| Hosea (1/14) → |
| 1. | Judaho lal Uzzia te, Jothama te, Ahaza te, Hezekia te lal lai leh Israel-ho lal Jeroboama, Joasa fapa lal laia Beeria fapa Hosea hnena LALPA thu lo thleng chu. |
| 2. | LALPA'n Hosea hminga Israelte hnena thu a sawi tan lai khan hetiangin Hosea hnenah a sawi: "Kal la, nupuiah nawhchizuar nei la; nawhchizuar lakah fa hring rawh; hetiang hian ka mite chuan min kalsan a, min uiresan ta a ni," tiin. |
| 3. | Tichuan a kal a Diblaima fanu Gomeri chu a nei ta a; tin, nau a pai a, fapa a hrinsak ta a. |
| 4. | Tin, LALPA chuan a hnenah, A hmingah Jezreela sa rawh; rei rial loin Jezreel phuba chu Jehua chhungte chungah ka la ang a, Israela chhungte ram chu ka ti kin ang. |
| 5. | Tin, chumi niah chuan heti hi a ni ang a, Jezreel ruamah Israel ho thal ngul chu ka ti tliak ang, a ti a. |
| 6. | Tin, nau a pai leh a, fanu a hring a. Tin, LALPA chuan a hnenah, a hmingah Lo-ruhamai sa rawh: Israela chhungte chu ka lainat ngai dawn tawh lo, ka ngaidam thuai dawn ta si lo a. |
| 7. | Juda chhungte erawh chu ka lainat ang a, thal ngul emaw, khandaih emaw, indona emaw, sakawr emaw, sakawr chung chuang mi emawa anmahni chhandam loin, LALPA an pathian chuan ka chhandam ang, a ti a. |
| 8. | Tin, Lo-ruhamai chu hnute hnek a bantir, tin, nau a pai leh a, fapa ahring a. |
| 9. | Tin, LALPA chuan heti hian a ti a: Ahmingah Lo-ammia sa rawh: nangni hi ka mite in ni si lo a, tin, kei in pathian ka ni dawn lo. |
| 10. | Amaherawhchu Israel fate chu tuifinriat tiau vaivut, teh rual loh leh chhiar rual loh zat an ni ang a; tin, heti hi a ni ang a, an hnena, Ka mite in ni lo, tihna hmunah chuan, Pathian nung fate in ni e, tih a ni ang.Tin, Juda fate leh Israel fate chu an pungkhawm ang a, an lu tur an ruat ang a, chu ram atang chuan an kal chho ang: Jezreel ni chu a ropui dawn si a. |
| 11. | Tin, Juda fate leh Israel fate chu an pungkhawm ang a, an lu tur an ruat ang a, chu ram atang chuan an kal chho ang: Jezreel ni chu a ropui dawn si a. |
| Hosea (1/14) → |