←  Isaiah (28/66)  →
1. Ephraim-ho zu ruihmangte chapona lallukhum chung leh, an mawina ropui pangpar chuai mek, uain chiahhneha awmho ruam tha takin a khum chung chu a pik e!
2. Ngai teh, LALPA chuan mi chak thiltithei tak a nei a; ani chuan, rial nasa tak tla dur dur, thlipui thil tichhe rem rum ang leh, tuilian nasa tak liam zur zur ang maiin, leiah a paih chawrh ang.
3. Ephraim-ho zu ruihmangte chapona lallukhum chu rah behin a awm ang :
4. an mawina ropui pangpar chuai mek, ruam tha takin a khum chu, nipui hmaa theipui hmin hmasa ber, a entuin a hmuh a, a kuta a awm veleha a ei zawh mai htin ang chu a ni ang.
5. Chumi niah chuan sipaihote LALPA chu, a mi la awm chhungte tan ropuina lallukhum leh mawina lukum te,
6. rorel tura thua tan rorelna thlarau te, kulh kawngkhar bula rawn beiho dangkirtute tan chaknate a ni ang.
7. Nimahsela chungte pawh chu uain avangin an thle an thle a, zu avangin an pai an pai a; puithiamte leh zawlneite chu zu avangin an thle an thle a, uain lem zawhin an awm a, zu avangin an pai an pai a; inlarna thu-ah an thle an thle thin a, rorelna thu-ah an pai an pai thin.
8. Hmun fai reng reng awm lo khawpin dawhkan zawng zawng chu lauk leh thil bawlhhlawhin a khat a ni.
9. Hriatna lam chu tu hi nge a zirtir dawn tehchai: Thuchah chu tu hi nge a hriattir dawn tehchai: Hnute hnek bang hlimte leh hnute hnektir tawh lohte hi em ni?
10. Thununna thu chunga thununna thu chherchuan a, thununna thu chunga thununna chherchhuan a; dan chunga dan chherchhuan a, dan chunga dan chherchhuan a; hetah tlem te, sawtah tlem te tih hlir a ni si a.
11. A ni, nimahsela hmui danglam pu mi hmangin, tawng hrangin, he'ng mite hnenah hian thu a sawi tawh zawk ang:
12. "Hei hi a ni, chawlhna chu ni, hahte chu chawlhtir rawh u! hei hi a ni, intihharhna chu ni," a tihate chu: nimahsela an ngaithla duh si lo.
13. Chuvangin, an kal a, zangthala an tluk a, an keh sawm a, thanga an awh a, mana an awm theihna turin, LALPA thu chu anniho tan chuan, thununna thu chunga thununna thu chherchhuan a, thununa thu chunga thununna thu chherchhuan a; dan chunga dan chherchhuan a, dan chunga dan chherchhuan a; hetah tlem te, sawtah tlem te tih hlir a ni mai ang.
14. Chumi avang chuan, mi hmusit hmang mite u, he mite, Jerusalem khuaa awmho, rorelsaktute u, LALPA thu hi hre rawh u:
15. "Thihna lakah thu kan thlung ta, Seol nen thu kan intiam ta; vuakna tui lian liam chu a luan tlang hunah pawh keini thleng chuan a luang lo ang; dawt thute kan inhumhimna'n kan hmang a, dawt hnuaiah kan biru ta si a," in tih avangin,
16. chuvang chuan Lalpa PATHIAN chuan heti hian a sawi: "Ngai teh, lung, lung riah hnu, a kila lung hlu tak phum nghet tak chu, Zion-ah chuan lungphum atan ka rem hi: a ringtu chu a hmanhmawh lo ang.
17. rorelna fel chu a tihngilna hruiah ka hmang ang a, felna chu darmumkhaiah ka hmang ang: rial chu inhumhimna dawt thute chu a chhu bo vek ang a,t uite chuan bihrukna chu a chim pil ang.
18. Tin, thihna laka in thu thlun chu phelhin a awm ang a, Seol nena in thu intiam pawh chu a ding chuak lo ang; vuakna tui lian liam chu a luan tlang hunah, chu i hunah chuan a rah behin in awm ang.
19. A luan tlang apiangin a la zel ang che u; atuk atuk tin, achhun achhunzanin, a luang tlang dawn si a: thuchah awmze hriat chu thil rapthlak hlir a ni ang," tiin.
20. Khum chu thluanna'n a tawi lutuk si a, puanthuah chu inkhuhna'n a te lutuk bawk si.
21. A hna, a hna danglam chu, a thawh theihna'n leh, a thiltih, a thiltih danglam chu, a hlen theiana'n, LALPA chu, Perazim tlanga a tho ang khan, a tho dawn si a, Gibeon ruama a thinur ang khan a thinur dawn a ni.
22. Chutichuan mi hmusit hmangtute ni tawh suh u, chutilochuan in kawlbunte chu rinawm takin an siam dah ang e: tawpna, tawpna thleng ngei tura ruat tlat chu, lei pum pui chunga a thlen tur thu Lalpa, sipaihote LALPA hnen atang chuan ka hre si a.
23. Beng chhi u la, ka aw hi hre rawh u; ngaithla u la, ka thu sawi hi hre rawh u.
24. Leilettu chuan chi thehna'n lei a let reng ngai em ni? A lei tlangte chua tikehin a tisawm reng ngai em ni?
25. A chung chu a chawh rual zawhin mohuri-te chu a theh darh lo em ni? Zira te pawh a theh lo em ni? Buh te pawh a tlarin, barlite pawh a hmun ruatah, vai buhtunte pawh a vau hrulah a tuh thin lo em ni?
26. A Pathian chuan ani chu fel takin a thununin a zirtir thin si a.
27. Mohuri chu buh chilna khawl hriamin an chil ngai si lo a, zira chungah chuan tawlailir ke chu an lirhtir ngai hek lo; mohuri chu tiangin an vua a, zira chu talhtumin an vaw zawk thin a ni.
28. Chhang siamna buh chu rawtsawmin a awm thin a, kumkhuain a vaw reng dawn si lo: a tawlailir ke leh a sakawrte chuan tidarh mah se la, a rawt sawmtir ngai lo.Chung pawh chu sipaihote LALPA, inrawnna kawnga mi mak tak leh, finna kawnga mi tha tak lakah chuan a chhuak a ni.
29. Chung pawh chu sipaihote LALPA, inrawnna kawnga mi mak tak leh, finna kawnga mi tha tak lakah chuan a chhuak a ni.
←  Isaiah (28/66)  →