, tihsan a ni vek ang a, tlang tin, mual tin, tihhniam a ni bawk ang: kawng kawite tihngil a ni ang a, a bum boh laite tihrual a ni bawk ang:
5. tin, LALPA ropuina chu tihlan a ni ang a, mi zawng zawngin chu chu an hmu tlang dial ang: LALPA ka chuan a sawi tawh si a," a ti.
6. Chu! Aw chuan, "Eng thu sawiin nge ka au vang?" a ti a. "'Mi zawng zawng hlobet ang an ni a, an ropuina zawng zawng pawh phul pangpar ang a ni:
7. LALPA thaw chuan a chhem avangin hlobet chu a vuai a, a par chu a chuai thin: mite chu hlobet ang an ni ngei mai a.
8. Hlobet chu a vuai a, a par chu a chuai thin: kan Pathian thu erawh chu chatuanin a awm reng ang,' tiin," a ti a.
9. Aw Zion hnena chanchin tha hriltu, tlang sang takah khian han chho rawh; aw Jerusalem hnena chanchin tha hriltu, ring takin i aw chhuah rawh; chhuah rawh, hlau suh; Juda khuate hnenah chuan, "en teh u, in Pathian hi1
10. En teh u, Lalpa PATHIAN chu mi chak tak angin a lo kal dawn hi; a ban chuan a aiah ro a rel ang; en teh u, a lawmman chu a hnenah a awm hi, a rulhna chu a hmaah a awm bawk a.
11. Ani chuan beram vengtu angin a pawl chu a chawm ang a, beram note chu a banin a pawm khawm ang a, a angchhunga dahin a kalpui ang a, no hruai laite chu zawi tein a hruai dial dial ang," ti rawh.
12. Tuin nge tuite chu a kutphah khuar leka teha, van khi khap leka teh a, leia vaivut hi tehkhawng pakhat leka thun vek a, tlangte chu khin leka buka, mual pawngte chu bukna leka buk kha le?
13. Tuin nge LALPA thlarau chu thil tih dan tur kawhhmuh le? A nih loh leh tu nge a remruatsaktu nia amah zirtir le?
14. Ani chuan tu nge a rawn a, tuin nge amah chu hriattir a, rorelna kawng entira, hriatna zirtir a, hriatthiamna kawng entir ngai le?
15. Ngai teh, hnam tin chu baltina tui far khat ang lek an ni a, buknaa thil dip bang kai ang leka ruat an ni: ngai teh, ani chuan thliarkarte chu thil te tak te angin a la nelh nelh mai thin.
16. Lebanon meuh pawh tuah tham a ni lo a, a rama rante pawh halrala inthawina tham an ni hek lo.
17. Hnam tinrengte chu a hmaah chuan engmah lo ang an ni a ani ngaih chuan engmah lo aia tlem zawk, boruak mai an ni a.
18. Pathian chu tu nen nge in tehkhin dawn le? A nih loh leh, eng lem nge amah nen in tehkhin dawn le?
19. Milem siam chawp hi, hna thawk mi chuan a chhung a, rangkachak chher mi chuan rangkachakin a luan a, chu mi tan chuan tangka khaidiatte a chhunsak thin.
20. Chutiang thilpek pe zo lo e rethei lutuk chuan thing mawih lo tur a thlang thin; milem siam chawp, nghing lo tur, atana dinsaktu tur themthiam mi a zawngt thin.
21. In rilruin in hre ngai lo em ni? In bengin in hre ngai lo em ni? Atir atang khan an hrilh lo che u em ni? Leilung pian tirh atang khan in hre thiam lo em ni?
22. Ani chu leilung kualkhungna chunga thua chu a ni, a mithmuh chuan lei chunga awmho chu khaute ang lek an ni a; ani chu van khi puan in chung anga kai pharh a, puan in awmna turah zar a,
23. mi liante engmah loa siam thina chu a ni; ani chuan leia roreltute chu boruakah a siam thin.
24. A ni, a phun an ni lo; a ni, a tuh an ni lo; a ni, an kung chuan leiah zung a kai lo: chu lo pawh chu ani chuan anniho chu a chhem a, an vuai a, thawngaleivirin buh si a lak bo angin a la bo thin.
25. Tu nen nge mi tehkhin a, tu tluk lekah nge mi ruat dan? Mi Thianghlim chuan a ti.
26. Chung lamah khian in mitte len chho u la, khingte khi tu siam nge ni en rawh u; ani chuan sipaihote khi indawt zelin a hruai chhuak thin a, an hmingin a ko theuh thin a; a chakna nasatna avang leh, thiltihtheihna lama a chak avangin pakhat mah kim lo an awm ngai lo.
27. Engati nge, aw Jakob-ho, hetianga in tih ni, engati nge, aw Israel-ho, hetianga in sawi ni, "Ka kawng hi LALPA laka thup a ni a, ro mi relna hi ka Pathian laka lak bo a ni ta," tih hi?
28. In rilruin in hre ngai lo em ni? In bengin in hre ngai lo em ni? Kumkhaw Pathian, LALPA, Kawlkil Siamtu chu, a chau ngai lo a, a hah ngai hek lohzia hi; a hriat thiamzia chu zawn chhuah rual a ni lo.
29. Chau hnenahte chuan thiltihtheihna a pe thin a; chakna reng nei lote chu a tichak thin.
30. Tleirawlte meuh pawh an chauin an hah ang a, tlangvalte pawh an tlu der ang:LALPA nghaktute erawh chuan an chakna chu an siam tha leh ang a; mupuite angin thlain an thlawk chho ang a; hah loin an tlan ang a; chau loin kein an kal ang.
31. LALPA nghaktute erawh chuan an chakna chu an siam tha leh ang a; mupuite angin thlain an thlawk chho ang a; hah loin an tlan ang a; chau loin kein an kal ang.

  Isaiah (40/66)