←  Isaiah (3/66)  →
1. Ngai teh u, Lalpa, sipaihote LALPA chuan, Jerusalem hnen ata leh Juda-ho hnen ata chu an rinpui leh an rin ber, an rinpui chaw zawng zawng leh an rin ber tui zawng zawng chu, an laksak mek anih hi;
2. mi chak leh indo thiamte nen; roreltu leh, zawlnei leh, aienthiam leh, upate nen;
3. sawmnga hotu leh, mi zahawm leh, remruattu leh, themthiam leh, aikaihthiamte nen.
4. Tichuan, an mi laintea awm turin naupangte ka pe ang a, nausenten an chungah ro an rel ang.
5. Tichuan, mite chu hnehchhiahin an awm ang, tin, mahni thenawmte nen inhnehchhiahin an awm ang: naupang chu upa chungah chapo takin an awm ang a, mi chhe te pawh mi zahawm chungah chapo takin an awm bawk ang.
6. Miin a unau a pa inah chelhin, "Nang chuan silhfen i nei a, kan roreltuah awm la, he chhiatna hi i kutah awm rawh se," a tih hunah;
7. chu mi hunah chuan ani chuan a aw a chhuah ang a, "Kei zawng siathatuah ka awm dawn lo e; ka inah ei tur a awm si lo a, silhfen a awm hek lo: mite roreltuah min siak lo ang," tiin.
8. A ropuina an hmusit avangin an tawng leh thiltihte chu LALPA do zawng a ni a, Jerusalem chu a chhe zo a, Juda-ho chu an tlu zo ta a ni.
9. An hmel lan danin anmahni a hek chawp a; an sualna chu Sodom ang maiin an lantir a, an zep lo. An nunna chung chu a pik e! thil tha loin an inthungrul chawp si a.
10. Mi fel thu-ah chuan, "An la tha dawn," ti rawh u: an thiltih rahte chu an ei dawn si a.
11. Mi sual chung chu a pik e! An la chhe dawn a ni: an kuta thiltih thungrulhna chu an hnenah pek a la ni dawn si a.
12. Ka mite zawng anmahni hnehchhiahtute hi naupangte an ni ta a, hmeichhiaten an chungah ro an rel ta. Aw ka mite u, in hruaitute chuan an hruai sual che u a, in kalna kawngte chu an tichhe thin.
13. LALPA chu sawipui turin a lo ding chhuak a, mite ro rel turin a lo ding ta a.
14. LALPA chuan a mite upaho chungah leh an mi lianho chungah ro a rel ang: Lalpa, Sipaihote LALPA chuan, "Nangmahniho hi in ni, grep huan ei zotute chu; mi retheite laka sum lak chu in inahte a ni a awm ni:
15. engtizia nge ka mite chu in nem sawr a, retheite hmai chu in rawt samw ni?" a ti a.
16. Chu lo pawh chu LALPA chuan, "Zion fanute chu chapo aka an awm a, dak awr awr leh mi melh hraw hrawa an kal a, an kal chu ti awh awhin an kal a, an kete an pen rik chhawng chhawng avangin,
17. LALPA chuan Zion fanute chhipah chuan pan khir a awmtir ang a, Lalpa chuan an zahmawhte pawh a tilang ang," a ti a.
18. Chumi niah chuan Lalpa'n an incheimawinate chu a laksak ang, kebun te, len lukhum te, nghawngkawl te chu;
19. bengbeh uai diah diah te, banbun te, inkhuhna puante chu;
20. lu cherna te, ke bun khaidiat te, kawnghren te, rimtui bawm te, invenna te chu;
21. hming nemna zungbun te, hnar vuahte chu;
22. kut ni thuamhnaw te, kawrfual te, puan sin te, ipte te chu;
23. darthlalang te, puan zai sin te, diar te, intuam mawina puante chu.
24. Tin, heti hi a ni ang a, mawisawla rimtui tak aiah thil tawih a awm ang; tin, kawnghren aiah hruizen a awm ang; tin, sam hniar siau aiah lu kawlhna a awm ang ; tin, puan mawi tak aiah saiip puan ven a awm ang: hmel that aiah thir linga deh chhiatna a awm ang.
25. I mite chu khandaiha tihtlukin an awm ang a, i mi chak takte chu indonaah an tlu ang.A kulh kawngkharte chu an awm inchumin an tap ang a; ani chu a ruak ang a, leiah a thu ang.
26. A kulh kawngkharte chu an awm inchumin an tap ang a; ani chu a ruak ang a, leiah a thu ang.
←  Isaiah (3/66)  →