Isaiah (24/66)  

1. Ngai teh, LALPA chuan lei hi a tiruakin, a tiram dawn a, a khaikhup ang a, a awmate chu a tidarh dawn.
2. Tin, vantlang chunga tih angin, puithiam chungah pawh tih a ni ang; bawihpa chunga a awm angin, a pu chungah pawh a aw ang; bawihnu chunga awm angin, a pi chungah pawh a awm ang; leitu chunga a awm angin, hralhtu chungah pawh a awm ang; puktirtu chunga a awm angin, puktu chungah pawh a awm ang; a pung uma puktirtu chunga a awm angin, a hnena a pung petu chungah pawh a awm ang.
3. Lei hi tihruah fai kelh leh tihchhiat fai kelhin a awm ang; chu thu chu LALPA'n a sawi tawh si a.
4. lei hi a tapin a chuai e, khawvel hi a chauin a chuai e, leia mi chungnungte hnuaiah chuan a chau ve.
5. Lei hi a awmnate hnuaiah chuan a bawlhhlawh zo ta; dante chu an bawhchhiat a, thuruat chu an tihdanglam a, kumkhaw thuthlung chu an bawhchhiat avangin.
6. chuvangin anchhe lawhnain lei hi a ei zo a, a awmate chu thiam loh chantirin an awm ta: chuvangin leia awmte chu an kang hlum a, mi tlem te chauh an la awm.
7. Uain thar chu a tap e, grep hrui chu a chau ve, thinlunga hlim zawng zawngte chu an rum e.
8. Khuangtete hlimna chu a reh e, lawm taka awmte thawm chu a tawp e, tingtang hlim ri chu a reh e.
9. Hla sa chungin uain an in lo ang; zu chu a intute tan kha tak a ni ang.
10. Buaina khawpui chu tihchimin a awm ta: tumah reng reng an luh lohna'n in tin, kharin a awm ta.
11. Uain avangin kawtthlerahte chuan tap thawm a awm a; hlimna zawng zawng tihthimin a awm a, he ram hlimna hi a bo ta.
12. Khawpuiah chuan tiauna hnutchhiahin a awm a, a kulh kawngkhar chu vuak chhiatin a awm ta.
13. Lei lailia mi tin zingah hetiang hian a la awm dawn si a, oliv thing vuak hnua rah a la awm thin ang leh, grep lawh hnua grep hmaih lawh tur a la awm thin ang mai hian.
14. chungte chuan an aw an chhuah ang a, an au vang; LALPA ropuina avangin tuifinriat atangin ring takin an au ve.
15. Chumi avang chuan LALPA chu khaw chhak lamah chawimawi rawh u, LALPA, Israel ho Pathian hing ngei chu, tuifinriatkam ruamahte chuan chawimawi rawh u.
16. Kawlkil tawpa hla sakte kan hria, "Mi flte hnenah ropuina awm rawh se" tih hla hi. Nimahsela, kei chuan, "Ka cher tawlh tawlh a, ka cher tawlh talwh a, ka chung a pik e! vervek taka titute chuan vervek takin an ti a;a ni, vervek taka titute chuan vervek tak takin an ti," ka ti a.
17. Aw leia awm, hlauhawmna te, khuarkhurum te, thangte chu i chungah a awm e.
18. Tichuan heti hi a ni ang a, hlauhawm thawm atanga tlana chu, khuarkhurumah a tla ang a; khuarkhurum chhung ata chhuak chhova chu, thangah a awk ang: chung lama tukverhte chu hawnin a awm si a, leilung nghahchhante chu a nghing bawk a ni.
19. Lei hi a keh chhe vek a, lei hi tihralin a awm zo a, lei hi nasa takin a nghing a.
20. Lei hi zu rui mi angin a pai hlawk hlawk ang a, bawkte sawi angin a sawi luai luai ang; a bawhchhiatna chu a chungah rit takin a awm ang a, tichuan a tlu ang a, a tho leh tawh lo ang.
21. Tin, chumi niah chuan heti hi a ni ang a, LALPA chuan chung lama mi chungnunghopawl lian tak chu a hrem ang, leia lei lalte nen.
22. Tin, mi tangho khuarkhuruma hruai khawma an awm angin chungho chu hruai khawmin an awm ang a, tan inah khungin an awm ang a, ni rei tak hnuah chuan hremin an awm ang.Chumi hunah chuan thla khi zak takin a awm ang a, ni khi mualpho takin a awm ang; sipaihoi-te LALPA chu Zion tlang leh, Jerusalem khuaah leh, a upaho hmaah chuan, ropui takin lalah a awm dawn si a.
23. Chumi hunah chuan thla khi zak takin a awm ang a, ni khi mualpho takin a awm ang; sipaihoi-te LALPA chu Zion tlang leh, Jerusalem khuaah leh, a upaho hmaah chuan, ropui takin lalah a awm dawn si a.

  Isaiah (24/66)