←  Isaiah (2/66)  →
1. Amozaa fapa Isaian Juda-ho leh Jerusalem chungchang thu a hmuh chu.
2. Ni hnuhnungahte chuan heti hi a ni ang a, LALPA in amwna tlang chu tlang lian chungahte chuan tihnghehin a awm ang a, tlang te te chungah chuan chawisanin a awm bawk ang; chutah chuan hnam tinrengte chu an kal nguah nguah ang.
3. Tin, chi tam takte chu an kal ang a, "Lo haw u la, LALPA tlangah, Jakoba Pathian inah chuan i chho ang u; tichuan ani'n a kawng chanchinte chu min zirtir ang a, a kalkawngahte chuan kan kal ang," an ti ang: Zion atang chuan dan thu chu a lo chhuak dawn si a, lalpa thu chu Jerusalem atnagin a lo chhuak dawn a ni.
4. Tin, ani chuan hnam tin karah ro a rel ang a, chi tam tak pawh a zilhhau vang: tin, a khandaihte chu leilehna hmawr zumahte an chher ang a, an feite chu theikung ahchhumna chem kawmahte an chher ang: hnam dangin hnam dang chungah khandaih an lek tawh lo ang a, indo dan pawh an zir tawh hek lo ang.
5. Aw Jakoba chhungte u, lo haw u la, LALPA engah i leng ang u.
6. Khawchhak lam tih dan te, Philistia dawite an ching a, ram dang mite tihdante an zawm tak avangin i mi Jakoba chhungte chu i kalsan ta a.
7. An ram chu tangka leh rangkachakin a khat a, an sumte chu chhiar sen rual a ni hek lo; an ram chu sakawrin a khat a, an tawlailirte chu chhiar sen rual a ni hek lo.
8. An ram chu milemin a khat a: anmahni kuta thawh chhuah, anmahni zungtangtea siam chu, an be thin.
9. Mi tete chu tihhniamin an awm a, mi liante chu tihlawmin an awm bawk a: chuvangin anni chu ngaidam suh ang che.
10. LALPA hlauhawmna lak atang leh a mawina ropuina lak atang chuan lungpuiah chuan lut u la, vaivutah biru rawh u.
11. Mihring induhnate chu tihlawmin a awm ang a, mite chapona chu tihhniamin a awm ang, chu mi niah chuan LALPA chauh chu chawisanin a awm ang.
12. Sipaihote LALPA ni chu inngaisang leh chapo zawng zawng chungah leh chawisana awm zawng zawng chungah chuan a la awm dawn si a; tichuan tihtlawmin an awm ang:
13. Lebanon tlanga sidar thing sang tak leh chawisana awmte zawng zawng chungah te,
14. tlang lian sang tak chungah te, tlang te chawisana awm zawng zawng chungah te,
15. in sang, sang tak zawng zawng chungah te, kulh tlangpui bang nei zawng zawng chungah te,
16. Tarsish lawng lian zawng zawng chungah te, thil lem duhawm zawng zawng chungah te pawh a la awm ang.
17. Mihring induhnate chu tihhniamin a awm ang a, mite chapona chu tihlawmin a awm ang: chu mi niah chuan LALPA chauh chu chawisanin a awm ang.
18. Tin, milemte chu an boral daih ang.
19. Tin, lei hi nasa tak taka tinghing tura a thawh hunah, LALPA hlauhawmna lak atang leh mawina ropuina lak atang chuan mite chu lungpui pukahte leh lei kuaahte chuan an lut ang.
20. Chu mi niah chuan miten an tangkaraw milemte leh an rangkachak milem te, biak tura an siamsakte chu, buikelek hnenahte leh bak hnenahte chuan an paih ang a;
21. lei hi nasa tak taka tinghing tura a thawh hunah, LALPA hlauhawmna lak atang leh a mawina ropuina lak atang chuan, lungpui pukahte leh kham lungpui khu-ahte chuan an lut ang.An hnar chauha thaw awm mihring rin hi bansan tawh rawh uL eng kawngah nge rin tlak an nih tehlul ni?
22. An hnar chauha thaw awm mihring rin hi bansan tawh rawh uL eng kawngah nge rin tlak an nih tehlul ni?
←  Isaiah (2/66)  →